1 Coríntios 16
16
Judeia Hajene Tshinanu Hapatjetkaluro Tiyiro Piranapni
1Xawaknipa hapatjetkaluro tiyiro Jesus halixatshine potukalune Judeia tshijne hajene tshinanu pirana. Cristo halixatshine hapatjetatshin-yehkaka Galácia tshijne hajene nixakjixyawaka pixka potuko nixakjixhi.
2Ptowru domingo hohne hkanipretanru tiyiro psoji waneya himretanru. Satkaka yineru rumukata hikchiklexyawaka pso tiyiro rutakanu. Wan-hixinpatka hi nujhalu tiyiro napatjexyawakpatka hita hix-yehi napojinpatka.
3Wane napojinpatka nyokanatanna hixa nuretanunetka Jerusalém poktshi nwaka hyiywakapna tiyiro henekachluro hixa henekachale ranijyawakapna. Yonawahlo koxa nyokanatanu kihle yoptole rixikowakapna pirana.
4Hike mimaletkanuklunupno wane nyanu, hitaymapakna.
Paulo Corinto Poktshi Hyapiraxyawaka Piranapni
5Macedônia tshijne nali yaplemxinpatka hix-yehi nyanutka. Klu tshinanu Macedônia nyapamtanu.
6Pa katako hix-hohne hix-yehi nwanu. Pa katako hinapuklu psoluka niknokakanu hix-yehiya. Hiyáhoni wane nixini hetko hixa himukata hepixletanno nyinipa.
7Klu tshinanu hi naluk-hiknohachalemtanhi. Tsru Hixikatshriwa Hoyakalu hitshixinipno nkahwaka hix-hohne nimwanhi.
8Haté Pentecostes hohne tsonu hewi Éfeso poktshi nwanutka.
9Klu tshinanu nukchiklu hewi híxona yine Hoyakalu pirana halukatshine. Numukata hinkaklewleta yahmaklu híxona nkamnitjene.
Timóteo Hiyrun-koxa Apolo Piranapni
10Timóteo hix-yehi rapojinipa kihle yoptole hixanru. Klu tshinanu Hoyakalu kamrure hkamhajeta hita pixka.
11Hike xako heyikanru. Seyni halikaka hepixanru hyiywakaplu hita nwaka kihle hchinikanuruko. Klu tshinanu nkahwaka hita nwaka hsatojinpatka pimrine Cristo tshinanu hmoletanuneyma hsatokanutka.
12Xawaknipa wimole Apolo Cristo tshinanu pirana, hixo kata nanjitlu Apolo hix-yehi hyiywakapa pimrine hmoletanune Cristo tshinanuyma. Seyni xawakni potuko hi raluka wane yaletawa. Hiklukta rumukatanu wane hyanu.
Paulo Hiykolewle Piranapni
13Hi himnanhinwa. Poyehi halixlephi. Hixko hchinikanurunephi. Hixkolunephi.
14Ptowru potuko hkamhini, hichinikkakanu.
Estéfanas, Fortunato, Acaico Tshinkalune Piranapni
15Hixa himatna Estéfanas hiyrun-koxa himolene. Wanna honukla mitshikananu Cristo halixatshine Grécia tshijneya hiyrun-koxa renejnawana repixyawakna Hoyakalu kotspalatanune. Hiyáhoni Cristo tshinanu nmoletanune, nanjithi
16homkahixyawakapna nyi pixkalune hiyrun-koxa wanna ptowruneka repixjene wannayma kamrurewatatshine hchinikanu homkahitanu.
17Numuwata Estéfanas, Fortunato, Acaico tshinkalune hapojyawaka tshinanu klu tshinanu nyi kamhiyno hixa mumukata kamhaletanutu.
18Nyi hpoyikowkaknona hiyrun-koxa nimata hix-koxa hpoyikotna. Nyi pixkalunekni kihleru wuchinikanrexyawakna.
Haliklewlu Piranapni
19Cristo halixatshine hapatjetatshine xkehkaka Ásia tshijne hajene halikhi. Áquila hiyrunu Priscila tshinkalune hiyrun-koxa Cristo halixatshine wannapji hapatjexikatshine halikhi Cristo hiwakaya.
20Ptowruneka hewi hajene moletkakatshine pejnu Cristo hiwaka tshinanu ralikanwakathina. Halikkakanu hixkakluko hamluruyma Cristo hiwakaya.
21Xye nyonata nomyoyma potuko. Hitni Paulo-no halikhi.
22Katukta hi hamotanru Wutsrukate Cristo, hiknokalurupni hixa tskalaya. Wutsrukate Cristo, punanu.
23Nanjitlu Wutsrukate Jesus henekachale hihlenu hixa tshinanupa.
24Nuchinikhohnekanathi hixa ptowruneka Cristo Jesus hiwaka tshinanu.
Currently Selected:
1 Coríntios 16: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
