Англунимос 44

Хасардо тахтай

1О Иосифо пхэндя пэстерэ барэдэрэ бутярнэсти:

— Пхэр э гонэ кадылэ манушэндерэ хамаса, скати ундярэна, тай стхов о руп саворэнди палпалэ андэ гонэ. 2Стхов мэрно рупуно тахтай андо гоно лэ майцыкнэсти екхтанэ лэстерэ рупэса пала ворзо.

Кодва стердя кадя, сар пхэндя лэсти о Иосифо.

3Кати десайля, лэ пхралэн бишалдэ андо дром пэстерэ ослонэнца. 4Вонэ сас инке найдур лэ форостар, кала о Иосифо пхэндя лэ барэдэрэ бутярнэсти:

— Майито ладэ пала кодыла мануша. Кала дорэсэса, пхэн лэнди: «Состар тумэ потиндэ вырытимаса пала лашымос? 5Ке кода мэрнэ раеско тахтай, анда саво вов пэл тай пэ саво врэжый! Тумэ стердэ вырыто дило!»

6Кала о барэдэр бутярно дорэсля лэн, вов пхэндя лэнди кадыла алава. 7Э пхрала пхэндэ:

— Состар о рай пхэнэл кацавэ алава? Терэ копэля на авэна кацаво тэ терэн! 8Ке амэ жэ андям тути палпалэ анда пхув Ханаано о руп, саво аракхлям андэ амарэ гонэ. Сости амэнди тэ чёрас о руп чи о сомнак анда чер терэ раестар? 9Сар аракхэса о тахтай кай екх терэ копэлендар, мэк вов мэрэл, ай авэр ашэна терэ раести копэленца.

10Вов пхэндя:

— Мишто, мэк авэл кадя, сар тумэ пхэнэн: кастэ аракхава о тахтай, кодыва ашэла мэрно копэли, ай авэр авэна надошалэ.

11Э пхрала йито стходэ э гонэ тэлэ пэ пхув тай роспхандэ лэн. 12О барэдэр бутярно ля тэ родэл, лэ майпхурэстар жы кай о майтэрно, тай аракхля о тахтай андо гоно кай о Вениамино. 13Э пхрала росшындэ пэр пэстэ э гада, стходэ э гонэ пэ ослуря тай рисайлэ палпалэ андо форо.

14О Иуда тай лэсти пхрала рисайлэ андо чер кай о Иосифо, саво сас инке котэ. Вонэ пэлинэ англа лэстэ пэ пхув. 15О Иосифо пхэндя лэнди:

— Со жэ тумэ тердэ? Тумэ со, на ганглэ, со кацаво мануш, сар мэ, ся ганэла пай врэжа?

16— Со амэ тэ пхэнас амарэ раести? — пхэндя о Иуда. — Сар тэ дас дума? Сар тэ сыкавас, со сам чячюнэ? О Дэл сыкавэл э дош терэ копэленди. Акана амэ терэ копэля, мэрно рай, — мэ тай кодыва, кастэ аракхлэ о тахтай.

17О Иосифо пхэндя:

— Мэ на авава кода тэ терав! Кати кодыва, кастэ аракхлэ о тахтай, авэла мэрно копэли, ай тумэ лошаса рисайвэн палпалэ каринг тумаро дад.

О Иуда мангэл тэ отмэкэл лэ Вениаминос

18Тунче о Иуда поджыля лэстэ тай пхэндя:

— Мангав тут, мэрно рай, дэ терэ копэлести тэ дав дума туса. На холяйвэ пэ пэстрерэс копэли, ту ж кацаво, сар и фараоно. 19Мэрно рай пушлясас кай пэстерэ копэля: «Исы тумэндэ дад чи пхрал?» 20Тай амэ пхэндямас лэ раести: «Амэндэ исы пхуро дад тай лэстэ исы тэрно шаво, саво аракхадиля лэстэ андэ лэско пхуримос. Лэско пхрал муля, тай вов ашыляпэ екх лэ кай пэсти дэй лэ шавэндар, тай лэско дад камэл лэс». 21Тунче ту пхэндян терэ копэленди: «Анэн лэс мандэ, соп мэ тэ дикхав пэр лэстэ». 22Ай амэ пхэндямас амарэ раести: «О шаворо на ашавэла пэстерэ дадэс. Ай сар ашавэла, тунче о дад мэрэла». 23Ай ту пхэндян терэ копэленди: «Жыпокэ тумаро пхрал на авэла кардэ тумэнца, на сыкадён манди пэ якха». 24Кала амэ рисайлям каринг амаро дад, амэ роспхэндэ лэсти, со пхэндян мэрно рай. 25Тунче амаро дад пхэндя: «Рисайвэн тай тинэн инке найбут хамос». 26Амэ пхэндямас: «Амэнди нащи тэ жас, кати сар жала амэнца о цыкно пхрал, тунче амэ жаса. Амэнди нащи тэ сыкадювас пэ якха кодылэ манушэсти би лэ цыкнэ пхралэса». 27Теро копэли, амаро дад, пхэндя амэнди: «Тумэ екхжэнэ ганэн, со мэрни ромни андя манди дуен шавэн. 28Екх лэндар жалятар мандар, тай мэ пхэндэм: «Вов сас росшындо пэ котора», — тай кодыла времятар мэ лэс на дикхлэм. 29Сар тумэ лэна мандар и аврэс, тай лэса терэлапэ глаба, тумэ зындярна мэрно суро шэро пэ лэ мулэнди люма грижатар».

30Акана, сар о шаворо на рисайвэла амэнца каринг о дад, тай сар мэрно дад, саво фартэ камэл лэ шаворэс, 31дикхэла, со лэс нинай амэнца, вов мэрэла. Терэ копэля зындярна о суро шэро амарэ дадэско пэ лэ мулэнди люма грижатар. 32Теро копэли дя алав англа дад, со фирисарава лэ шаворэс. Мэ пхэндэм: «Сар мэ на анава лэс каринг тутэ, кадыя дош англа тутэ, дадэ, авэла пэр мандэ ся жувимос». 33Ай акана мангав тут, дэ терэ копэлести тэ ашавпэ катэ копэлеса мэрнэ раести важ о шаворо, ай лэ шаворэс мэк тэ рисайвэл пэстерэ пхралэнца. 34Сар мэ рисайвава каринг о дад би лэ шаворэско? Тэ на дикхав мэ э грижа мэрнэ дадэсти.

Currently Selected:

Англунимос 44: СРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия пэ влахицко романи шыб