Англунимос 43

О Яково отмукэл лэ Вениаминос андо Египто

1Э бокх сас инке пэ кодыя пхув. 2Кала вонэ похалэ ся о марно, саво андэ анда Египто, лэнго дад пхэндя:

— Жан упалэ, тинэн амэнди инке найбут хамос.

3Нэ о Иуда пхэндя лэсти:

— Кодыва мануш пхэндя амэнди холяса: «На сыкадён манди пэ якха, сар тумэнца на авэла тумаро пхрал». 4Сар ту мэкэса амарэ пхралэ амэнца, тунче амэ жаса тай тинаса тути хамос. 5Ай сар ту на мэкэса лэс, амэ на жаса, пала кода со кодыва мануш пхэндя амэнди: «На сыкадён манди пэ якха, сар тумэнца на авэла тумаро пхрал».

6О Израилё пушля лэндар:

— Состар тумэ андэ манди кадыя глаба, пхэндэ кодылэ манушэсти, со тумэндэ исы инке екх пхрал?

7Вонэ пхэндэ:

— Кодыва мануш пушэлас ся пала амэндэ тай пала амаро ери: «Жундо инке тумаро дад? Исы тумэндэ инке пхрал?» Амэ роспхэндэ лэсти, со вов пушэлас. Катар амэ ганглям, со вов пхэнэла: «Анэн кардэ тумарэ пхралэс»?

8О Иуда пхэндя лэ Израилёсти, пэстерэ дадэсти:

— Бишал лэ шаворэс манца, тай амэ жасатар, кай амэ саворэ тэ на хасайвас тай тэ жувас ту тай амарэ бэяцэ. 9Мэ дав тути алав, со мэ екхжэно фирисарава лэс, мандар пушэса пала лэстэ. Сар мэ на анава лэс каринг тутэ тай на стхава лэс англа тутэ, тунче мэ авава дошало англа тутэ жыпокэ на мэрава. 10Сар амэ тэ на цырдас э время, то дувар жылоп тай рисайлоп палпалэ.

11Тунче лэнго дад о Израилё пхэндя лэнди:

— Сар кадя, тунче акэ со терэн: стхон андэ трастэ майлашо хамос амаря пхуятар тай андярэн андо даро кодылэ манушэсти — бальзамо тай ядин, спецые тай ладано, фисташкэ тай миндалё. 12Лэн тумэнца дувар майбут руп, лэс трэбуй тэ отдэн палпалэ, саво сас стходо андэ тумарэ гонэ. Файма, вонэ на прыдикхлэпэ. 13Лэн тумэнца тумарэ пхралэс тай майито жан каринг кодыва мануш. 14Мэк о Дэл Саворэзорэско дэл тумэнди тынгимос англа лэстэ, соп вов тэ мэкэл и аврэс тумарэ пхралэс тай лэ Вениаминос, тэ рисайвэн черэ екхтанэ. Ай сар манди трэбуй тэ ашавпэ би бэятонэнго, мэк кадя и авэла.

Пхрала до дуйто авэн андо Египто

15Тунче вонэ линэ э подаркуря, тай дуйвар майбут руп, тай лэ Вениаминос, майито жылэтар андо Египто тай авилэ англа Иосифо. 16Кала о Иосифо дикхля, со лэнца о Вениамино, вов пхэндя пэстерэ барэдэрэ бутярнэсти пэ пэско чер:

— Одындяр кадылэ манушэн мандэ черэ, шын варисавэс скотос тай стхов мисяля. Вонэ хана манца андо епаш дес.

17Кодыва мануш стердя, сар лэсти пхэндэ, тай андя лэн андо чер кай о Иосифо. 18Кала лэн андэ каринг о Иосифо черэ, вонэ пэрэдарайлэ. Вонэ гындосардэ: «Амэн андярдэ кордэ пала о руп, саво рисардапэ андэ амарэ гонэ андо англуно моло. Вов камэл тэ нахукэл пэ амэндэ, и тэ помарэл, и тэ залэл андэ копэля, и тэ залэл амарэн ослонэн».

19Вонэ поджылэ кай о бутярно лэ Иосифоско тай линэ тэ дэн дума лэса паша вудар лэ черэско:

20— Ашун, рай, — пхэндэ вонэ, — амэ авэнас кардэ екхвар тэ тинас хамос. 21Кала амэ тэрдилям тэ рятярас тай роспханлям э гонэ, саворо амэндар аракхля котэ пэско руп, ворта скати сас. Амэ андям кодыва руп палпалэ. 22Амэ андям пэса инке руп, соп тэ тинас хамос. Амэ на ганас, ко тунче стходя амаро руп палпалэ андэ гонэ.

23Вов пхэндя:

— Ся мишто, на даран. Мэ лэм тумаро руп. Кода тумаро Дэл, о Дэл тумарэ дадэско, дя тумэнди палпалэ кодыва руп андэ тумарэ гонэ.

Тунче о барэдэр бутярно андя лэ Симеонос каринг лэндэ. 24Вов андя лэ пхралэн андо чер кай о Иосифо, дя лэнди паи тэ халавэн э пэрнэ тай сулум лэ ослонэнди. 25Вонэ гэтосардэ лэ Иосифости э подаркуря, соп тэ дэн лэн, кала вов авэла андэ епаш дес, пала кода ке лэнди пхэндэ, со вонэ котэ бэшэна тэ хан. 26Кала о Иосифо авилятар черэ, вонэ подындярдэ лэсти э подаркуря тай тэлилэ лэсти жы каринг э пхув. 27Вов пушля пала лэнго састимо, тунче пхэндя:

— Ай и сар мишто котэ тумаро пхуро дад, пала саво тумэ пхэндэ манди? Вов жундо инке?

28Вонэ пхэндэ:

— Теро копэли, амаро дад, инке жундо тай зорало, — тай тэлилэ англа лэстэ, тэ сыкавэн пэстери патив лэсти.

29О Иосифо додикхля пэстерэ пхралэс лэ Вениаминос, пэстеря датерэ шавэс, тай пушля:

— Када тумаро о майцыкно пхрал, пала кастэ тумэ пхэнэнас манди? О Дэл тэ авэл тынгомэ каринг тутэ, мэрно шаво!

30Лэ Иосифоско ди сас най по тхан, кала вов дикхля пэстерэ пхралэс, вов йито жылятар тай родэлас тхан, кай тэ авэл екхжэно. Вов зажыля андэ пэско тхан андо чер тай котэ ашыля тэ ровэл. 31Тунче вов халадя о муй тай упалэ вижыля, ритярэлас пэс, тэ на ровэл, тай пхэндя:

— Подэн о хамос.

32Лэсти подинэ пэ екх скаминд, лэ пхралэнди пэ авэр скаминд, тай лэ египтянонэнди, савэ ханас лэса, кадя ж пэ пэско скаминд. Э египтянуря на хан екхтанэ лэ евреёнэнца, кода лэнди сас гряца. 33Лэ пхралэн стходэ тэ бэшэн англа лэстэ па пхуримос, лэ англунэстар жы каринг о майцыкно. Вонэ дикхэнас екх пэ екхэстэ тай дивуинаспэ. 34Лэнди подэнас о хамос пай мисяля лэ Иосифостар, лэ Вениаминости подэнас панчварэс майбут, сар аврэндэ. Вонэ ханас тай пэнас лэ Иосифоса.

Currently Selected:

Англунимос 43: СРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия пэ влахицко романи шыб