2 Vatesalonike 1
1
Uluhungilo
1Uneene Pawulo, pamwinga nu Silivano#1:1 Silivano Uyu ye iilongwa apa, yuuyula ye iitambulwa Sila ku Malimo ga Vatume 15:22. nu Timoti, tukuvasimbila unyeenye vaanu va lukombeso, ulugenda ku wudzenge wa Tesalonike ye mukumufuuwa uNguluvi uDadiisu nu Mutwa Yesu Kilisiti. 2Ulusungu nu lutengamaso ukuhuma kwa Nguluvi uDadiisu, nu kwa Mutwa Yesu Kilisiti, fivedzage naanye.
Uluhigo pa kigono ikya kwadza uKilisiti
3Vafuuwa vayiisu, twivagila ukumuhongedza uNguluvi ifigono fyonda wiimila weenyo. Lwivagila ukulima ewo, pakuva ulufuuwo lwenyo lwikula hiilo, nu wende wa nayula umwenyo we ali nawo, kwa muyagwe wiigina. 4Lwe lwene uneefwe twiwona lutogo wiimila weenyo mu ngʼombeso idzingi dza Nguluvi, wiimila wa lwigugumidzo nu lufuuwo lwenyo mu mumuko ni nalamu dzonda idzikuvafika.
5Dzonda idzo dziiwoneesa ukutigila, uluhigo lwa Nguluvi lwa wugolofu. Wuhumila wa idzo, uNguluvi alavavalilila unyeenye ukuvagila pa kwingila mu wutwa waakwe, we mwipumuswa wiimila wa uwo. 6Pakuva uNguluvi iihigila mu wugolofu, umwene alavapiluhidza imumuko avo avakuvapumusa unyeenye, 7kangi unyeenye ye mwipumuswa, alavapeela ulupodzo pamwinga naafwe. Idzo dzilaalimika ikigono pe alaavilatulwa uMutwa Yesu ukuhuma kukyanya mu lulambo lwa mooto, pamwinga na vanyamwandza vaakwe avanya ngufu. 8Umwene alaadza mu kuvapedza vonda aviikaana ukumudzeela uNguluvi na avasiikwidikila iMola iNofu iya Mutwa veesu uYesu. 9Avo, valaanukila ulupedzo lwa lutipulo lwa mbeepali, kwe kutigila ukuviikwa kutaali na miiho ga Mutwa Yesu, ni ndolo dzaakwe idzinya ngufu.#Isaya 2:10, 19, 21 10Ikigono ikyo pe alaapiluka uMutwa, alaadza mu kuginikwa mu viimike nu kudzumwa na vaanu vaakwe vonda avakumufuuwa. Na yuunye mulaavedzasa navo, pakuva mwafuuviilwe imola dza Yesu dze twavalongiye.
UPawulo akuvalapangilila aVatesalonike
11Wiimila wa idzo, tukuvalapangilila mwa Nguluvi veesu ifigono fyonda, ukuta avatangage muvagilage ukwikala imiikalile gye ávakemeeleliye. Tukuvalapangilila ukutigila, mu ngufu dzaakwe, avatangage ukukwilidza amalimo manofu gonda ge mwigulumila, pakuva mwifuuwa. 12Twilapangila ewo, ukuta ilitaawa lya Mutwa veesu uYesu liginikwage wiimila weenyo, na yuunye muginikwage wiimila waakwe. Idzo dziilimikaga wiimila wa lusungu lwa Nguluvi veesu, nu Mutwa uYesu Kilisiti.
Currently Selected:
2 Vatesalonike 1: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.