1 Pedro 1
1
Ti Pedroe ta sts'iba batel svun ta stojol ti jch'unolajeletic ti buyuc no'ox tanijemique
1Vu'un Pedro, yajcholc'opun ti Jesucristoe. Ta jts'iba talel jvun ta stojolic ti buch'utic mu xa teyuc nacalic ta slumalique,#Stg 1.1. ti tanijemic batel ta naclej ta Pontoe, ta Galacia, ta Capadocia, ta Asia, xchi'uc ta Bitinia. 2Ti vo'oxuque t'ujbiloxuc yu'un ti Jtotic Dios jech c'u cha'al snopoj ono'ox ta vo'nee. Yu'un ta sventa ti Ch'ul Espíritue, ventainbil lac'otic yu'un yo' jech ta xapasic c'usi ta sc'an ti Diose, xchi'uc ti pocbil tusbiloxuc lac'otic ta sventa xch'ich'el ti Jesucristoe. Yepaluc ac'o sva'an sba ta atojolic, ac'o yac'boxuc slamajemal avo'ntonic.
Mu xtub ta o'ntonal ma' ti oy c'usi malabile
3Lequil c'optabiluc cu'untic ti Diose, Stot ti Cajvaltic Jesucristoe. Yu'un ta sventa ti mu no'ox albajuc ti xc'uxul yo'ntone, laj svoq'uesotic ta ach' ta sventa ti cham cha'cuxi ti Jesucristoe.#Jn 3.3-7; Ro 6.4-13; 1 P 1.22. Ti jech taje, ta xac' spatobil co'ntontic ti ta xquich'tic ti jcuxlejaltique, 4ti ta xc'ot ta pasel yu'un ti ta xac' avich'ic ti arextoic ti q'uejbil ta vinajel yu'un ti Diose, ti mu xc'a'e, ti mu xlaje, ti mu xnucultaj jech c'u cha'al ti nichime. 5Ti jech c'otem ta avo'ntonic ta xch'unel ti Diose, chabibiloxuc yu'un ta sventa ti smuc'ul stsatsale, yo' jech ta xataic acoltaelic, ti chapanbil xa yu'un ti ta xac' ta ilel ta slajebal c'ac'ale.
6Ta sventa ti jech taj une, xamuyubajic xa, ac'o mi oy bu xu' ta xc'ot ta atojolic jun chibuc c'ac'al ta xavich' ep avocolic. 7Ti jech c'otem ta avo'ntonic ta xch'unele, co'ol s'elan oro ti xi s'elan ta xc'ot ta atojolique: Tsots sc'oplal ta xich' q'uelel ta c'oc' yo' jech ta xvinaj ti c'u s'elane. Mi xcuch yu'un c'oc' ti c'u s'elan c'otem ta avo'ntonic ta xch'unele, jun yutsil, ja' mu sta sc'oplal ti oroe, yu'un sna' xlaj. C'alal jech ta xich' q'uelel ti c'u s'elan c'otem ta avo'ntonic ta xch'unele, xloc' venta, jun yutsil, ich'bil ta muc' ta xac'ot ti c'alal ta xvul ta loq'uel ti Jesucristoe.
8Ac'o mi mu'yuc laj avilic ti Jesucristoe, c'ux ta xava'iic. Ti jech xamuyubajic ta stojol c'alal mu'yuc avilojic avi tana le'e,#Jn 20.29. oy ta ave ati'ic ta yalel ti mu'yuc xa buch'u xtaun ta xava'iic ti jech xamuyubajique. 9Yu'un ja' svinajeb ta xatabeic batel spajeb ti spojel scolel ti ach'ulelic ti jech c'otem ta avo'ntonic ta xch'unele.
10Ti yutsil slequil yo'nton ti Dios ti laj avich'ic albel ava'iic ti sc'oplale, vo'ne laj sq'uelic talel, laj st'unic talel ti j'alc'opetique. 11Ti j'alc'opetique ac'bat sna'ic yu'un Espíritu yu'un ti Cristoe ti ta ono'ox xich' ti svocole, ta ts'acal to ta xich' ti slequilale. Ti stuquique laj yac'beic yipal ta st'unel xchi'uc c'usi c'ac'alil ta xc'ot ta pasel ti jech x'ac'bat sna'ic yu'un ti Ch'ul Espíritu ti oy ta stojolique. 12Ac'bat sna'ic yu'un Dios ti ma'uc yu'un stuquic ti coltael ta xalbeic sc'oplale, ja' sventa alequilalic. Avi tana une, c'ot xa ta pasel, laj xa avich'ic albel ti lequil ach' c'op yu'un ti jcholc'opetic ti ac'bat stsatsalic yu'un ti Ch'ul Espíritu ti liquem talel ta vinajele. Ti jech taje, yo'ntonuc sc'an sq'uelic ox ya'iic ti ánjeletique.
Ti Diose laj yic'otic ta spasel ti c'usi leque
13Jech o xal un, tojobuc ti snopbenal avu'unique yo' chapaloxuc ta spasel ti c'usi leque. J'ech'eluc pato avo'ntonic yu'un ti oy c'usi ta xa'ac'batic ta sventa slequil yutsil yo'nton Dios ti c'alal ta xtal ti Jesucristoe. 14Ti jech jch'unej mantal nich'nabiloxuque, mu xa me jechuc staoj yav ta q'uelel acuxlejalic jech c'u cha'al ta vo'ne ti c'alal mu'yuc to ox avojtiquinojic ti Diose. 15Aq'uic ta q'uelel ti lecuc ti acuxlejalique, yu'un ti Buch'u laj yic'oxuc ta stojole, ja' Ch'ul Dios. 16Yu'un xi ta xal ti ch'ul c'ope: “Mu xatic' abaic ta spasel ti c'usi chopole, yu'un ti vu'une ja' Ch'ul Diosun.”#Lv 11.44-45; 19.2.
17“Tot”, mi xavutic ti Dios ti j'ech'el mu jeltosuc ta xchapan ti c'u j'elantic ta jujun tale, xi'taic unbi ti c'u sjalil li' cuxuloxuc ta banomile. 18Yu'un ti Diose laj scoltaoxuc loq'uel talel ti bu mu xtun ti acuxlejalic ti laj yac'boxuc comel ti amolmuc'totique. Xana'ic lec, ti stojol ti acoltaelique, ma'uc laj yich' tojel ta oro ta plata ti sna' xlaje. 19Yu'un ja' ta sventa ta yutsil xch'ul ch'ich'el ti Cristo ti laj yich' aq'uel ta matanal jech c'u cha'al jcot uni chij ti mu'yuc yic'obale, ti mu'yuc jutebuc xchopolale. 20Ti jech taje, c'alal mu'yuc to ox meltsajem ti banomile, jech ono'ox ac'bil talel ti Cristoe, ti ja' to laj yac' sba ta ilel c'alal slajebtic xa batel ti c'ac'ale, ti ja' sventa alequilalique. 21Ta sventa ti Cristoe, teq'uel c'ot ta avo'ntonic ti Dios ti laj xcha'cuxes c'alal cham ti Jesucristoe, xchi'uc ti laj yac'be yich' ti slequilal yutsilale. Jech o xal ti vo'oxuc une, teq'uel c'ot ta avo'ntonic, xchi'uc amalaojic ti oy c'usi ta xa'ac'batic yu'un ti Diose.
22Avi tana ti jech tac'al c'ot ta avo'ntonic ta xch'unel ti lequil ach' c'op ti bu ja' melele, coltabiloxuc yu'un ti Ch'ul Espíritu ti jech mesbil pocbil xa lac'otic, yo' jech c'ux ta xava'iic ti jch'unolajeletique. Yu'un tsots sc'oplal, c'uxuc ta xava'i abaic ta sjunul avo'ntonic, ta sjunul avipic. 23Yu'un ti vo'oxuque, lavoq'uic ta ach', ma'uc xa ta sventa ti atot ame'ic ti sna' xcham xlaje, yu'un lavoq'uic ta ach' ta sventa ti sc'op Diose, ti j'ech'el o staoj yav cuxul sbatel osile.#Jn 3.3-7; Stg 1.18; 1 P 1.3. 24Yu'un ti ch'ul c'ope xi ta xale:
“Scotol sts'unobal ti jnaclejetic ta banomile, co'ol s'elan momol.
Scotol ti yutsil slequilalique, co'ol s'elan nich momol.
Ti momole ta xtaquij.
Ti xniche ta xlilij yalel ta lum.
25Ja'uc ti sc'op Diose
j'ech'el staoj yav cuxul sbatel osil.”#Is 40.6-8.
Taje, ja' sc'oplal ti colebal lequil ach' c'op ti laj avich'ic albele.
Currently Selected:
1 Pedro 1: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000