3 Juan 1
1
Dá'maq 'maxaraic na'qaataxac so Gayo
1Ỹim, mashic aỹim ñauapec na'gaxala', selata qami' ana ỹerecse, ma' qami' ñauochaxaua Gayo, ma' ỹaatqajam llic qami' ỹoqo'itaxat.
2Qami' ñauochaxaua ỹaqaỹa, queda ñqouagaxainaxac sahotaque quiyim 'maxaraic ná'ogue ná'maq 'viichisac, chaqai quiyim qaicanqaida queda nachaalataxaqui', quiyim 'nejem dá'maq 'maxaraic no'ueenataxaqui'. 3Ma' 'xoic da ñitoonaxac na' 'vii saua qarqaỹa' novite', na' ỹa'xatesapiguim dá'maq raqamaxa'e', ma' ỹaatqajam qui'salec da na'qaatec lliqueta. 4Qaica quet cá'maq paguec ỹo'uet ca ñitoonaxac, ta'ta'a quiyim sa'den quiyim na ỹaalqaipi queetalec dá'maq ỹaatqajam lliqueta.
5Qami' ñauochaxaua ỹaqaỹa, ỹaatqajam 'maxaraic dá'maq 'ñiisari' quiyim quelollita na qarqaỹaripi, qam paguec la'maxa quená'maq ỹoqa'a ca chicqa'gue. 6Ma' na'maxare ra'qaataxantapeguem ná'ogue ná'maq mashic icoñiguit da na'qaatec quená'maq senta'ñi, ỹa'xatetac da re'xorenataxanaxa'e' quena'maxare. Ca' qouaquiric tauañi' quecá'maq ỹouentaque, qaiyi liỹa quelec dá'maq llicyaxac. Qam quedá'maq 'ñiitetegue, ca' ỹa'maxarenta ñi qota'a. 7Ma' na'maxare queetalec da llicyaxac ro'ueenataxantacot so Jesucristo, ca' sqaca aca icoñiguit caná'maq lotaanaxanqate ná'maq se iuanapega ñi qota'a. 8Vichiguiño' qomi' ñomatqalta' quiyim sotauanaq na'maxare, quiyim sotauanaq queda la'qaataxanaxac quiyim ỹa'xate' da na'qaatec ỹaatqajam lliqueta.
Da se ỹa'maxañi no'ueenataxac so Diótrefes
9Ỹim 'ue aso shiriñi ilaata selata yí'maq mashic icoñiguit da na'qaatec. Qam ca Diótrefes se na'xaỹaxana da qarelaataxanaxac, ma' ca'maxare nqo'ta quiyim qaicaata na'gaxala' quiyi'maxare. 10Ca' vichiguiño' no'm shic, ca' ño'lashiguim da'maxare quedá'maq 'neetari' ỹa'xatetac na la'axaic chaqai na'majanteguelgoto qomi'. Qam se ỹa'maxagui lauel quedajo, ma' qai'neeta se icoñiguit ná'maq qarqaỹaripi ỹoviretapego. Chaqai ná'maq ỹahotaque icoñiguit na'maxare, ca se ỹa'maxaren. Ca' se ỹasenem chaqai ỹo'daauec ca'e nqai'en ná'maq mashic icoñiguit da na'qaatec.
11Qami' ñauochaxaua ỹaqaỹa, 'neeto' lotqai quire'uegue da se no'uen 'ueenataxac. Ta'ta'a dá'maq ỹaatqajam no'uen. Cá'maq ỹo'uet ca ỹa'maqachiguiñi, ca'maxare lalamaxaret ñi qota'a, qam cá'maq ỹo'uet ca se no'uen, ca' se iuana ñi qota'a.
Dá'maq no'uen no'ueenataxac so Demetrio
12Ná'ogue ỹaatqajam lo'yaxanec da la'qaataxanaxac quena' ỹa'xatetac ca Demetrio, chaqai qai'neeta dá'maq na'qaatec ỹaatqajam llic ỹa'xat dá'maq no'uen no'ueenataxac ca'maxare. Chaqai qomi' qai'neeta sa'xatqatac dajo, chaqai qamiri 'yiiñita quiyim llic dá'maq sa'xatqatac.
Dauá'maq pa'aaterec na'qaatqa
13Ỹim 'xoic quet ná'maq sa'xat caqami', qam se sa'maxaren quiyim sahota'ahi caua ỹirqa. 14Ma' ñauaanta'a quiyim qaỹaloq ñiuanaqta', ca' ma'le, ca' ỹaatqajam setaxaiqa'ajta'.
15Ca' sahotaque quiyim 'ue ca reuagaxa'e'. Ná'ogue na qarqaỹaripi neeta'ñi najo ilata qami' da liquinaxanaxac. Qouaquiric 'ỹaañirec ma'le da iquinaxanaxac quiñi 'óna quena qarqaỹaripi.
Currently Selected:
3 Juan 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.