Yesaya 1

1 # 2 Mam 15.1-7; 2 Epi 26.1-23; 2 Mam 15.32-38; 2 Epi 27.1-9; 2 Mam 16.1-20; 2 Epi 28.1-27; 2 Mam 18.1—20.21; 2 Epi 29.1—32.33 Masomphenya a Yesaya mwaana a Amozi ayo oonilleeye oollota dda Yuda ni Yerusalemu mu enthawi ya olamulello wa Uziya, Yotamu, Ahazi ni Hezekiya, mamwene a o Yuda.

Mulluku anaahumullulla athwaaye

2Apwiya yaallota wi, “We oddullu, ngiiwa nave we ellapo yavatthi, apella maaru, mi Apwiya kinimallota. Kahaayara anamwani navettho kahaallella koma aakiwukila. 3Eng'ombe ennamudduwella mwaneena nave bulu annadduwella nko pwinnya anamuchiheeyewo koma Israele khanadduwella. Athwaaka kheniiwa naari vang'ono.”

4We ootulli, mutundu wa athu oochimwa, athu oollemelliwa ni ddoonanara. Muyariwe ovenyera wa athu aweera ddoonanara, anamwani ookeraattheya mu ddoonanara. Mohaahiya Apwiya, moomuvevulla Aweella a Israele, moomureya etulli. 5Ethiyo munaavirellelle ollakiwa ni ohihiya owukila ophiyera niini? Arive muthu muru onimamvoreya nave murimaaye woofooka. 6Ovenyera onnyalloni ophiyera omuruni khaviivo vaphaama koma viri marudda, etthuku ni makhwata makitthi. Makhwateene ttoohihuwiwa, oohimakiwa ni oohihelliwa makhura.

7Ellapwaanyu yootthattuwa ntepe nave mizinda ddanyu ddohoosiwa ni munllo. Alleto ahaakha ellapwaanyu ni woononga erive ello moonaka. 8Mwaana aamutthiyana Ziyoni ahanlle yeekha wonanko musasa wa oowehera emata yampesa, wonanko musasa mu emata yamihawa, wonankottho muzinda wowaapheelliwa ni ekhoto. 9#Gen 19.24; Aro 9.29Apwiya Amasiva Mattheene yahinihiyalleke amoddahi ooyeva neerotthollowa wonanko Sodomu ni Gomora.

10Vano nyu oolamulella a o Sodomu, iwani mawu a Apwiya. Nyu a o Gomora, apellani maaru nnddo Mullukwaahu anuuhuddiheeyeni. 11#Amo 5.21,22Apwiya enallota wi, “Ethiyo mi kinnapwatha waata wa mikutho ddanyunnddo? Ddookikholla mikutho ddooshellelliha dda anankhoro ankhosa ni dda makhura a enama ddooneneva. Nginapaallattho nikhame na anankhoro a eng'ombe, na anamwanankhosa ni na anankhoro a epuri. 12Ethiyo ttaani anuulamulani wi muweekena ddenndda vamiitthoni vaka? Ethiyo ttaani anuurumani wi munyingallenyingalleke mathato a enyumbaaka? 13Muhiweenattho mikutho ddoohikhalla ni mutteko vawi naari mwiisi wa lubani* onnakinanara. Ngivillellana mitthukumano ddanyu ddamavekello apaalle Ehakallallo dda Wooneya wa Mweeri ni dda mallapwaanyu a Sabata. Ngivillella ni mitthukumano ddoonanarihiwa ni machimo. 14Miyaano kinniitana ni ehakallallo ddanyu dda wooneya wa mweeri ni mallapwaanyu aweella. Ddiri wonanko katundu oollemella nave koovillella kootopa. 15Mwaatukhullellaka muddullu mattaanyu voovekellani, miyaano kineerewiipitthiha ekhovaaka. Naari mwaanjerere mavekellwaanyu mwawiidde, ngipwathawo kaambiiwa mattaanyu yooddalla ni nikhame. 16Hapani, ddeelliheni nyookha nave venyihanivoni vamiitthoni vaka mitteko ddanyu ddoonanara. Ddawoona, hiyani weera ddoonanara 17nave hudderani weera ddaphaama. Ashaashani echilungamo, akavihereni oopaniwa, atetezeni akhwaadduni ni owiimellella vamullatuni anaamukhwelle.”

18Apwiya enallota wi, “Hankoni vano nillote mullatwaanyu vawi naari machimwaanyu eri oofiiresesa, eneereweella mbee,#1.18 eneereweella mbee: apaalle onaganiza wi eneereweellesesa? naari efiiralle wonanko nikhame, eneereweella wonanko nthoche.#1.18 eneereweella wonanko nthoche: apaalle onaganiza wi eneereweella wonanko marallalla? 19Mwaarimi mukhonzekille okiiwellella muneerocha ddaphaama va ellapo yavatthi. 20Koma mwakhoota nave mwawukila, muneerewiiphiwa ni nsupada. Mi Apwiya koollota.”

Muzinda woochimwa

21Ngoonani muzinda olle khalle waari woororomelleya ni woolungama koma vano oneera ddooraruwa. Muzinda olle khalle waari ni athu oolungama koma vano wooddalla ni athu oowiipha akhwiiwa. 22We Yerusalemu, waari wonanko siliva koma vano wootthattuwa oohikhalla ni mutteko. Waari wonanko vinyo aphaama koma vano tti wonanko vinyo oottakanyihera ni maaddi. 23Oohoollellaawo ennawukila nave enniiwanana ni allupaawiiya. Arive muthu annaakhella ddamukaphwani nave annathamakella emphaso. Khanaateteza akhwaadduni nave khanapwatha millatu dda anaamukhwelle.

24Sika Apwiya Mulluku Amasiva Mattheene, Amasiva a Israele, enallota wi, “We ootulli, oollipana ni miyaano kineerewaatthollosa, adanaaka kineerewaahokollosella ddoonanara. 25Kineerotukhulla muwonwaaka wi killipane ni weyaano. Kineeroweeka machimwaawo ni waahuwa wonanko enahuwelliiwa murawa. 26Kineerewaakeraatthihattho aweeruzaawo ni attekweenaawo wonanko khalle. Attekweenaawottho. Vatulli viwa we oneeroromolliwa muzinda woororomelleya ni woolungama.”

27Apwiya tti oolungama, eneeromoopolla Ziyoni ni arive muthu oolapa m'muzindanimmo. 28Koma oowukila ni oochimwa enaawoonongelle nimodda. Athu owaahiya Apwiya eneerotthollosiwa.

29Muneerowulliwa muru ni miteekho dda muthundu ni emata ddoopatuleya nnddo mwatthoollilleenyu wi mullapellekewo moohakallalla. 30Vawi munaakhalle wonanko muteekho wa muthundu woonyaalla makukhu apaalle emata yoohikhalla ni maaddi. 31Athu amasiva enaakhalle wonanko manasi awumma nave mitteko ddiwa wonanko munllo. Sika athwaayo enaakharelle nimodda ni mitteko ddiwa, oohikhallavo mmodda oowora waathiimihella.

Currently Selected:

Yesaya 1: MW2019

Highlight

Copy