1 Vatesalonike 3
3
UTimoti iitumwa ku Tesalonike
1Neke lino, pe twaviye túlemiilwe ukwigugumidza ukulekana naanye, twiwonaga kiba tusigale twiveene pa Atene,#Malimo ga Vatume 17:15 2nu kumutuma uTimoti. Uyo ye mwene umufuuwa muyiisu, kangi mulima-malimo va Nguluvi pamwinga naafwe ukudalika iMola iNofu ya Kilisiti. Twamutumile, ukuta avapeele ingufu nu kuvakangadza mu lufuuwo lwenyo, 3ukuta umuunu ye avedzaga atane ukuyudzwa wiimila wa mumuko idzi. Unyeenye mwidzeela ukutigila, gye mikeelelele gya Nguluvi ukwesu ukutigila, tupumuswe. 4Nambe umusika pe twali pamwinga naanye, twavalongelaga ukutigila tuhadza twipumuswa, na liilino lugenda ewo.
5Lwe lwene pe ndaalemiilwe ukwigugumidza, ndikumutumaga uTimoti ukuta ndipodze imola dza lufuuwo lwenyo. Ndaahoodzaga ukutigila, apangi umugemi uSetano ávagemiidze nu kuvagwisa, na apo, amalimo geesu ge twalimile ukwenyo, ngali gaahela.
Imola inofu dza Vatesalonike
6Lino uTimoti áadzile mu kuhuma ukwenyo, átulongiye imola inofu wiimila wa lufuuwo nu wende weenyo. Kangi átulongiye ukutigila, ifigono fyonda mukutwiwuka nu lukeelo, músuukiilwe ukutuwona uneefwe, ndawuli naafwe kye túsuukiilwe ukuvawona unyeenye.
7Neke lino, nye vafuuwa vayiisu, imola dza lufuuwo lwenyo dzatukangiidze inumbula mu nalamu ni mumuko dzeesu dzonda. 8Pe twiwona unyeenye mwímile sipi mwa Mutwa, lino uneefwe tukwipulika wunofu mu miikalile gyesu. 9Tumuhongedze wuli uNguluvi wiimila wa lufuuwo lwenyo? Tuli nu lukeelo lukomi pa miiho ga Nguluvi wiimila weenyo. 10Lwe lwene pakilo na pa muunyi twilapangila hiilo kwa Nguluvi ukutigila, tuwonane miiho na miiho, nu kuvawulanidza idziikwangila mu lufuuwo lwenyo.
11Lino twilapangila kwa Nguluvi uDadiisu yumwene, nu Yesu uMutwa veesu, atudindulile ingʼaasi twadze ukwenyo. 12UMutwa avaginalidzage ukwiyenda hiilo yuunye mwa yuunye, nu kuveenda avangi vonda, ndawuli naafwe kye tukuveenda unyeenye. 13Kangi akangadzage inumbula dzeenyo, ukuta muvedzage viimike, mungaya lugomehedzo pa miiho ga Nguluvi uDadiisu, pe alaavedza iikwadza uMutwa veesu uYesu, pamwinga na viimike vaakwe vonda.
Currently Selected:
1 Vatesalonike 3: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
