Juan 10
10
Qaraloqojnaxañigui aso lahi' ana qagreta
1Ỹaatqajam lliqueta dá'maq shinac caqamiri, quiyim cá'maq sqa taatougui ca lasom aca lahi' ana qagretaipi quiyim inoxono, ta'ta'a quiyim ỹoqa'a ca taatou'e, ca' chaqaica cá'maq cuataxai chaqai huootaxanaxai. 2Qam cá'maq taatougui ca lasom, ca chaqaica cá'maq qagreta lo'o cá'maq reloqota'a ana qagretaipi. 3Cá'maq lasom lo'o ỹauachigui ca lasom, qaiyi inoxono, chaqai ana qagretaipi no'uenegue da lavillaxac. Ma' roỹaxanta'gue na leenaxat ana qagretaipi, ca ỹauegue'oguiyi cañi lahi'. 4Ca ma' ime quiyim ỹachaxanec cañi lahi' ná'ogue ana lalo qagretaipi, ca' eec, 'auetauec cana'maxare, chaqai aná'maq qagreta coỹaretaho queso'maxare, ma' ỹa'den da lavillaxac so'maxare. 5Ma' sqai quegue cá'maq se iuanapega; lama'xa 'eetapeguem ca'maxare, ma' la'la'a cá'maq lavillaxac cá'maq se iuanapega.
6So Jesús ỹa'uo' da laloqojnaxanaxaqui, qam saua'maxare se ỹa'deene' dá'maq reloqo'tegue dá'maq 'naac so'maxare.
So Jesús chaqaiso só'maq ỹaatqajam ỹa'den reloxaỹa'a ana qagreta
7So Jesús lotqai liỹo' 'naac queso qomyipi:
—Ỹaatqajam llic da shinac caqamiri: Ỹim ná'maq ỹim lasom lligo ana qagretaipi. 8Ca sá'ogue só'maq na'au caỹim nodaachiguiñi cuataxaiquipi chaqai huootaxanaxairipi, qam ana qagretaipi se na'xaỹaxana so'maxare. 9Ỹim ná'maq ỹim lasom; cá'maq inoxontougui aỹim, ca' ca'laaxaic ma'le. Ca 'nejem ma'le aca qagreta quena' inoxono chaqai quiyim nenoxonec cañi lahi', ca' ỹanata ca 'uaqapi.
10Ca cuataxai chaqaidaata naga'a da locuataxac, lalauataxanaxac, chaqai da leuacqataxanaxac; qam ỹim ñanac, qaiyi 'ue da lca'laxa na'maxare, chaqai 'xoic ma'le da lca'laxa. 11Ỹim ná'maq ỹim no'uen qagreta lo'o. Cá'maq no'uen qagreta lo'o ỹaanec da nachaalataxac cana qagretaipi. 12Qam cá'maq chi ro'ueenataxanteguelec aca nishiuete, ca'maxare quiyim idaana'guit cá'maq toxonaxai, ca 'eet, no'ueenaqchichiguiñi ca qagretaipi, ma' ca'maxare mesqai ỹaatqajam qagreta lo'o, ma' mesqai lalamaxarete ana'maxare. Ca cá'maq toxonaxai retoxoñigui ana qagretaipi, ca neuagaxatac nqai'en. 13Ca' sojo ỹale 'eet, ma' qacaata aca nishiuete ỹahinteguelec, ca' qaica ca ỹauaaque ná'maq qagretaipi.
14-15Ỹim ná'maq ỹim no'uen qagreta lo'o. Ca' chaqaida dá'maq 'neeta quiyim iuañiua' ñi ita'a, chaqai aỹim seuana ñi'maxare, ca' chaqaida 'nejem quiyim ỹim sa'deenta ana ilo qagretaipi, chaqai ana'maxare ya'deenta. Chaqai aỹim saanougui da ñachaalataxac aná'maq qagretaipi. 16Qai'neeta 'ue ana liỹa ilo qagretaipi sqai neetaugui anajo ilo lahi'. Ana'maxare qai'neeta sahotaque ño'deho. Na'maxare qai'neeta na'xaỹaxañiua' ma'le, qaiyi 'oonoqui' ca lapooqo', chaqai 'oonoqui' ca neloxoỹaq.
17Ñí'maq ita'a ỹaatqajam nqo'ta ỹim, ma' ỹim saanec da ñachaalataxac, qam ma'le liỹa secoñiguit. 18Qaica cá'maq rouootaxana'gue da ñachaalataxac, qam chaqaỹim ná'maq saanec. 'Ue da iquesaxanaxa quiyim saanec chaqai quiyim liỹa secoñiguit. Ca' dajo dá'maq chaqai llilnataxanaxac ñí'maq ita'a.
19Ca co'na' so judioipi 'xaỹa dajo na'qaatec, ca lotqai ỹoricchi na la'deenataxanaxac. 20Ca 'xoico' só'maq 'naaco' quen:
—¿Chi'negue dá'maq na'xaỹaxañitapega, ma' 'ue ñi neetagui chicqo'ot so na'ỹaapec, chaqai mashic quishiuguet?
21Qam 'uo' quen na liỹa 'naac:
—Qaica ca qom quiyim neetagui ca chicqo'ot so na'ỹaapec 'nejem dajo da ỹa'xat. Ca ¿peeta'a ca chicqo'ot so na'ỹaapec ishito' quiyim nauanñi nqai'en ca qai'laq?
So judioipi se icoñiguit so Jesús
22Mashic no'oomoxo' na'le, ca' quiyi Jerusalén 'uo' so nemaqachic quiyim qaỹo'leentetaque so na'xa'a co'na' qoỹaanot ñi qota'a añi no'ueenaxanaxaqui. 23Ca' so Jesús ỹouoxontaco' añi no'ueenaxanaxaqui, quiyí'maq qohinac nasoxoc so Salomón. 24Ca' so judioipi lapoỹaho' na'le, ca qohinaco' queso'maxare:
—¿Chi' laquio' quiyim ỹaatqajam nachaxañitalo qomi'? No'm chaqaqami' ná'maq qami' nashi nca'laxaqui, ca 'maxaraic quiyim 'qaataxañitalo qomi', ca' yí.
25Ca' so Jesús 'naaco' queso judioipi:
—Mashic shi'gue sa'qaataxanalo qamiri, qam qamiri sqai viilec aỹim. Ná'maq ỹo'ueenatqaipi chaqaina ná'maq ỹamaxailec ñi ita'a, ca' chaqainaua nauá'maq 'ec ra'qaataxantapegalo qamiri. 26Qam qamiri sqai viilec, ma' mesqai qamiri nauá'maq iloxoiqateguese qagretaipi. Ca' chaqaida dá'maq shi'gue shinac caqamiri. 27Ma' aná'maq iloxoiqateguese qagretaipi ỹa'den da ivillaxac, chaqai ỹim sa'den, chaqai ana'maxare coỹareta'pegue' aỹim. 28Ca' ỹim saanem da lca'laxa sqaica lqodoc. Ca tot ileu, chaqai qaica quet cá'maq ishit rouootaxana'gue cana ñapoquena. 29Ma' nañaañim ñi ita'a. Ñi'maxare ỹapacauec quená'ogue, chaqai qaica ca ishit rouootaxana'gue cada napoquena ñi'maxare. 30Ỹim chaqai ñi ita'a qomi' 'oonoqui'.
31Co'na'le, ca so judioipi lotqai iconapega na qa' quiyim ỹahotaque inaq so'maxare. 32Ca' so Jesús 'naaco':
—Ỹim ỹaatqajam 'xoic ná'maq so'uet ỹa'maqachiguiñi, huañichigui qamiri, sachigoxochichigui da lquesaxanaxa ñi ita'a. Ca ¿negue' cá'maq sasoualec quena'maxare quiyim viitaque yinaxahi quena qa'?
33Ca' so judioipi 'naaco':
—Qaica quet cá'maq 'em senaqsoq qami' quena qa' quená'ogue ná'maq ỹa'maqachiguiñi 'viichi', ta'ta'a quiyim qami' napaquiralec ñi qota'olec quenaua ra'qaataxahi'. Ma' qami' chaqaiqami' qom, qam chi no'viichiseguelta' quiyim qami' qota'olec.
34Ca' so Jesús 'naaco' queso qomyipi:
—Queda naqataxac caqamiri naneretañi quiyim ñi qota'olec 'naac: “Qamiri, qamiri qota'olqa.” 35Qam qomi' sa'deenqata quiyim naua naneresañi la'qaatqa ñi qota'a naua'maxare sqaica ỹoqolliguite', ma' quiyim ñi qota'olec ỹamata'gue qota'olqaipi só'maq icoñiguit da la'qaatec. 36Chaqai no'm ñi qota'olec ỹoỹoote'oga ỹim, ca yilata na 'laua, ca ¿negue' quet cá'maq 'neeta quiyim 'ñiỹac ñapacalec ñi'maxare quiyim shinac ỹim llaalec ñi qota'olec? 37No'm se so'ueete' nauá'maq ỹo'ueeteta'pe ñi ita'a, ca sqai viilec aỹim. 38Qam no'm so'ueeteta'pe, 'eno'm sqai viilec aỹim, qam viilgoto nauá'maq so'ueeteta'pe, qaiyi ỹaatqajam 'yiiñita quiyim ñi ita'a hueetagui aỹim, chaqai ỹim seuetagui ñi'maxare.
39Ca lotqai liỹa qaỹahotaque qaicoñi' so Jesús, qam qohitauec.
40Co'na'le, ca so Jesús pilegue da lahi aso lachiugue Jordán ca pa'aata'gue da lqodoigue, yí'maq hua'ño' na'le na' rachilaxanataxantac so Juan. Ca' neeta'anyi. 41Ca 'xoico' so qom quepegue' yí'maq hueeta'ñi so'maxare. Ca 'naaco' quen:
—Ỹaatqajam llic quiyim so Juan, 'eno'm qaica ca ỹo'uet quena netanqaipi se qaiuanapega, qam dá'ogue dá'maq 'naac na'le quedajo ỹale ỹaatqajam lliqueta.
42Ca 'xoico' na huelec so Jesús na'le quiyi'maxare.
Currently Selected:
Juan 10: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.