Lucas 2
2
Da ne'xaỹoqsoxoc so Jesús
(Mateo 1.18-25)
1Qam quesaua na'xata', ca so ỹaatqajam lashi na nashillipi, leenaxat Augusto, so'maxare ỹaanec so la'qaatec quiyim ná'ogue na qomyipi qoỹiro na leenqateripi. 2Qam sojo 'avichiguiñi neraxanaxac viichigui so na'xa'a co'na' ñaq reloqota'a yi 'laua Siria so nashi Cirenio. 3Ca ná'ogue na qomyipi quepegue' na chicqochi'ñi, qaiyi qoỹiro. 4Ca' vichiguiño' so José chicqochi'ño' yi na'a' Nazaret huaugui yi 'laua Galilea. Ca nqo'na yi na'a' leenaxat Belén huaugui yi 'laua Judea yí'maq ne'xaỹoqsoqo'o' so nashi David, ma' so José chaqa chigoxougui na lauo' so David. 5Ca quepegue' yi Belén quiyim qoỹiro, liỹaatac aso María asó'maq ỹahotaque quiyim loua, qam aso'maxare 'manaxai. 6Ca co'na' mashic neesa'ñi yi Belén, ca ỹovito' so laloqo' quiyim co'o aso María. 7Ca hua'ño'yi co'na' ne'qaañi so 'auaxaic llaalec. Ca lepataxañigui so lepataxaqui, ime, ca' illaañigui aso lqui'ỹaxaqui na iseripi neloipi, ma' sqaica ca lomate' saua'maxare quecá'maq ỹaatqajam 'imec nelaqsoqo'.
So chicqashiguim qota'a lelaatqaipi chaqai so neloxoỹaripi cana qagreta
8Ca' quiyi sqoỹoqaque quiyi Belén 'uo' so qomyipi reloqota'a ana lalo qagreta, hueetauec quiyi no'ueenaxa queso pe. 9Ca' chi re'laqataxanta quiyim nachaxan so lelaatec piguim le'ec ñi qara'gaxala'. Ca dá'maq lauaq ñi'maxare ỹaatqajam coỹarelgoto saua'maxare, ca ỹaatqajam 'xoic da lqolonqa'. 10Qam so nelaatec 'naaco':
—Se ro'chii, ma' ỹim ñoda'alo qamiri da no'uen ra'xaỹaxaguii. Ma' da'maxare ỹo'uet ma'le ca netoonaxac ná'ogue na qomyipi. 11Da'maxare 'neetayi: nagui ne'qaañi quiyi na'a' ne'xaỹoqsoqo' so David cá'maq qaỹahotaque quiyim rca'laxaguii, leenaxat Cristo, ca' cá cá'maq qara'gaxala'. 12Ca' 'eda ma'le da retañiguii 'neetayi: huañijlec ma'le ca noctoqui' qalepateta'gue queca lepataxaqui', hueetañigui nqohin aca lqui'ỹaxaqui na iseripi neloipi.
13Ca quiyi lotqai nachaxan so liỹaripi nelaatqaipi piguim laseripi, ỹaatqajam 'xoic so'maxare ro'ueenaxantalec ñi qota'olec, 'naaco' quen:
14¡Ỹaatqajam lodegaxat da quiyim qaỹo'ueentac ñi qota'olec ñí'maq neeto'ot na piguim,
chaqai quena 'laua 'uo' da la'maxa na qomyipi ná'maq ỹa'maxarenta ñi'maxare!
15Ca so nelaatqaipi co'na' pilshiguim queda piguim, ca só'maq qagreta lo'ollipi retaqatecta', 'nerecta':
—'Maxaraic qolaqpegue' yi Belén, sa'ajanaxanaxa chi negue' ca 'neeta dá'maq qaỹa'xatetac, dá'maq ỹa'xatema qomi' ñi qara'gaxala'.
16Ca' ỹaatqajam iỹala' quiyim taatquera saua qomi'. Ime, ca co'na' ỹovite', ca iuanteta aso María, chaqai so José, chaqai'neeta so noctoqui' hueetañigui aso lqui'ỹaxaqui na iseripi. 17Ca co'na' mashic qaiuana, ca qaỹa'xatetac da la'qaatec so nelaatec co'na' ỹa'xatetac so noctoqui'. 18Ca ná'ogue ná'maq 'qaachigui dajo na' qaỹa'xatetac, ỹaatqajam 'ue da le'laxa. 19Qam aso María ỹa'maxat cañi le'taxanata dá'ogue dajo, chaqai ỹaatqajam naloqochintac da'maxare. 20Ca' so qagreta lo'ollipi co'na' ime, ca pil ỹaatqajam netoontagui, chaqai ỹo'ueentac ñi qota'a, ma' ná'maq 'qaachigui chaqai ná'maq ỹauanchirigui ỹaatqajam ipaquichigui sá'ogue só'maq qaỹa'xat.
So noctoqui' Jesús qaỹodou'a aso no'ueenaxanaxaqui late'ogue'
21Ca co'na' ỹovite' saua ocho na'xata', ca qaỹa'uo' so netanaxaset na loshicmaxa so noctoqui'. Ime, ca qoỹanegue leenaxat Jesús, ma' dajo neenaxat dá'maq shi'gue qaỹa'xatem aso María queso lelaatec ñi qota'olec co'na' saqa' 'man aso'maxare. 22Ca co'na' mashic ỹovita so na'xa'a quiyim saua María chaqai so José quiyim ỹo'ueete' da nelaataxanaxac dá'maq chicqo'tot so Moisés quiyim nco'taxate', ca' qaỹodou'a yi na'a' lodegaxat Jerusalén so noctoqui' quiyim qoỹaanot ñi qara'gaxala'. 23Ca' saua'maxare ỹo'ueete' dajo, ma' chi lelaataxanaxac ñi qara'gaxala' naneretañi, 'neetasa': “Ná'ogue ma'le na 'auaxaic ñaalec qoỹaanot ñi qara'gaxala'.” 24Ime, ca' que' saua'maxare, ca qaỹa'uo' aso nachitaxanataxanqate qaỹavigaxat. Ca' qaipacqajanchigui da lelaataxanaxac ñi qara'gaxala' 'neetasa': qoỹaando' ma'le caua dos coviguiñigo', loqo'm caua dos llaalqa na coviguiñicoqui'.
25Ca' quesojo ñaaxa neeta'ñi yi Jerusalén so ỹale, leenaxat Simeón. So'maxare ỹaatqajam huagaxaraic, chaqai ỹa'maxate'tegue ñi qota'a, chaqai nauaantaque ca na'xa'a quiyim ime nqohin da le'xoric na Israel llaalqaipi. Qam so'maxare hueeto'ot so Espíritu Santo. 26Ca chaqaiso so ỹa'deenaxanaxanegue quiyim se imeho da nachaalataxac quiyim saqa' iuana ca nashi nca'laxaqui cá'maq nela' ñi qara'gaxala'. 27Ca' so Espíritu Santo ỹauec sojo ỹale quiyim tau'a nqai'en aso no'ueenaxanaxaqui late'ogue'. Ca' saua leta'al so noctoqui' Jesús co'na' qaỹodou'a añi no'ueenaxanaxaqui, qaiyi qaỹo'uet ná'maq qoỹeretañi nelaataxanaxaquipi, 28ca so Simeón ỹacona so noctoqui', qa'aal'ot. Ime, ca' ỹo'ueentac ñi qota'a, 'naaco':
29Qami' ỹa'gaxala', nagui, ca' shichi' nañaañirim ca sqaicanqaida ma' ime da ñachaalataxac,
ma' ipaquichigui dá'maq ra'qaachiqui' na' 'xachirim, ma' aỹim relaachiqui'.
30Ma' aỹim ỹaatqajam sauanchigui nagui ná'maq qarca'laxaqui,
31ma' ñi'ra'gue da reloqota'gue ná'ogue na qomyipi.
32Ma' chaqaina ná'maq ncoỹeraxanaxaqui ma' coỹarelec ná'maq sqai Israel laseripi,
chaqai ỹo'uet da lichoxoric ná'maq Israel llaalqaipi ná'maq lalamqateripi.
33Ca' so José chaqai aso late'e so Jesús ỹaatqajam 'ue da le'laqa' quená'maq 'qaachirigui la'qaatqaipi so Simeón co'na' retaqateguelec so noctoqui'. 34Ca so Simeón ỹaanem da no'uen la'qaatec so noctoqui'. Ime, ca 'naapega aso María só'maq late'e so Jesús, 'naaco':
—'Ajñi', ná'taq noctoqui' tai'a ma'le quiyim 'xoic ca huaañi nqai'en chaqai ca nachaalataxanñi quena Israel llaalqaipi. Na'maxare chaqaina na netanec quiyim ỹaatqajam 'xoic ma'le ca sqai huelec, 35ca' qaiyi qaỹa'den ca hueetagui añi le'taxanata quiñi 'óna qom. Qam qami' ma'le quedá'ogue dajo 'nejem ca lecat quiyim qaỹa'yigui añi re'taxanata'e'.
36Chaqai hueeta'ño'yi aso 'aalo mashic la'qaataxanqajna ñi qota'a. Aso'maxare mashic ỹaatqajam qo'xoỹom, leenaxat Ana. Aso'maxare llaale so Fanuel, chicqaugui so llaalqaipi so Aser. Qam aso'maxare 'óno' na' llaq nequetegaxai, qam ỹovite' siete ñaxari quiyim reloqota'guit ca loua. 37Qam nagui aso'maxare mashic ỹovite' ochenta y cuatro ñaxari quiyim pa'ỹe. Chaqai ỹaatqajam sqai ca'e aso no'ueenaxanaxaqui, ỹo'ueentac ñi qara'gaxala' quenaua na'xatari chaqai naua piri, ỹo'ueetetac da nqouagaxainaxac chaqai nqopaaqachitetac. 38Ca aso Ana liỹa ỹalequetaho quesojo na'xa'a. Ca' co'na' ime dá, ca ỹaantacot da na'aachicyaxac ñi qota'a, ca ỹa'xatetac so noctoqui' Jesús, ra'qaataxantapeguem ná'ogue na qomyipi ná'maq ỹahotaque quiyim ca na'xa'a quiyim ỹaatqajam qaỹosouec yi Jerusalén.
Qaỹopilgue da Nazaret
39Ca co'na' mashic ime qaỹo'uet ná'ogue na naneretañi lelaataxanaxaquipi ñi qara'gaxala', ca saua'maxare, ca piltegue da Galilea, querepegue' yi ỹaatqajam la'aate' quiyi na'a' Nazaret. 40Hua'ñi, ca so noctoqui' noquiiquetashiguim da llaaxa, chaqai da lquesaxanaxa, chaqai da la'deenataxanaxac. Ca' ñi qota'a ỹaatqajam ỹaanem so'maxare da lqouagaxa.
So Jesús na' llaqai noctoqui' hueetau'a aso no'ueenaxanaxaqui
41Ca' saua leta'al so Jesús naua'que naua ñaxari taasa'pegue da Jerusalén quena' ỹovire'oga so laloqo' quena' qaỹo'leenta'a so na'xa'a co'na' qoyique'e yi Egipto. 42Ca so Jesús co'na' mashic ỹovite' doce ñaxari. Ca saua'que saua'maxare taategue da Jerusalén, ma' chi no'ueenataxac quena' ỹovire'oga sojo na'xa'a lapoxoqui na qom. 43Qam co'na' pilac so qomyipi co'na' ime so lapoxoc, ca' so noctoqui' Jesús no'ueena'ñi yi Jerusalén. Qam aso late'e chaqai so José se qaỹo'leente so'maxare. 44Ma' qaipetetapega so Jesús quiyim 'ue ca liỹaatac queso qomyipi. Qam mashic ỹovi' 'óna na'xa'a quiyim queete' saua'maxare, co'na' qaimitetapigui sá'ogue so neuo' laseripi chaqai so nauanatqaipi, 45qam se qaỹanata so'maxare. Hua'ñi, ca saua'maxare piltegue da Jerusalén quiyim imijtegue.
46Ca co'na' mashic ỹovirerec saua tres na'xata', ca' qaỹanata so'maxare, hueetaugui aso no'ueenaxanaxaqui late'ogue', nqa'xantañi, reloqotaugui só'maq rapaxaguinataxanta'pegue na nelaataxanaxaquipi, na'xaỹaxantapega chaqai 'uo' na nenataxanaxaquipi. 47Ca ná'ogue ná'maq na'xaỹaxantapega so'maxare ỹaatqajam 'uo' da le'laxa queda la'deenataxanaxac, chaqai quiyim ỹaatqajam ỹa'den quiyim ichoxot ná'maq qarenataxanta'pegue. 48Ca' saua leta'al co'na' idaanda'a so'maxare, ca ỹaatqajam i'laxai'. Ca aso late'e 'naapego' so'maxare, 'naaco':
—Qami' ỹaalcolec, ¿chi'neco' 'ñitetegue coqomi' dajo? 'Ajñi' da qataa'i' chaqai aỹim ỹaatqajam 'ue da qareuogoxo quiyim semitqataque qami'.
49Ca' so Jesús 'naaco':
—¿Chi'neco' ma' michitaque aỹim? ¿Sqa 'yiiñiỹo' quiyim aỹim squelolta'pegue' na lo'ueenataxanaxaquipi ñi ita'a?
50Qam saua'maxare se ỹa'yiinchiguit da la'qaatec so'maxare.
51Hua'ñiyi, ca pil so'maxare, queuguilo saua leta'al, taategue da Nazaret. Ca' so'maxare queetalec quiyim na'xaỹaxane'talo saua leta'al. Qam aso late'e ỹaatqajam ỹa'maxat cañi le'taxanata dá'ogue dajo. 52Ca' so Jesús noquiiquetashiguim da llaaxa chaqai da la'deenataxanaxac. Ca' ñi qota'a ỹaatqajam ỹa'maxarenta so'maxare, chaqai ná'ogue na qomyipi.
Currently Selected:
Lucas 2: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.