Joel 1
1
Ti c'ulubetique ta stsutsesic ti ts'unubaletic ti xloc' x'ayane
1Ti c'op li'e, ja' jech s'elan c'oponat talel yu'un Dios ti Joel xnich'on ti Petuele.
2A'yio ava'iic lec li'e, moletic, acotolic xtoc jnaclejetic yu'un ti muc' ta lume.
¿Mi oy bu avilojic c'otem ta pasel jech c'u cha'al ta xavilic avie?
¿Mi yan to ti c'u s'elan laj yilic c'alal laj ech'icuc ti atot ame'ic ta vo'nee?
3Lo'iltabeic ya'i ti avalab anich'nabique yo' jech ta xlic slo'iltabeic ec ti yalab xnich'nabique;
jech ti stuquique ta xlic slo'iltabeic ya'iic ti buch'u ts'acal to chlaj voc'uc talele.
4Xi s'elan c'ot ta pasel c'alal laj slajes scotol ti c'ulubetique:#Dt 28.38; Jl 2.2-11; Am 4.9; 7.1.
ti bu to col comel jlomuque, ja' laj stsutsesic ta j'ech'el c'alal tal ti yane.
5Ti vo'oxuque, jyacubeletic, vuleso ach'ulelic;
lic oq'uitao ava'iic, j'uch'-vinoetic, yu'un ta xa xavich'ic pojbel ta ave ta ati'ic ti vinoe.
6Ti c'ulubetique, co'ol s'elan jvoc' soldadoetic ti ech'em xu' yu'unique, ti mu no'ox albajuc yepalique,
ti co'ol s'elan stanal yeic jech c'u cha'al ti leone,
ti co'ol s'elan sts'uts'opic jech c'u cha'al ti me' leone,#Ap 9.8.
laj svol ta stsutsesel ti muc' ta jteclum cu'une.
7Laj xa slilin ta stsutsesel ti j'uvatique, laj xa soquesic ta j'ech'el ti j'icuxtique.
Stuc svach'il com yu'unic ta j'ech'el, ja' to ti c'uxi taquichivan com yu'un ti sc'ob-c'obtaque.
8Ta xlic oc'uc, ta xlic slap at-o'ntonal c'u'il ti ta xcham slecom ti jun tseb ti c'alal stac'oj xa ox ti sjaq'uele.
9Ja' jech ta x'oq'uic ec ti paleetique, yu'un ti ta ch'ulnae,
ch'abal xa ti sat ts'unubiletique, ch'abal xa ti vino ta sventa ti matanaletic yu'un ti Diose.
10Ti osil banomile, jeche' sac mesan com; com ta me'inal ti banomile.
Ti trigoe ch'abal xa bu ta tael; laj xa taquijuc ti yaq'uiltac uvaetique,
laj xa nucultajuc ti olivo te'etique.
11Ti vo'oxuc ta xa'abtejic ta osil banomile, ti ta xats'unic ti uvaetique, me'inal oq'uitao abaic,
yu'un jeche' bat ti c'usitic laj ats'unique, mi jutebuc ta xatsobic ti trigoe xchi'uc ti jchop o ta trigoe.
12Tsuts xa ta taquijel ti uvaetique, tub xa sc'oplal ti icuxetique.
Taquij xa ta j'ech'el xtoc ti granada te'e, ti satinom xane, ti ste'el mantsanaetique, xchi'uc scotol ti te'etic ti oy ta osil banomile.
Ja' jech c'ot ta ch'ayel ti xmuyubajic no'ox scotol ti jnaclejetique.#Os 4.3; Am 4.6-9.
13Jech ti vo'oxuque, paleetic ti abainojic ta sq'uelel ti altare, lapic ti lajemal c'u'iletique, oq'uitao abaic yu'un yipal ti avocolique,
yu'un ta xch'ulna ti Dios avu'unique, ch'abal xa jutebuc ti sat ts'unubaletique,
ch'abal ti vino ti ta xich' aq'uel ta matanale.
14Tsobo ti jteclume, albeic ya'iic ti oy ictaej vaje.
Ac'o stsob sbaic talel ti moletique xchi'uc scotol ti jteclum ta xch'ulna ti Ajvalil ti ja' Dios yu'unique.
Ac'o c'opojicuc ti'inicuc ta stojol ti Diose.
15Mu xa ono'ox cha'bel un, nopaj xa talel sc'ac'alil yorail ti Diose.
Ta xvul ta loq'uel ti tsots vocole, ti ja' no'ox ta stsutsesvan ti ta xac' taluc ti Buch'u scotol xu' yu'une.#Is 13.6; Ez 30.2-3; Sof 1.14-18.
16Ta jba ta jsatic, laj quich'tic pojbel ti jve'eltique.
Laj sc'oplal ti xlaet no'ox ti o'ntonal ta xch'ulna ti Dios cu'untique.
17Ti ts'unubale chamolaj ta surcoal, yu'un ch'ay sts'unubal ti trigoe, soquemic xa ti yaviltaque.
18Yan no'ox sba jeltos snuq'uic ta x'oq'uic ti chon bolometique.
Jeche' ta x'ech' svocolic ti bu xcotetic ta sa'el yaxal ti vacaxe.
Ti chije yacal ta xchamic ta j'ech'el.
19Ta xi'oc' ta xi'avan ta atojol, Dios, yu'un ti momoletic ti oy ta sbajtical banomile xchi'uc ti te'etic ti oy ta osiltique,
ta xtaquij ta j'ech'el ti jech va'iem ti c'ac'ale.
20Ma'uc no'ox taje, yu'un ti te'tical chon bolometique ta x'oc' x'avanic ta atojol,
ja' ti taquij xa ta j'ech'el ti beo'etique,
ja' ti ta xtaquij ti yaxaltic ti jech va'iem ta j'ech'el ti c'ac'ale.#Am 7.4-5.
Currently Selected:
Joel 1: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000