Juan 13
13
So Jesús quiỹo' naua lapiaate' saua lapaxaguinatqa
1Ca quesó'maq liỹa na'xa'a, ca noviro so lapoxoc quiyim qaỹo'leente na' qoyique'e yi Egipto, ca' so Jesús ỹa'den quiyim ỹovita ca laloqo' quiyim ca'e na 'laua, ca quepegue' ñi leta'a. Qam so'maxare chaqai 'neetari' da lauochaxa queso lalamqateripi no'ueenalec na 'laua, ca' nagui ỹachaxanalo saua'maxare dá'maq paguec lecaic lauochaxa.
2-4Ca' so na'ỹaapec shi'co' ishichigui añi le'taxanata so Judas Iscariote, llaalec so Simón, da la'deenataxanaxac quiyim ỹaano so Jesús. So Jesús ỹa'deenta quiyim chicqo'ot ñi qota'olec, chaqai quiyim pila ñi'maxare, chaqai quiyim ñí'maq leta'a ỹaanem dá'ogue da lquesaxanaxa. Ca co'na' que'eeta'pe, ca' so Jesús ne'laxashiguim quiyi nqui'ỹaxala', ca naqat so napoxoqui, ca' nosaachigui so shiviaqataxat. 5Co'na'le, ca ỹocorigui so quiỹoxoqui queso huaxaỹaq, ca' quiỹo' naua lapiaate' saua lapaxaguinatqa, ca ỹashiviaxate' naua lapiaate' queso shiviaqataxat nosaatetagui.
6Qam co'na' shim quiỹo' lapiaate' so Simón Pedro, ca so'maxare 'naaco':
—Qami' ỹa'gaxala', ¿qami' vi'saque quiỹo'e' naua ipiaate'?
7Ca' so Jesús 'naaco':
—Nagui sqa 'yiiñi' dá'maq so'ueetetac, qam ma'chaqai, ca 'yiiñi'.
8Qam so Pedro 'naaco':
—Qaica ma' quiỹo'isa'pe quet naua ipiaate'.
Ca' so Jesús 'naaco':
—No'm se squiỹo', ca' mesqai qami' ỹapaxaguinatec.
9Ca' so Simón Pedro 'naaco':
—Qami' ỹa'gaxala', cha'regue mesqai nauate' quet naua ipiaate', quiỹo'e' qai'neete' naua ỹaua' chaqai na ỹaqahic.
10Qam so Jesús 'naaco':
—Cá'maq chita'gue nachiltac se ỹouen quiyim liỹa nquiỹo, qainauate' naua lapiaate', ma' dá'ogue co'teeta. Ca' qamiri mashic co'chiita, 'eno'm sqai qamiá'ogue.
11So'maxare 'naac: “Mesqai qamiá'ogue co'chiita”, ma' ỹa'deentari' quiyim 'ue só'maq ỹahotaque ỹaano so'maxare.
12Co'na' ime quiỹo' naua lapiaate' saua'maxare, ca' so Jesús liỹa ỹanñi so napoxoqui, ca liỹa nqa'xanñi quiyi nqui'ỹaxala'. Ca 'naaco':
—¿'Yiiñii dá'maq so'uet caqamiri? 13Qamiri machiỹa'gue aỹim napaxaguinataxanaq chaqai na'gaxala'. Ca da'maxare qaica ỹoqolliguit, ma' llic. 14Ca no'm ỹim napaxaguinataxanaq chaqai na'gaxala', qam squiỹo' naua qapiaachiri, ca nagui no'uen quiyim caqamiri quiỹo' naua lapiaate' ca liỹa. 15Sachaxanalo qamiri dajo, qaiyi qamiri denaxachii dá'maq ỹim so'uet caqamiri. 16Ỹaatqajam llic da shinac caqamiri, quiyim qaica nelaatec ỹapacauec queca na'co', chaqai qaica quet cá'maq qaila' ỹapacauec quecá'maq relaataxan. 17No'm qamiri 'yiiñii dajo, chaqai 'viichii, ca ra'maxaichiguiñi ma'le.
18Dá'maq sa'xatetac mesqai taỹaugui qamiá'ogue, ma' ỹim sa'deene' cauá'maq ñca'au'alo. Qam ipaquichigui ma'le dá'maq 'nerac yaua naneresañi na'qaatqa: “Cá'maq iqui'ỹaxaua, ca lotqai ñpa'guenaxaua.” 19Saqa' ỹovita dajo, qam chaqa'ma' sa'xat, qaiyi ma' ỹovirelec, ca' qamiri 'yiiñii quiyim chaqaỹim ná'maq ỹim. 20Ỹaatqajam llic da shinac caqamiri, cá'maq icoñiguit cá'maq sela', ca icoñiguit aỹim. Chaqai cá'maq icoñiguit aỹim, ca icoñiguit ñí'maq yila'.
So Jesús ỹa'xat quiyim chaqaiso so Judas só'maq ỹaano ma'le
(Mateo 26.20-25; Marcos 14.17-21; Lucas 22.21-23)
21Ca co'na' ime 'naac dajo, ca' so Jesús ỹaatqajam qaidaxanac i'laqac añi le'taxanata, ca ỹaatqajam ichoxoteta dajo, 'naaco':
—Ỹaatqajam llic da shinac caqamiri, quiyim 'oonoqui' ñí caqamiri ñí'maq yayaano ma'le.
22Ca' so lapaxaguinatqaipi chi na'iitecta', ma' se ỹa'den cá'maq qohintapega. 23Ca 'uo' so 'óna queso lapaxaguinatqaipi, só'maq paguec lqo'itaxat so Jesús, huaqate'e' co'na' que'eeta'pe. 24Ca' so Simón Pedro ỹicapego' quiyim inat so Jesús chi negue' cá'maq 'neetapega so'maxare. 25Ca so'maxare nqo'neu'a so Jesús, ca inat, 'naaco':
—Qami' ỹa'gaxala', ¿negue' ca'maxare coqomi'?
26Ca' so Jesús 'naaco':
—Ñaq selet ca pan lahi, ca cá'maq saanem, ca' chaqaica.
Ca' ilet so pan lahi, ca ỹaanem so Judas Iscariote, llaalec so Simón. 27Ca co'na' so Judas icoñiguit so pan, ca chaqa'ma' so na'ỹaapec Satanás inoxoñigui añi le'taxanata. Co'na'le, ca qohinapego' queso Jesús:
—Cá'maq sham 'viichi', ca chaqa'ma' 'viichi'.
28Qam quesó'maq que'eetac, reloqotalec yi nqui'ỹaxala', qaica ca ỹa'den chi'neco' ma' qohinapega dajo. 29Ma' so Judas hueeto'ot aso nam lahi', ca 'uo' na 'neetapega quiyim so Jesús ỹahotaque rishiujnaxanaque cá'maq qaỹouen queso nemaqachic, loqo'm 'ue ca ỹaanem na 'xoraiquipi. 30Ca' so Judas co'na' ime icoñiguit so pan, ca inoxonec. Qam mashic pe.
Dá'maq dalaxaic nelaataxanaxac
31Ca co'na' mashic inoxonec so Judas, ca 'naaco' so Jesús:
—Nagui, ca' qaỹachaxan da lemaqachic na ỹale llaalec, chaqai da lemaqachic ñi qota'olec re'oq ma'le quena'maxare. 32Chaqai no'm najo ỹale llaalec ỹachaxan da lemaqachic ñi qota'olec, ca' ñi qota'olec ỹachaxan ma'le da lemaqachic quena'maxare chaqai qaỹaloq ỹo'uet. 33Qamiri ỹaalqolqa, totqai shi'gom salequetauguilo qamiri. Qamiri daañitaque ma'le aỹim, qam da shinapega na'le so judioipi, nagui shinapegalo qamiri qai'neeta: Dá'maq saigue, qamiri sqai shichii 'iigue. 34Saanema qamiri najo dalaxaic nelaataxanaxac, quiyim ñi 'óna i'xoren ca liỹa. 'Nejem dá'maq i'xorenataxanaxa caqamiri, ca' chaqaida 'ñiita'gue quiyim ne'xoriñiỹata'. 35No'm ne'xoriñiỹata', ca ná'ogue na hueetalec na 'laua retan quiyim ỹaatqajam qamiri ỹapaxaguinatqa.
So Jesús ỹa'xat quiyim so Pedro 'naac ma'le quiyim se ỹauanapega
(Mateo 26.31-35; Marcos 14.27-31; Lucas 22.31-34)
36Ca' so Simón Pedro inato' so Jesús:
—Qami' ỹa'gaxala', ¿negue' cá'maq 'itegue?
Ca' so Jesús 'naaco':
—Dá'maq ỹim saigue, sqai shichi' quitegue aỹim nagui. Qam ma'le, ca shichi' co'uaachitegue aỹim.
37Co'na'le, ca 'naaco' so Pedro:
—Qami' ỹa'gaxala', ¿chi'negue queta' se seshit shiguegue qami' nagui? Ma' ỹim shinac se seten 'eno'm saanec da ñachaalataxac caqami'.
38Ca' so Jesús 'naaco' queso'maxare:
—¿Ỹaatqajam lliqueta quiyim shichi' 'ỹaañirec da nachaalataxaqui' caỹim? Ỹaatqajam llic da shinac caqami', ma' saqa' noỹen ca huaqa'e, ca' qami' shi'gue tres pilliralec quiyim 'ñirac sqai huañirapega aỹim.
Currently Selected:
Juan 13: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.