Filemón 1
1
So Pablo ỹiriñi aso lelaata tai'a nqai'en so Filemón
1Ỹim Pablo, ỹim ncoñiiteguesec ma' sasouetapigui so Cristo Jesús. Ỹim chaqai ñi Timoteo selata qami' ana ilaata, qami' qanauochaxaua qarqaỹa Filemón ma' qami' qarotaua queda qaro'ueenataxanaxac, 2chaqai quená'maq mashic icoñiguit da na'qaatec lapooqo' na ra'aachi', chaqai 'nejem aca qarqaỹa Apia, chaqai ca Arquipo qarotaua queda qareloquiaxac. 3Coñiguit qamiri da qouagaxa chaqai da na'maxa chicqo'ot ñi qota'olec chaqai so qara'gaxala' Jesucristo.
Da le'xorenataxanaxa chaqai da lpi'ỹaxac so Filemón
4Se neme saantacot da ña'aachic ñi qota'a quena' so'leente'te qami' quena' ñqouagaxaintac, 5ma' 'ue da ỹa'xaỹaxac quiyim 'ue da re'xorenataxanaxa'e' chaqai da rpi'ỹaxaqui' queso qara'gaxala' Jesús chaqai da re'xorenataxanaxa'e' quená'ogue ná'maq lalamaxareteripi ñi qota'a. 6Sashiilatac ñi qota'a quiyim quená'maq mashic huelec ñi'maxare chicqochigui da rpi'ỹaxaqui' quiyim ỹaatqajam ỹa'yiinchigui da qanqouagaxa queso Cristo Jesús. 7Ca' 'xoic da ñitoonaxac, ña'ñaxatete'e' da re'xorenataxanaxa'e', ma' chicqochigui qami' quiyim ỹa'maqachigui na lauel ná'maq mashic icoñiguit da na'qaatec.
So Pablo rashiilaxan quiyim qai'xoren so na'ac Onésimo
8Ma' quedajo, 'eno'm mashic ỹim lelaatec so Cristo, ca' seshiteta quiyim 'ue ca selachiraxalec, 9qam qaiyiita ñi'xoresene'tot qami'. Ỹim Pablo mashic aỹim qo'xoỹom chaqai nagui ỹim ncoñiiteguesec sasouetapigui so Cristo Jesús, 10sashiila'e' quiyim qouaquitegue na Onésimo, ma' mashic llaalec da ipi'ỹaxac quenajo ncoñiitaxanaxaqui.
11Quesaua 'auaxaqa na'xata' ñi Onésimo qaica ca 'negue caqami', qam nagui, ca' ỹaatqajam npe'eet caqami' chaqai caỹim. 12Ca' sopilaqta qami', ca' coñichiguit, 'ñiisa'gue quiyim chaqaỹim ná'maq coñichiguit. 13Ỹa'maqachiguiñi quet quiyim ñaq ñolliitañi quet, qaiyi nimiiñiguit aqami' quiyim yotauan ro'ueenataxanot aỹim, ma' ỹim ncoñiiteguesec sasouetapigui quiyim sa'xatetac da na'qaataxac so Jesús. 14Qam sqa soiquentac cá'maq so'uet quiyim se ña'deenqa'ajta', qaiyi cá'maq rqouagaxa'e' caỹim mesqai 'ec chicqochigui ca nepagaxallic. Ta'ta'a quiyim cá'maq chicqochigui qami' rqouagaxa'e' caỹim. 15Ca' sqoue quiyim ñi Onésimo qoshiiueco' na'le caqami', qam nagui, ca totqai ca'e qami', mashic pilliraxauot. 16Qam totqai 'neetari' ca ra'aqui', ta'ta'a quiyim paguec loyac queca na'ac, ta'ta'a quiyim nauochaxaua'e' rqaỹa'e'. Ỹim ỹaatqajam ỹoqo'itaxat, qam qami' paguec quet rqo'chita. Mesqaidaata quiyim 'neetari' ca ỹale, ta'ta'a quiyim 'neetari' ca rqaỹa'e' rpi'ỹaxaua'e' queso qara'gaxala'.
17Ca no'm chaqaida quiyim ỹim riỹa'e', ca' coñichiguit ñi'maxare, 'ñiisa'gue quiyim coñichiguit aỹim. 18Ca no'm 'ue ca lo'ueenataxanaxac se ỹa'maxañi, loqo'm 'ue aca la'uale caqami', ca o'laxañitegue caỹim. 19Ca' ỹim Pablo shiriñi da ỹa'qaatec quiyim seshivichiñi' ma'le. Sha'apiguito' viichigui qavilli' quiyim ñaqa 'ue aca ra'ualli'i' caỹim queda chi nachaalataxaqui'. 20Ajá'a, qami' ỹaqaỹa, ñaqai vite ca rqouagaxa'e' caỹim, ma' qami' ipi'ỹaxaua queso qara'gaxala'. Ñaq lo'daxachirigui na iuel, ma' qami' ỹaqaỹa ipi'ỹaxaua queso Cristo.
21Shiriñi dajo caqami', ma' sa'deenta quiyim qami' 'xaỹaxanaxaraic, chaqai sa'den quiyim 'viichi' dá'ogue dá'maq sashiilaxantaque, qam ỹapacauec nqai'ñi'. 22Chaqai chaqa'ma' qatqajañisari' ca ilaqsoqo', ma' sqoue sqaỹaloq sovita qami'. No'm qaicoñiguit ca nqouagaxainaxaguii, ca' ñi qota'a ỹo'uet quiyim ñauañiguita qamiri.
Da niquinaxanaxac chaqai da na'maxa pa'aatec
23Ilata qami' da liquinaxanaxac ñi Epafras ñí'maq ñcoñiitaxaua sasouqatapigui so Cristo Jesús, 24chaqai ñi Marcos, Aristarco, Demas, chaqai ñi Lucas, nauá'maq yotauanta'pe queda ỹo'ueenataxanaxac.
25Ca' so qara'gaxala' Jesucristo ỹaanema qamiri cá'maq no'uen qayicyaxaguii. Ajá'a, ca' chaqaida 'neeta dajo.
Currently Selected:
Filemón 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.