Oseas 1
1
Aso loua chaqai so llaalqaipi so Oseas
1Dajo dá'maq la'qaatec ñi qara'gaxala' ỹalamaxachichigui so Oseas, só'maq llaalec so Beeri, queso ñaxaripi na' nashillipi saua Uzías, Jotam, Acaz chaqai so Ezequías, saua'maxare nashillipi na'le quiyi Judá, chaqai so llaalec so Joás, leenaxat Jeroboam, nashi na'le quiyi Israel.
2Ca só'maq la'qaatec ñi qara'gaxala' só'maq ỹahotaque ỹa'xat so Oseas 'neetasa': Na naalec na 'laua Israel 'ec nedequen, ca' noỹootec caỹim. Ca' qami' denaxachichirigui, mo'e', daañiraque aca roua'e' nanatqa lo'o', ca' vite ca qachaalaxahi' caca'maxare, qaiyi llaalqa ma'le aca 'aalo nanatqa lo'o'.
3Ca' so Oseas icona quiyim loua aso Gomer, so leta'a leenaxat Diblaim. Ca so'maxare 'man na'le, ca 'ue so llaalec. 4Ca na'le, ca 'naac ñi qara'gaxala', 'naac queso Oseas: Leenaxat nqai'ñi' Jezreel yi noctoqui', ma' sqaỹaloq sa'ue ca nouaxanaxaset na llaalqaipi ñi nashi Jehú sauaxat da lalauataxanaxac na'le quiyi Jezreel. Ca sa'ue lqodoc da lo'ueenataxanaxac quiyim ỹoiquentac yi Israel. 5Ca' quecajo na'xa'a sosogui da lquesaxanaxa na nalliripi yi Israel queso ca'megue leenaxat Jezreel.
6Ca' aso Gomer lotqai liỹa 'man, ca 'ue aso llaale. Ca ñi qara'gaxala' 'naac queso Oseas: Ñitegue leenaxat se qanqouaguegue ayi nocto'lli', ma' tot yqouaguegue ma'le yi Israel. Tot sapalaxat na lasauaxaset. 7Qam yqouaguegue yi Judá: chaqaỹim ná'maq na'gaxala', ỹim nqota'olec yi'maxare, ñca'laxatec. Qam se ñca'laxatec queca lauataq, ta'ta'a quiyim sqaica nqaishin ca novic, ca lecat, ca shipgaq, chaqai ca qom neetashiguim.
8Ca na' ime ỹaxanñi lillipaxac aso se qanqouaguegue, ca' aso late'e Gomer, ca lotqai liỹa 'man. Ca na'le, ca' ne'qaañi so llaalec ỹale. 9Ca na'le, ca 'naac ñi qara'gaxala' queso Oseas: Yi noctoqui' ñitegue leenaxat se ỹalamaxaret iuo', ma' qamiri totqai qamiri ỹalamaxarete', chaqai ỹim totqai ỹim qota'olec caqamiri.
(1.10—2.3 Yi Israel qaỹopilaxachichigui ma'le da 'au no'ueenataxac.)
Currently Selected:
Oseas 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.