Lucas 6
6
Saua nale' so Jesús no'tequesa'ña na trigo la queso na'xa'a co'mataxaqui
(Mateo 12.1-8; Marcos 2.23-28)
1'Uo' so na'xa'a co'mataxaqui na' so Jesús quejelgoto naua nanaxanqate' quena trigo. Ca co'na' ñaqai queeta, ca' saua nale' napogoxonsañi quena trigo. Ime, ca' naqata'a ana la, ca' ỹa'queetac. 2Ca' 'uo' so renataxan queso fariseoipi, 'naaco':
—¿Chi'neco' qamiri 'viichitac dá'maq se qaỹo'uet quiyi na'xa'a co'mataxaqui?
3Ca' so Jesús 'naaco':
—¿Qamiri peeta'a saqa' taxahilec ca 'neeto' so David co'na' so'maxare chaqai saua nale' qopate'? 4Ca' so'maxare inoxonougui so lauo' ñi qota'a, ca' ỹaconalo saua paañi' mashic qoỹaanoto ñi qota'olec, ca ỹa'gue', chaqai ỹachite' saua liỹaata'pe, ma' sojo pan qaỹauaaque loq na netaxaỹaxanqajanqaipi quena' qaretaxaỹa'pegue' ñi qota'a.
5Chaqai 'naaco':
—Najo ỹale llaalec, na'maxare qai'neeta 'uo' ca 'negue quiyim 'ue ca ramaxasoxonlec quiyi na'xa'a co'mataxaqui.
So ỹale rashivita na lqai'laxat
(Mateo 12.9-14; Marcos 3.1-6)
6Ca' queso liỹa na'xa'a co'mataxaqui, ca' so Jesús lotqai inoxonougui só'maq lapoxoqui na judioipi, ca' rapaxaguinataxantac. Ca' ỹalequetaho' so ỹale mashic rashivita da lqai'laxat loic. 7Ca ná'maq rapaxaguinataxanta'pegue na naqataxaquipi chaqai na fariseoipi chi nauaanta'a so Jesús quiyim ratarenataxan queso na'xa'a co'mataxaqui, qaiyi qaishit qaỹa'ue ca qaỹachigoxochichigui ca lasauaxaset. 8Qam so'maxare shi'gue ỹa'den da la'deenataxanaxac so qomyipi. Ca 'naapego' só'maq ỹale rashivita da lqai'laxat, 'naaco':
—Ñirishiguim, ca' 'iriñigui na lavinñi.
Ca' so ỹale ne'laxashiguim, ca taañigui na lavinñi so qomyipi. 9Ca' so Jesús 'naapego' so liỹaripi, 'naaco':
—Ỹim senate' qamiri nagui: ¿Negue' cá'maq qaỹa'maxarenta qaỹo'uet quiyi na'xa'a co'mataxaqui, peeta'a cá'maq lo'yaxanec, loqo'm ca se no'uen? ¿qanca'laxatec, loqo'm qanaqat ca nachaalataxac?
10Ca' so Jesús ỹamataugui sá'ogue só'maq reloqotaugui. Ime, ca' 'naapega so ỹale, 'naaco':
—Ñaqai ỹeguec nqai'ñi' na rqai'laxachi'.
Ca' so ỹale chaqaida 'ne'tegue, ca' so lqai'laxat chaqa'ma' imeuec. 11Qam só'maq qomyipi ỹaatqajam ro'o. Ime, ca' nenatetecta':
—¿Nega'ỹo' ca 'neeta quiyim qaỹa'ue ca qohine'tegue so Jesús?
So Jesús nca'au'alo saua doce lelaatqa
(Mateo 10.1-4; Marcos 3.13-19)
12Ca 'uo' so na'xa'a, ca' so Jesús taashi'megue aso qoỹoqoshi'megue 'laua, ca' nqouagaxain, sá'ogue so 'óna pe nqouagaxaintacot ñi qota'a. 13Ca co'na' mashic richiguiñi, ca' roỹaxana so lapaxaguinatqaipi. Ime, ca' nca'au'alo saua doce quesaua'maxare ỹauaapigui lelaatqa. 14Ca saua'maxare 'ena na leenqateripi: Simón só'maq ỹanegue leenaxat Pedro, chaqai so Andrés só'maq lqaỹa so Simón, chaqai so Jacobo, chaqai so Juan, Felipe, chaqai so Bartolomé, 15Mateo, chaqai so Tomás, chaqai so Jacobo só'maq llaalec so Alfeo, chaqai so Simón só'maq chicqaugui na cananistaipi, 16Judas só'maq lqaỹa so Jacobo, chaqai so Judas Iscariote só'maq ỹaano' co'na'le so Jesús.
So Jesús ỹapaxaguintac so 'xoic qomyipi
(Mateo 4.23-25)
17Ca' so Jesús co'na' renotec caso qoỹoqoshi'megue 'laua, liỹaata'pe saua'maxare. Co'na' qanoviri'ña so quemarelec, ca so'maxare chaqai saua lapaxaguinatqa huere'e. Chaqai ỹaatqajam 'xoic so qomyipi chicqa'oga yá'ogue yi 'laua Judea, chaqai yi Jerusalén, chaqai na lemanaxa yi Tiro chaqai yi Sidón. Na qomyipi nanac, ma' ỹahotaque na'xaỹaxana so Jesús, chaqai quiyim qaỹomatec na ralolaxa. 18Ca' na qomyipi ná'maq 'ue na le'ec lecmaxaic qai'neeta imeuec. 19Ca ná'ogue na qomyipi ỹahotaque quiyim qaipootau'a queso Jesús, ma' so'maxare ỹomatec ná'ogue, ỹahote'e da lquesaxanaxa.
Ná'maq ỹa'maqachiguiñi chaqai ná'maq sqaica ca la'maxa
(Mateo 5.1-12)
20Ca' so Jesús ỹamataugui so lapaxaguinatqaipi, ca' 'naaco':
—Ỹaatqajam ra'maxaichiguiñi qamiri ma' qamiri 'xoraiquipi, ma' ralamaxarichii da lo'ueenataxanaxac ñi qota'olec.
21Chaqai qai'neeta ra'maxaichiguiñi qamiri ma' viitaugui nagui quiyim rqopachii, ma' ỹaatqajam 'ue ma'le ca rquemaraxahi.
Chaqai qai'neeta ra'maxaichiguiñi qamiri ma' noỹeñitagui nagui, ma' ỹaatqajam 'ue ma'le ca raỹalliguiriguii.
22Chaqai qai'neeta ra'maxaichiguiñi ma' qamiri qanoquii'alo quena qomyipi, chaqai ma' qaro'yia'oguiyi, chaqai ma' qoyiga'alo qamiri, chaqai ma' tot qanqo'ta da qadeenaxachii, 'ec chalego la'aaxa, sovitapigui najo ỹale llaalec. 23Ỹaatqajam 'xoic ca raỹaaguii chaqai ỹaatqajam netooñitagui ma'le queca na'xa'a, ma' ỹaatqajam lodegaxat ma'le ca nishiuetenaxaguii queda piguim. Ma' chaqaida da 'neeta so 'auaxaic leta'allipi najo qomyipi 'xoic lqa'viic quesó'maq 'auaxaic letaxaỹaxaquiripi ñi qota'a.
24Qam 'xoraiquipiolec qamiri ma' qamiri nesallaxanqaipi, ma' mashic 'uo' da ra'maxahi.
25Chaqai 'xoraiquipiolec qamiri ma' se rqopachii nagui, ma' 'uo' ma'le ca rqopaaxahi.
Chaqai 'xoraiquipiolec qamiri ỹalliguiritagui nagui, ma' ỹaatqajam noỹeñitapeguem ma'le ca rachicoxohi.
26Chaqai 'xoraiquipiolec qamiri, ma' no'uen cá'ogue ca na'qaataxaguii, ma' chaqaida dá'maq 'neeta só'maq 'auaxaic leta'allipi na qomyipi, só'maq chaqai 'naac letaxaỹaxanqajnec ñi qota'a.
Da 'neeta quiyim qai'xoren ca pa'guenaxaua
(Mateo 5.38-48; 7.12)
27Ca' qamiri mashic na'xaỹaxañitapiguiỹa', ca shiñiỹapegaxaua' quiyim 'xoriñii cá'maq rpa'guiñitac, chaqai ỹaatqajam 'maxachi'tegue cá'maq noquiaitapegaxaua', 28chaqai shiilaxañilec queca no'uen quecá'maq rashiilaxantalec qamiri queca se no'uen, chaqai nqouagaxaiñitalec ná'maq rishiviñitac. 29Chaqai no'm 'ue ca ỹouaxañigui na lahi na qashiiqui', ca' 'ỹaañitem na liỹa lahi na qashiiqui', chaqai no'm 'ue ca ỹacona ca nesaaco'e', 'ỹaañitem quiyim i'xat ca nelamaxaqui'i'. 30Chaqai no'm 'ue ca rashiila'e', ca' 'ỹaañitem ca ỹahotaque, chaqai no'm 'ue ca rouootaxana'gue ca qatooỹaqui', sqai paquira'pegue'. 31Cá'maq no'uen viitaque quiyim qaỹo'uet caqamiri, ca' chaqaica ca 'viichii quena qomyipi ma'le.
32Ma' no'm qaicaata cá'maq qamiri lqo'itqate', ca' chaqaicaata rqo'chiỹa, ca ¿nega'ỹo' ca ỹa'maqachiguiñi ro'ueenataxanaxaguii? Ma' vire'ta na nocqaiquipi ishit ỹo'uet dajo. 33Loqo'm 'viichii ca lo'yaxanec quecá'maq ỹo'uet ca lo'yaxanec caqamiri, ca ¿nega'ỹo' ca ỹa'maqachiguiñi 'viichitac? Ma' na nocqaiquipi ishit ỹo'uet dajo. 34Loqo'm 'ualaxanaxañii cá'maq chi naquichita'a, ca' ¿nega'ỹo' cá'maq ỹa'maqachiguiñi mashic shichii 'viichii? Ma' qai'neeta na nocqaiquipi ishit ỹa'ualaxanaxan ca liỹa nocqaic, nauaanta'a quiyim qaỹopilaxatem. 35Qalaxam qamiri 'xoriñii cá'maq pa'guenta'pe qamiri, chaqai 'maxachi'tegue na qom, 'ỹaañiuec ca na'ualec. Qam se ỹa'maxañi quiyim 'ue ca naquichita'a, qaiyi ỹaatqajam lodegaxat ca nishiuetenaxaguii, chaqai ỹaatqajam qamiri llaalqa ñi qota'olec ñí'maq paguec lecaic. Ma' ñi'maxare ỹaatqajam 'xorenataxanaxaic, i'xoren ná'maq se ỹa'deena'a da na'agaxa chaqai ná'maq nocqaiquipi. 36Chaqai ỹaatqajam qamiri qouagaxanqachaqaiquipi ma'le, qaiyi 'ñiitam ñi qota'olec caqamiri ỹaatqajam qouagaxanqachaqaic.
Se qaimit ca lasauaxaset ca niỹa
(Mateo 7.1-5)
37Sqai michiỹaque ca lasauaxaset ca riỹahi, qaiyi ñi qota'olec se imite' qamiri. Chaqai sqo 'viichii ca nouaxanaxaset ca riỹahi, qaiyi ñi'maxare se ỹa'ue ca nouaxanaxashichii. Qam 'xorenataxaño', qaiyi ñi qota'olec i'xorene' qamiri. 38'Viichii ca 'ỹaañim ca riỹahi, qaiyi ñi qota'olec 'ue ca ỹaanema qamiri. Ca ỹaanema qamiri aca qachoxoguii ỹaatqajam no'qaata nqai'en, qaỹochicqochi'ñigui, chaqai qaipataqachigui, no'qajlec nqohin. Ma' ñi qota'olec ipacqajanchigui ca lecaata cá'maq 'ỹaañim ca riỹahi, ca' chaqaiyi yí'maq lecaata ca ỹaanema qamiri.
39Ca' so Jesús ỹa'uo' so laloqojnaxanaxaqui, 'naaco':
—¿Tegue' chi ishito' ca qai'laq quiyim ỹauequeteguiri' ca liỹa qai'laq? ¿Tegue' chi ishito' quecaua'maxare sqa tari'ñigui canchaqaca tema? 40Qaica ca chi napaxaguinatec napacalec ca napaxaguinatqo'. Qam no'm ỹomateta cá'maq napaxaguinataxac, ca' vire'ta 'nejem ca napaxaguinatqo'.
41Qam ¿chi'neco' ra'iisapega ca lichooqui' hueeta'ñigui añi nqote ca rqaỹa'e', qam sqa 'ajñi' añí'maq loỹo neeta'ñigui aná'maq nqochi'i'? 42Qam no'm sqa 'yiiñira'a añi loỹo neeta'ñigui ana nqochi'i', ¿chi'neco' shichi' 'ñirapega ca rqaỹa'e': “Ỹaqaỹa, ñaq yayaxañirac ñaq ñaqat yi lichooqui' hueeta'ñigui ana nqochi'i'”? ¡Ma' qami' 'ñiisapega qami' 'maxaraic! 'auaxañi' naqachi' añí'maq loỹo neeta'ñigui ana nqochi'i', qaiyi ỹaatqajam huañiterelec quiyim naqachi' cá'maq lichooqui' hueeta'ñigui aca nqote ca rqaỹa'e'.
Aca qo'paq chaqa'ma' qaỹa'den cana la
(Mateo 7.17-20; 12.34-35)
43Qaca qo'paq quiyim no'uen 'ue aca la se no'uen, chaqaca qo'paq se no'uen quiyim 'ue aca la lo'yaxana. 44Qam caca 'óna qo'paq chaqa'ma' qaỹa'den aca la. Ma' se ishit qanaqat ana la aca higo, qaỹachigoxotaugui aca qo'paq 'ue ana le. Chaqai ana 'úva quiyim qanaqat ana la, qam se qaishit qaỹachigoxotaugui aca legaxa. 45Ca' da 'neeta ca no'uen ỹale quiyim retaqa, ca' no'uen cá'maq la'qaatec, ma' dá'maq ỹa'maqachiguiñi hueetagui añi le'taxanata. Chaqai 'nejem ca se no'uen qom quiyim retaqa, chaqa'ma' se no'uen ca la'qaatec, ma' dá'maq se no'uen hueetagui añi le'taxanata. Ma' ná'maq qodap ishit ỹa'xat cá'maq hueetagui añi qare'taxanata.
Saua dos no'xonaxalate' ca 'imec
(Mateo 7.24-27)
46Qamiri quena' ỹim ỹaxañiỹa, ca' 'ñiita'gue, “Qami' maq ỹaatqajam qami' qara'gaxala'”, qam ¿chi'neco' ma' sqo 'viichii quena' 'ue da shinac? 47Nagui aỹim sa'xatema qamiri ca 'nejem ca qom quiyim nau'a aỹim quiyim na'xaỹaxañiua', ca' ỹaatqajam ỹo'uet ca shinapega: 48ca'maxare 'nejem ca ỹale quiyim ỹo'uet ca lauo', ca' 'au quiyim ri'ỹaxan, ỹaatqajam qoỹoqochi'ñigui nqai'en ca li'ỹac. Ime, ca' pa'xanañi ca qa', ca' no'xonshiguim ca 'imec. Ca co'na' ỹovita nqo'ñishiguim aso lachiugue, ca' anac na huaxaỹaq ỹaatqajam quesaxan na lo'paxa quiyim ỹouaxanot cajo 'imec. Qam se ishit idaxanac, ma' so 'imec no'xontalec nqohin so qa'. 49Qam cá'maq na'xaỹaxantapega aỹim, qam se ỹo'uet cá'maq shintapega, ca' ca'maxare 'nejem ca ỹale quiyim chi ỹa'da'ñiyi ca lauo', qam se ỹa'ue ca lo'xonaxala' nqai'en. Ca co'na' ỹovita nqo'ñishiguim aso lachiugue, ca' anac na huaxaỹaq ỹaatqajam quesaxan na lo'paxa quiyim ỹouaxanot so'maxare, ca' ishit quiyim 'guiñi, ca' ỹaatqajam na'laañi so 'imec.
Currently Selected:
Lucas 6: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.