Kolosi 1
1
E Paulus a Apostolo ne Isu Kristo
1Iau e Paulus. A Vure i vulaki iau ge iau a apostolo ne Isu Kristo. Maria e Timoti miri herea a raukea iea. 2A here lakene mua e huriki a tara na Vure o Kolosi. A Vure i ru herehere mua, mu madoko turane Kristo. A Vure, e tamane hita, ge rata a naro kamumu ne mua, ge habi a nivalemu ne mua.
3 #
Epe 1:15-16
Maria e Timoti miri vasileki vakaroro ne mua, miri kavurikea a Vure, e Tamane Bakovi Dagi ne hita, e Isu Kristo, 4a vuhuna miri longo mua mu luhoi hatekea e Isu Kristo, mu ngaru e huriki a tara na Vure. 5#Epe 1:13; 1Pe 1:4Mu rata mavonga, a vuhuna mu pasimata na tahuna e Isu ge bole mua, mu gu made turana vakaroro na hunu. Mu vakatubu ni pasimata mavonga na tahuna mu longo a ngava muholi, a Velenga Kamumu. 6Ra Velenga Kamumu ne Isu Kristo ni tovo e huriki vona na tanga lobo na malala, lakea i rata ranga e huriki ri pulo a vilone ria. I manga kunana a naro i bele ne mua na tahuna mu longo muga a Velenga Kamumu, mu matakilalea a rabu muholi na nidodo na Vure. 7#Kol 4:12; Pmn 23E Epapras a viri i tovo mua vona a Velenga Kamumu. Miri ngaru hatekea a bakovi iea. Ia tara a vora ne Kristo, i tuhori maria. I rata kamumu a leho lobo e Kristo i habi vona. 8I vakalongo maria vona mu longototoa a Hanuna Vure, mu ngaru e huriki lobo.
E Paulus i Vasileki
9 #
Epe 1:16-17
Na tahuna miri longo a nuverei ne mua, miri vasileki vakaroro ne mua. Miri nana vakaroro a Vure ge rata mua, mu gu gao na maki na Vure, ge habi a lohokanga ne mua, mu gu lohoka na ningaru vona. 10Miri vasileki mavonga, a vuhuna miri ngaru mu gu laho na naro e Bakovi Dagi i ngaru mu gu laho vona, ge vivi ne mua, a leho kamumu ne mua ge tahoka a kanena, mu gu lohoka kamumu tabu na Vure. 11#Epe 1:19; 3:16A Vure ge vakatora hateka mua na nitora dagi lobo vona, lakea i uka ma mu gu tuha malulu, mu gu hatenono, 12#Epe 1:11,18mu gu vivi ni kavurikea e Tamane hita, ra i rata mua mu kara ni bole a tabeke na maka maki i kisi puru pali meli na hunu, ne huriki a bakovi a ngatavine vona. 13#Luk 22:53; Epe 2:2A Vure i korimule hita na nitora ne Satan, i bole hita lakea na harikianga ne Tuna a hatena. 14#Epe 1:7Ia a viri i korimule hita, i puga vuroki a naro hale ne hita.
A Naro ne Kristo
15 #
Ion 1:18; 2Ko 4:4 A Vure, i uka tara viri ge masia. Pali e Tuna i manga kunana a Vure, i vakasiri hita na Vure. E Tuna a Tabua i dagi hateka na maki lobo ni ratarike, 16a vuhuna na limane Kristo kunana, a Vure i ratarike a maki lobo. I ratarike a maka maki na malala, a maka maki na hunu. I ratarike a maka maki si matai, a maka maki i uka ma si matai. I ratarike e huriki a hanitu, e huriki a agelo ri tahoka a nitora dagi turana maka maki ranga ri tahoka a nitora, ri matakari koea na malala. A Vure i rata na limane Kristo a maki lobo ge ne vone Kristo. 17#Ion 1:1; 8:58Na tahuna a maka maki i uka ma ni ratarike ma, e Isu Kristo i made muga pali. Na nitora vona, a maki lobo i tabuli kamumu. 18#Apo 26:23; Epe 1:22-23; Kap 1:5E Kristo i muga ne huriki a tara na Vure. Ia a vuhuna maki lobo, ia a viri i muga i pesi rike mule na matenga, ge muga na maki lobo, 19#Kol 2:9a vuhuna a Vure i ngaru a rabuna lobo ge tabuli vona. 20#Epe 1:10; 2:16Na nimatene Kristo na kai tavalavala, a Vure i rata a maki lobo koea na malala, meli na hunu, ri made kamumu tabu turana na nivalemu.
21 #
Rom 5:10; Epe 2:12 Muga mu marava basi na Vure. Na niluhoi ne mua, mua a pile na Vure. A vilone mua i hale. 22#Rom 5:10; Epe 5:27Na nimatena, e Kristo i rata mua ngane mu made turana Vure na nivalemu. I rata mavonga a vuhuna i ngaru mu gu valai tabukoi na Vure, mu gu made malamala na matana, i uka ma ge pelekado mua. 23A maka ngava nga i muholi na tahuna mu nugutata, mu pesi tora na niluhoi ne mua, ma ge turari mua a maki tara bara mu vorotaparaki a maki si pasimata ni matai na Velenga Kamumu. Iau e Paulus a vora ni vakalongo a Velenga Kamumu iea, ra mu longoa pali, ni vakalongo lae ne huriki lobo na malala.
E Paulus i Tuhori e Huriki a Kolosi
24Ngane a vivi, a vuhuna a bole a nimadihi ga kori mua, ga tuhori mua e huriki a tara na Vure, mua a kakaine Kristo. A nimadihi a bole na kakaigu na rane Kristo, i uka ma ge lobo malaviriri. Bara i tabana. 25#Epe 3:2,7-8A Vure i vulaki iau, ge iau a vora ni vakalongo a Velenga Kamumu ne mua, mu gu lohoka kamumu vona. 26#Rom 16:25-26; Epe 3:5,9Muga, a ngava iea i kapiloho ne huriki e tubune hita, pali ngane ni pukatala ne huriki a tara na Vure, ni vakalohoka ria vona. 27Na ningaru vona kunana, a Vure i puka talea a niluhoi kapiloho vona ne ria. I ngaru ri gi lohoka vona a niluhoi kapiloho. Ra niluhoi kapiloho vona i kamumu hateka, i habi a nipara dagi ne huriki i uka ma ria a Iuda. A niluhoi kapiloho i maea: a Vure i ngaru e Kristo ge made pololilo ne mua e huriki i uka ma mua a Iuda. Ngane mu malamala bara mu pasimata vona a Vure ge bole dili mua na hunu.
28Miri vakalongo mua vona a Velenga Kamumu ne Isu Kristo. Miri tovo e huriki na lohokanga lobo, miri taki ria ri gi muri mai a nitana Vure, a vuhuna miri ngaru e huriki lobo ri gi malamala, ri gi lakea na Vure. Na tahuna ri gi bele na Vure, miri ngaru ria ri gi bele manga e Kristo. 29#Epe 3:7,20; Pili 4:13Iau a leho hateka i valai i harena mona. Ra nitora na Vure i tabuli nau, a habi loboa na leho iea.
Currently Selected:
Kolosi 1: bnp
Highlight
Share
Copy
Want to have your highlights saved across all your devices? Sign up or sign in
© 2011 Wycliffe Bible Translators, Inc. All rights reserved.