Gálatas 6
6
Hepixkajyawaka Piranapni
1Cristo tshinanu nmoletanune, satu yineru pupjexini, hixa Hoyakalu Hiwejikaluru munanhatshinhi hepixanru wan-hixatshri, pupjetatshri ruhlewaxyawakapa. Hi heyikanru wan-hixatshri. Hix-nanuko hexinwa, hma yohnixikowakanupa wane pixka hma mixyawakanupa.
2Hepixkakanu salewnaluya. Wan-hixinipa Cristo yokanre psoluka kamhatshinetkahi.
3Klu tshinanu satu yineru hijhakaluru rikahwajinwa, maka hike, wale nanwaka yokwijexnawa.
4Hiyáhoni satkaka hitakyahok-kamrurexinwa, kihleru rixini hkamrure waneya rumuwata. Hi pimrine kamrure tshinanu rumuwatanu seyni waleko hkamrure tsonu tshinanupka.
5Klu tshinanu satkaka yineru waleko hwunru hislahini.
Rutakler-potuko Ramyawaka Yineru Piranapni
6Ptowru Hoyakalu pirana hasrukkalune hijhalu ptowru kihleru hepixlewatatshri rapijyawakluna Hoyakalu tokanu rasrukjerna.
7Klunerukta rutakanu yineru wale potuko ramanu. Hi hyokwijexinwa. Hi yokwitkalurni Hoyakalu.
8Klu tshinanu himane halujyawaka hitakatshri, himane halujyawaka tshinanu hipuktshi ramanu. Seyni Hoyakalu Hiwejikaluru halujyawaka hitakatshri, hiweklu hikeklu hohne mnikawnakatu ramanu.
9Hi wamanutanu kihleru wkamhiywaka. Klu tshinanu wma muchotkanuklunuplu wkamhanru, rapokpapkoluxinipa kihleru wamanu.
10Hiyáhoni ptowru katako kihleru wixinwa ptowru neruko tshinanupa. Halikak-potu wane wixanna halixlu tshinanu wmoletanune.
Paulo Haliklewaxyawaka Hiyrun-koxa Ruykolewaxyawaka Piranapni
11Hetanro tsro yonha potuko nomyoymako nyonanwakaxyahi!
12Wanna yine, mantshi himuwlerucha tsonu halukatshinni, wanna jiprojhapsojitekjixhi. Wan-rixjetna klu tshinanu hi raluka salewnaletna, Cristo hipnale cruz-ya pirana mukolujyawakanupna.
13Klu tshinanu hi jiprojhikatshrikwa hihle homkahretlu Moisés yonreru. Seyni wanepnawaka ralukluna hixa jiprojhiynawakwa, ralixkowaxinrimkapna hjiprojhiynawakwa tshinanu.
14Seyni hita hikeklu nalixkowatanu seyni Wutsrukate Jesus Cristo cruz rupniywaka pirana tsonu nmunanhanu. Klu tshinanu cruz tshinanu ptowru potuka xye tshijne hajeru halukleru hatatjewa rupnatka hitayma. Hiyrunu hit-koxa hipnatshri pixka nixa ptowru potuko xye tshijne hajeru halukleru tshinanuya.
15Klu tshinanu Cristo Jesus-yma jiprojhalu hike repixa, hiyrun-koxa hi mjiprojhikatukwa yineru repixa. Hijhakalur-potni yineru herotexikatshriwa halikaka.
16Ptowru yineruko xye towutlu homkahitatshripa hapnanuhchinikanutatshinepni, hetwamonutkalunepni. Xye nanjita wanna tshinanu hiyrunu ptowruneka Hoyakalunerune tshinan-koxa.
17Xawakni pnut-patka hike xako kojwakanno. Klu tshinanu noptsholemta Wutsrukate Jesus himaxikolekakni.
18Cristo tshinanu nmoletanune, nanjitlu Wutsrukate Jesus Cristo hihlenu yoptochaluru hixa hiwejinriyma rawyawakapa. Seyoka.
Currently Selected:
Gálatas 6: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
