Éxodo 1
1
(1.1-5 Só'maq llaalqaipi liỹaatac so Jacob só'maq ỹovi'o' na'le quiyi Egipto.)
Da le'xoric so llaalqaipi so Israel quiyi Egipto
6Ca co'na' so José chaqai so lqaỹaripi chaqai sá'ogue so naloxouaripi nimiichiguiñi. 7Qam só'maq Israel llaalqaipi co'o, ca ỹaatqajam 'xoic na llaalqaipi noquiiquetauec, vire'to' na' 'ue da lquesaxanaxa. Ca sham yá'ogue yi 'laua no'xalec quena'maxare. 8Ca na' ncopa, ca 'uo' so dalaxaic nashi quiyi Egipto. So'maxare se iuanapega so José, ca' 'naaco' quesó'maq reloqota'a qomyipi:
9—Ñaqai 'ajñii, na Israel llaalqaipi paguec 'xoic chaqai paguec quesaxanaxaic coqomi'. 10Ca 'maxaraic quiyim sahoqe ca shinqa'tegue, ca' squepaxataq, qaiyi se nqo'neuec. Ma' sqoue quiyim 'ue ca lauataq, ca' huaxaiguit ca qanpa'guenaxaua, ca nco'ỹa'to qomi', ca' ca'e najo 'laua.
11Co'na'le, ca' na Egipto laseripi ỹa'ue na neloxoỹaq, qaiyi se ỹala'gue quiyim ro'ueenataxan nqai'en, no'xoñishiguim nqai'en naua na'aate' quiyi Pitón chaqai yi Ramsés, la'maqataxanqa'o' quena' ỹa'maxat na na'ic so Faraón. 12Qam co'na' paguec nqo'neuec da nqa'viic, lotqai nqo'neuec na llaalqaipi. Ca' so Egipto laseripi nqo'neuec da lqolonaxa.
13Ca' so Egipto laseripi nqo'neuec da lqa'viic quena' ila' so Israel llaalqaipi. 14Ca ỹaatqajam qaỹa'ue da le'xoric quena' ỹo'uet nqohin na nishaaxa chaqai na losoc chaqai ná'ogue na liỹa no'ueenatec hua'oga na no'ueenaxa. Chaqai ná'ogue ná'maq resalli qaỹamaxalec, se qai'xoren. 15Só'maq nashi quiyi Egipto qai'neeta retaxaỹa'pegue' aso Sifra chaqai aso Fúa sauá'maq ncochaaxal cana 'aalo hebreo lasellipi. 'Naaco' quesaua'maxare:
16—Ma' 'ue aca cochiỹa cana 'aallipi hebreo lase, ca' 'yiiñita ca llaalec. Quiyim ỹale, ca' lauachii. Qam no'm 'aalo, ca' nca'laxachitauec.
17Qam saua ncochaaxal cana 'aalo ỹaatqajam 'xoic da lqolonqa' quiñi qota'olec. Ca' se na'xaỹaxanto' na'le dá'maq 'naaco' so nashi. Ta'ta'a quiyim nca'laxatesauec na ñaaqaipioqui'. 18Co'na'le, ca' so nashi quiyi Egipto roỹaxane'ogalo saua ncochaaxal. Ca 'naaco':
—¿Chi'neco' ma' nca'laxachitauec na ñaaqaipioqui'?
19—Ma' aná'maq 'aalo hebreo lase sqai 'nejem ana Egipto lase —'neraco' saua'maxare—. Ma' paguec da lquesaxanaxa. Ca quena' saqa' sovitaxa, qa' shi'co' quen ne'qaañi ñi llaalec.
20-21Ca' chaqaida dá'maq 'neeto' na' nqo'neuec chaqai nqo'neetauec da lquesaxanaxa. Chaqai sauá'maq ncochaaxal 'ue da lqolonqa' quiñi qota'olec, ca ñi'maxare nqouagueque quiyim 'xoic nqai'en ca llaalqaipi. 22Qam so Faraón 'naaco' quesó'maq chi lauo' laseripi:
—No'm 'ue ca ne'qaañi noctoqui' quena hebreo lasellipi, ca qainaxe'ogo' ma'le aso lachiugue. Qam ana nocto'lli' ne'qaañi, ca' qanca'laxatetauec.
Currently Selected:
Éxodo 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.