2 Coríntios 1
1
1Hita Paulo-no nuretkalurno. Hoyakalu halujyawaka tshinanu Jesus Cristo nuretno. Nyonata hixa tshinanu, Timóteo wimole Cristo tshinanuyma. Twu wyonata Cristo halixatshine hapatjetatshine Hoyakalunune tshinanu Corinto poktshi hajene tshinanu hiyrun-koxa ptowruneka Hoyakalu kotspalatanune Grécia tshijne psoluka hajene tshinanu.
2Hoyakalu henekachale hihlenu yoptotatshinephi. Hiyrun-koxa kihle hchinikanurunephi Wuru Hoyakaluya hiyrun-koxa Tsru Hixikatshriwa Jesus Cristo henekanwu.
Paulo Himalwuxyawaklu Hoyakalu Piranapni
3Himalwutkalurni Wutsrukate Jesus Cristo hiru, royakalute kchinikanur-potukni Hirtshi. Waleni Hoyakalu ptowru neruka hapnanuhchinikankakatshri.
4Wepixjerni Hoyakalu ptowru potuko wsalewnale tshinanu. Repixwu hiyáhoni hix-koxa himukata hepixletna pimrine hixa pixka hixa salewnaletatshine.
5Hixa salewna Cristo salewnale pixka. Hiyáhoni Cristo tshinan-koxa wukchiklu wepixikolu tsru potuko.
6Wsalewniniklunu hixa wepixyawaka hiyrun-koxa hixa hiwejyawaka tshinanupa wsalewna. Hixa wepixkoklunu hix-koxa hepixko hiyrun-koxa hyoptotanru hakot-hichinikanuwlexyawakapa salewnalu hakoxyawakapa hixa pixka salewnalu wakota.
7Wmunanhahi hixa Hoyakalu hkahwakjexyawaka. Klu tshinanu wimatlu hixa hixayma hsalewniywaka tshinanu hix-koxa hepixka Hoyakaluya hixa pixka hixka.
8Cristo tshinanu nmoletanune, waluk-himatkakletanhi wsalewnale pirana Ásia tshijne wwakanaxini. Salewaktshi tsru potuko weta. Hi hetkomka pnute salewaktshi wakotannatka haté wkahwaklu waneko wupniywakanatka.
9Wkahwaklu hatatjewa hipuktshi wunkaklexika. Seyni xye ptowruka hakanha hixa rasrujyawaka wma munanhiynawakanupwa hixa nanwaka seyni Hoyakalu halikaka wmunanhanu. Waleni hipnatshine hiwekkakatshri.
10Hoyakalu salewaktshi hkochpajyawu. Hiyrun-koxa hkochpakanwu ptowru hixatshri xye pixkalutu hipuktshi nwaka haniklewatatshri hamlenu tsrur-potuko hkochpajinwu. Hiyrun-koxa wmunanhanru Hoyakalu, rixa hepixlejekanaxyawakwu pixka hi rutuka jhamlewaka kochpaklexyawu.
11Hix-koxa hepixwu hanjihohneruya. Hiyáhoni hixolune hixa wanjihohneyehitjene tshinanu wepixko. Hoyakalu hihlehchinikanutanwu. Hiyáhoni hixolune yine poyahnutanhi wepixikol-tshinanu.
Paulo Corinto Poktshi Haluka Yalexyawaka Piranapni
12Xyekni walixkoxnawakwa, hi wkojwakahchinikanuta wixjexyawaka tshinanu klu tshinanu wekhithi wixa hiweklexyawaka pixka. Phujewak-potuko wixa kamhaletanru ptowruko hike weyawlu wunkakhi, Hoyakalu tshinanu. Hi yine himatkalnu tshinanni seyni Hoyakalu hepixle tshinanuya.
13Klu tshinanu wyonre pirana, hixa tshinanu, hixa himathexyawaka tsonu, hiyrun-koxa hixa himatjemyawaka pirana tsonu wyonanwakathi. Nkahwaklu pa hohne hixa himukata himatjemlepotutlu.
14Hixa himatjemle hi psolukawani hiyáhoni Wutsrukate Jesus hapojini hohne hixa halixkowyehitanwu waneko pixka wixa halixkowleyehitanhi hixa.
15Xye nmunanhale tshinanu, xye pirana nimaxinixka hiyáhoni mitshikananhapka hixa nwaka naluka yaleta waneypakni hepi kata rixinri hpoyikowatanu hepi kata wane napkapyawaka tshinanupa.
16Klu tshinanu Macedônia tshijne nyiywaka nuchinikanreta hix-yehi nyapamxyawakapa. Waneya Macedônia nuchpajinpatka hix-yehi nyapamtanutnaka. Wane nixinipa himukata hepixletkamkano hepixno Judeia tshijne nyiywakapa.
17Hiyáhoni wane nixahchinikanuxini hixlahe kahwaklu wane ntshinachata? Ho wane nixahchinikanuxini xye tshijne hchinikanu pixkalhe nixahchinikanuchata? Hixlahe kahwakno hehe ho hike tshinachatatshrino?
18Hoyakalu hiwaka halikakalutu nkochtshekanu, nunkajyapiranhi hi wane wtshinhi wale papkolutuko hehe wtshinhi howukchini hike wtshinhi.
19Klu tshinanu Hoyakalu whene Jesus Cristo, hix-yehi hinkakletpiranaxika. Silas, Timóteo hiyrun-koxa hita Jesus Cristo pirana wunkakle payiywakalutni hi hehe, hike hi rixa. Seyni halikaka Hoyakalu tshinreni “hehe”.
20Klu tshinanu ptowruko Hoyakalu hinkajyapiranwu “hehe” tshinikatshriwa. “Wane pixanu Hoyakalu” wtshina Jesus Cristo tshinanu, Hoyakalu himalwuxikowaka tshinanu.
21Klu tshinanu Cristo tshinanu wpoyehitahchinikanutjeru waleni Hoyakalu. Hixayma hpoyehitahchinikankakwu hiyrun-koxa hkotspalatwu walenuko wixyawakapa.
22Hoyakalu himaxikolenwu rekhixyawaklu Hoyakalununetkawu. Hoyakalu henekwu waleko Hiwejikaluru waji rawyawakapa, Hoyakalu Hiwejikaluru psojite renekhapkatwu rimaxikowaka pa hohne wiwekkakko psoluyaka.
23Hoyakalu hiwaka nkochtsheka ruphujexyawakaplu nohchinikanu, wale honra himatahchinikanutno. Hixa hma salewnahchinikanuxyawakanupa tshinanu hi Corinto poktshi nyapamtawa hiyrunukotnaka.
24Hi hixa halixle pirana towutatshinwu wikahwajnawa seyni halikaka hixa poyikowle hepixatshinwu. Klu tshinanu hixa halixle tshinanu tsonu hpoyehiwahchinikanuta.
Currently Selected:
2 Coríntios 1: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
