Lamentaciones 1
1
Sliquebal muc' ta ac'-me'inal
1Mu xa ono'ox cha'bel un, sts'ijlajan com stuc ma' ti jteclume, c'alal nojel to ox ti jnaclejetic yu'une.
Jun me'unal ants yilel ma' ti jteclume, c'alal ich'bil to ox ta muq'ue.
Sujbil yu'un ta tsots abtel ta j'ech'el ti cajal to ox sc'oplal ta stojol scotol ti yane.
2Ta smil sba ta oq'uel ti jujun ac'ubal ta x'ech'e, xbein no'ox ti ya'lel sat ta j'ech'ele.
Ta scotol ti c'u yepal xch'ayobil sjol xchi'uque, mi ja'uc junuc ta xtal patbatuc ti yo'ntone.#Sal 69.20; Jer 9.17-19; 13.17.
Paybat sc'oplal joybij ta yajcontra ti buch'utic lec xil sba xchi'uque.#Jer 30.13-14.
3Ti xyaquet tsots ilbajinele, ti tsots ta x'aq'ue abtejuque, ta xich' svocol tana ti Judá ti bu mosovinbil une.
Ti sbainoj to ox ta sventainel ti jteclumetic ta vo'nee, tana le' une, laj to c'op ma' ti ta xcux yo'ntone.
Ti jnutsvanejetique loc'obinvanic, j'ech'el mu xcoltavanic.
4Sts'ijlajan ta j'ech'el sbelel ti Sione, mi junuc xa oy buch'u ta xtal ta q'uin.
Sti'tac ti jteclume, sts'ijlajan ta j'ech'el, x'oq'uic xa ti paleetique, mu x'ech' svocol ta xa'i ti jva'lej tsebetique.
Stuc xa no'ox jech svocol ta xa'i ti Jerusalene.#Is 3.26; Jer 14.2.
5Tsalatic yu'un ti scontraique, abolaj yu'unic ta j'ech'el ti jti'o'ntonetique.
Tsots ac'bat svocolic yu'un Dios ta scoj ti mu albajuc ti smulique.
Bec'bil bat ti yalab xnich'nabic yu'un ti scontraique.
6Ch'ay, tub sc'oplal ti jun to ox yutsil sc'upilal scotol xnichimal ti Sione.
Ti banquilaletic yu'unique, c'ot ta stojolic ti co'ol s'elan te'tical chij ti mu xa sta ta sa'el xa ti sve'elique;
xcoxcun batel, snupoj ta be ta xc'ot ti jnutsuviletique.
7Ti jteclum Jerusalene, c'ajomal xa no'ox ta svules ta sjol sc'ac'alil ti stuc ts'ijil com ta at-o'ntone;
ta svules ta sjol ti mu albajuc to ox laj sta sc'ulejal ti ech' talel ti c'ac'ale;
ta svules ta sjol ti och ta c'abal yu'un yajcontra ti mu'yuc buch'u tal spojele.
Laj yich' labanel yu'un yajcontra ti c'alal stuc slilijemal busul com laj yilique.
8Yepal laj sa' smul ti Jerusalén ti xtun o ti bajbil c'ote.
Ti buch'u cajal sc'oplal laj ya'iic ta vo'nee, bajbil xa yu'unic tana le' une, yu'un jam xq'uexlalic yu'unic.
Jech o xal ta xoq'uita sba, nijil chimil joyijem batel ta q'uexlal.#Ez 16.35-37.
9Balal ta ic'ubal ti sc'u'e; mu'yuc laj snop ti c'usi xu' ta xc'ot ta stojole.
Mu ch'unbaj ti c'u s'elan tub ti sc'oplale; mu'yuc buch'u junuc ta xpatbat ti yo'ntone.
Q'uelo avil un, Dios, lic'ot ta yoc yu'unic ti jcontra ti stoyoj sbaique.
10Ti jcontrainvaneje laj yu'ninic sc'ulejal ti Jerusalene.#2 R 24.13; 25.13-17.
Ti lume laj yil ta sba ta satic ti xbitic no'ox ochel ta ch'ulna ti buch'u yan yajvalique,
ti avaloj mantal une, Dios, mu xu' ta x'ochic ta tsoblebal avu'une.
11X'oc' x'avanic scotol ti jnaclejetic yu'une, sa'ilan ti sve'el yuch'obique.
Laj sjelic ta ve'lil ma' ti yuni c'ulejalique yo' ta xcuxiic.
Q'uelo avil un, Dios, c'u s'elan lic'ot ta tsutsel, mu aq'uelojuc no'ox ti jvocole.
12¡A'yio ava'iic ti ta xaxanavic batel ta bee,
va'ano aba jliqueluc ta snopel mi xtuch'et ta xava'i jech c'u cha'al xtuch'et ta xca'i ti co'ntone, ti yepal xa ta xac'bun ti jvocole!
Laj jta jvocol yu'un Dios c'alal lic tiluc ti sc'ac'al yo'ntone.
13Ti Diose, ta toyol to, laj sten talel c'oc' ti laj slilin ti jbaquiltaque.
Laj yac' pets' ta be ti bu ta xi'ech'e, lisut ta jpat yu'un.
Sq'uel no'ox jipbil licom yu'un, oyun ta jvocol scotol c'ac'al.
14Laj xa yil ta sba ta sat Dios ma' ti jmule.
Ti xi s'elan jcuchoj yu'une, ol ta j'ech'el jech c'u cha'al yabtejeb ti vacax c'ot ta jtojole, ta xlaj yipal cu'un xchi'uc.
Ti Diose laj yac'un ta yoc ta sc'ob jnaclejetic ti mu stac' jtoy que ta stojolique.
15Nom to c'ot yu'un Dios ti tsatsal viniquetic ti jpatoj co'nton ti c'otemic ta cajpojvaneje.
Sbususet no'ox talel epal soldadoetic yu'un ti ta xtal stsacun yo' ta stsutsesic ta j'ech'el ti jvinictac ti mu sna' xi'ique.
Ti Diose laj xpech' ta teq'uel ti jva'lej queremetic yu'un ti Judae jech c'u cha'al ta xich' pits'el ta teq'uel ti uva yo' ta xloc' ti vinoe.#Is 63.3; Jl 3.13; Ap 14.20; 19.15.
16Ta xi'oc' yu'un ti va'i s'elan taje; xbein ta j'ech'el ti ya'lel jsat yu'une.
Mu'yuc xa buch'u junuc ta spatbun ti co'ntone; mi junuc oy buch'u ta xac'bun yip ti co'ntone.
Busul com jmoj xchi'uc slilijemal jteclum ti calab jnich'nabe; xjelav cuch yu'unic ti jcontrainvaneje, mu sta ti vu'uncutique.
17Xvocolet xa snuboj yoc sc'ob ti Sión ta sc'anel ti coltaele, le' une, mi junuc oy buch'u tal patbatuc ti yo'ntone.
Ti Diose laj yal mantal ti voliatuc yu'un scontra ti Jacobe, ti c'ot yu'unic ta j'ac'-lo'il-maxil ti Jerusalene.
18Laj spas ti c'usi oy stuq'uil ta xil ti Diose, yu'un laj jcontrainbe ti smantaltaque.
Ts'et-chiquintabeicun ava'iic, acotolic jteclumetic, tuc'ulano avilic yipal xc'uxul ta xca'i ti jvocole.
Ti jva'lej jquerem jtsebtaque chucbil pechbil xa bat yu'unic.
19Laj jc'anbeic ti scoltaicun ti buch'utic co'ol jol co'ntoncutic xchi'uque, le' une, laj spaybeicun jc'oplal.
Ti cajpaletaque, ti cajva'lejtaque, chamic ta jteclum ti xi s'elan c'ot ta stojolique:
yacal ta sa'el bu ta sta sve'elic yo' ta xcuxiic.
20Q'uelo avil, Dios, yan sba ti jvocol ta xca'ie, ta xmich' ti co'nton yu'un ta xca'ie.
Xtuch' xa co'nton ta xca'i yu'un yipal c'alal ta jvules ta jol ti toyobba li'ech'e.
Ti calab jnich'nabtaque, ta pat xocon na xa no'ox ch'ambilic ta be ta xich'ic milel ta espada.
Ti li' ta yut une, yacal ti chamel lajele.#Jer 4.19; 9.21.
21Ti jnaclejetique ta xa'iic ti xime'inaj oc' no'oxe; le' une, mi junuc ta xtal spatbun ti co'ntone.
Sna'ic scotol jcontratac jcuchoj lec ti jvocole; xmuyubajic xa ti jech c'ot ta jtojol avu'une.
C'otuc xa ta pasel avu'un sc'ac'alil ti c'u s'elan acaj'aloje, ti lamluc c'otuc ta stojolic avu'un jech c'u cha'al c'ot ta jtojole.
22Chajaluc c'otuc ta aba ta asat ti c'u yepal chopol laj xa spasique.
Jech xapasbeic ta stojol yu'un smulic jech c'u cha'al laj apas ta jtojole.
Ep xa li'oc', och xa xchamel ti co'nton ta xca'i une.
Currently Selected:
Lamentaciones 1: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000