Levítico 25
25
Chakrakunata samachinamanta
1Señor Diosmi Moisesta Sinaí orqopi khaynata niran:
2—Israelpa miraynin runakunata khaynata nimuy: Chay qonay allpaman haykuspaykichisqa huk watan allpataqa samachinkichis, noqa Señor Diospa kamachisqayta cumplinaykichispaq. Saynapin respetawankichis. 3Soqta watan chay allpapiqa tarpunkichis; chay soqta watakunapin uvas plantaykichistapas podankichis; hinallataq ruruntapas pallankichis. 4Ichaqa qanchis kaq watapin chay allpataqa noqa Señor Diospaq samachinkichis. Chay watapiqa aman imatapas tarpunkichishchu nitaq uvas plantaykichistapas podankichishchu. 5Qankuna dueñokuna, chakraykichispa samasqan watapi kikillanmanta wiñamuq trigotaqa aman cosechankichishchu. Nitaqmi uvas plantapa ruruntaqa pallachinkichu. Chay qanchis kaq wataqa enteron watan allpa samananpaq wata kanqa. 6Chay samana watapi kikillamanta chakraykichispi wiñaspa rurusqantaqa mikhunkichismi qankuna, sirvienteykichiskuna, qankunapaq llank'aq runakuna hinallataq qankuna ukhupi tiyaq huk law *nacionniyoq runakunapas. 7Saynallataqmi animalniykichiskunapas hinallataq salqa animalkunapas chay chakrapa rurusqantaqa mikhunqaku.
Jubileo nisqa watamanta
8Qankunaqa yupankichismi qanchis watakunata qanchis kutikama. Saynapin chay yupasqaykichis watakunaqa llapanpi tawa chunka esqonniyoq watakuna kanqa. 9Hinaspan qanchis kaq killapi chunka kaq p'unchawpi, Hucha Perdonana P'unchaw chayamuqtin, enteron *nacionniykichispi trompetakunata tocankichis. 10Pishqa chunka kaq watataqa noqa Señor Diospaqmi sapaqchankichis. Chay wataqa imapas libre kananpaq *Jubileo nisqa kusikunaykichis watan kanqa. Chay watapiqa sapankamaykichismi chay vendesqaykichis chakraykichistapas kaqmanta hap'ikapunkichis. Saynallataqmi sirvienteykichiskunapas libreña qepanqaku. Hinaspan paykunaqa sapankama familiankuman kutipunqaku. 11Chay pishqa chunka kaq wataqa kusikunaykichis Jubileo Watan kanqa. Chay watapiqa aman tarpunkichishchu. Nitaqmi cosechankichispashchu kikillanmanta chakrapi wiñamuqtapas. Nitaqmi uvas plantaykichistapas podankichishchu nitaq ruruntapas pallankichishchu. 12Chay wataqa kusikunaykichis Jubileo Wata kasqanraykun qankunapaq ch'uya kanqa. Chay watapiqa chakraykichispi kikillanmanta wiñaqkunapa rurusqantan mikhunkichis.
13Kusikunaykichis Jubileo Watapiqa Israelpa miraynin runakunan sapankamaykichis ñawpaq vendesqaykichis chakraykichista hap'ikapunkichis. 14Sichus pipas imatapas rantinqa otaq imatapas vendenqa chayqa, amayá runamasiykichistaqa engañankichishchu nitaq trampata ruwaspaqa imantapas qechunkichispashchu. 15Sichus pipas runamasinmanta chakrata rantinqa chayqa, Jubileo Watakama hayk'a wataraqsi faltashan libre kananpaq, chayman hinan paganqa. Saynallataqmi chay chakrata vendeq dueñonpas, chay chakramanta hayk'a cosechataraqsi cosechanqa asta libre kanan watakama, chayman hinan vendenan. 16Sichus ashka wataraq faltanqa Jubileo nisqa wata chayamunankama chayqa, preciontan yapanan. Ichaqa pisi watakunallaña faltanqa chayqa, chay chakrapa precionqa bajasqan kanan. Chay chakraqa vendesqa kanqa hayk'a cosechataraqsi cosechanqaku chay chakramanta chayman hinallan. 17Aman pipas runamasintaqa engañanqachu nitaq trampata ruwaspaqa imantapas qechunqachu. Aswanqa Diostan manchakunaykichis. Noqaqa Señor Diosniykichismi kani.
18Qankunaqa noqapa kamachisqay leykunataqa ruwaymanyá churaychis. Chay kamachisqay leykunata cumplispan qankunaqa kay allpa pachapi unay watata hawkalla kawsankichis. 19Chay allpaqa allintan rurunqa. Chaymi qankunaqa saksanaykichiskama mikhunkichis. Saynallataqmi chay allpapiqa hawkalla tiyankichis. 20Ichapas qankunaqa tapukuwaqchispashchá khaynata: Sichus mana ni imatapas tarpusaqkuchu nitaq cosechasaqkupashchu chayri, ¿imatataq chay qanchis kaq watapiri mikhusaqkú? nispa. 21Noqaqa soqta kaq watapin anchata bendecisqaykichis. Chaymi allpaykichisqa kinsa wata mikhunaykichispaq rurupusunkichis. 22Chayraykun soqta kaq watapi cosechasqaykichistaqa pusaq kaq watapi tarpuspaykichispas mikhunkichisraq. Hinaspapas chay soqta kaq watapi cosechasqaykichistaqa esqon kaq watapi cosechanaykichiskaman mikhunkichis.
23Aman ni pipas wiñaypaqqa allpataqa vendenqachu, noqa Señor Diospa kasqanrayku. Qankunaqa huk law nacionniyoq forastero runakuna hinallan allpaypiqa tiyashankichis. 24Chaymi chay tiyasqaykichis enteron nacionpiqa allpanta vendekapuq runaqa rantikapuyta munaspaqa, rantikapullanman.
25Sichus llaqtamasiyki runa wakchayaruspa allpanta venderunqa chayqa, huk kaqnin cercano familianmi chay vendesqan allpataqa pagaspa recuperanqa. 26Sichus allpanta vendekapuq runapa mana ni pi familianpas kanchu, ichaqa qolqetataq huñurunman chay allpanta recuperakapunanpaq chayqa, 27chay runaqa vendesqan watamanta hayk'a watañas pasarun chaytan yupanan. Hinaspan Jubileo Watapi chay chakra libre kananpaq hayk'a wataraqsi faltashan, chay faltasqan watakunallamantaña pagapunqa. Saynapin payqa chay allpanman kutipunqa. 28Ichaqa chay chakranta recuperananpaq qolqeta mana conseguinqachu chayqa, chay chakra rantikuq runan chay chakrawanqa qepakapunqa asta Jubileo Watakama. Chay wata chayamuqtinñan, chay chakraqa libre qepanqa. Chayñan chay chakra vendekapuq runaqa allpanta hap'ikapunqa.
29Sichus pipas perqawan muyuchisqa llaqta ukhupi wasinta venderun chayqa, chay wasin vendeq runapaqmi kaqmanta rantikapunanpaq huk watalla plazo kanqa. 30Sichus chay vendesqan wasita manaraq wata cumplikushaqtin mana rantikapuyta atinqachu chayqa, chay wasita rantikuq runan mirayninkunapiwan wiñaypaq chay wasiwanqa qepakunqaku. Chaymi chay wasiqa manaña libreñachu kanqa Jubileo Wata chayamuqtinpas. 31Ichaqa sichus huk llaqtacha kanqa muyuriqninpi mana perqayoq chayqa, chay llaqtachapi wasikunaqa campopi chakrakuna hinallan kanqa. Chayraykun wasinta vendeq runapas kaqmanta chay wasitaqa rantikapullanman. Hinaspapas chay wasikunataqa Jubileo Wata chayamuqtinmi, dueñonman kutichipunqaku.
32Ichaqa *Leví ayllumanta runakunaqa ima tiempokunapipas atinkumanmi llaqtankupi wasi vendesqankutapas rantikapuyta. 33Sichus pipas Leviypa miraynin runakunapa llaqtanpi huk wasita rantikunqa chayqa, Jubileo nisqa Watapiqa rantisqan wasimantaqa lloqsipunanmi. Chay llaqtapi kaq wasikunaqa otaq imapas kaqkunaqa Leví ayllu runakunapan. Manan Israelpa wakin miraynin ayllukunapachu. 34Ichaqa Leví ayllu runakunapa llaqtankupa muyuriqninpi kaq allpakunataqa manan vendenankuchu, chay allpakunaqa paykunallapaq wiñaypaq kasqanrayku.
35Sichus huk llaqtamasiyki runa wakchayaruqtin mana imanpas kawsananpaq kanqachu chayqa, chay runataqa yanapanaykin imaynan huk law llaqtayoq otaq forastero runatapas yanapawaq chay hinata. Saynapin chay runaqa qankuna ukhullapi tiyanqa. 36Aman qolqeta prestaspaykiqa “interesnintinta kutichipuway” ninkichu. Aswanqa noqa Señor Diosniykita manchakuway. Saynapin chay runaqa qankuna ukhullapi tiyanqa. 37Aman interesniyoqtachu qolqeykitaqa prestanki. Saynallataq ima mikhunata qospapas, aman “masniyoqta kutichipuway” nispachu ninki. 38Noqaqa Señor Diosniykichismi kani. Noqan qankunataqa Egipto *nacionmanta orqomuraykichis, Canaán nación allpata qonaypaq hinallataq qankunapa Diosniykichis kanaypaq.
39Sichus mayqen kaq llaqtamasiyki runapas wakchayaruspa pay kikin qanman vendekusunki chayqa, chay runataqa amayá huk *esclavota hinachu llank'achinki. 40Aswanyá paytaqa uywakusqayki runata hina otaq huk law nacionniyoq runata hina tratanki. Chay runaqa *Jubileo nisqa Wata chayamunakamallan llank'aspa servisunki. 41Chay Jubileo Watapin chay runaqa wawankunantin libre qepanqa. Hinaspan paykunaqa kutipunqaku familiankupa kasqanman hinallataq familiankupa allpanman ima. 42Israelpa llapallan miraynin runakunataqa noqa Señor Diosmi Egipto nacionmanta orqomurani noqata serviwanankupaq. Chayraykun paykunaqa mana huk esclavo hinachu vendesqa kananku. 43Amayá qanqa millay patronkuna hinachu paykunataqa tratanki. Aswanyá noqa Señor Diosniykita manchakuspa kawsanki.
44Sichus esclavota otaq esclavata rantiyta munaspaqa, huk law nacionniyoq runakunamantan rantikamunayki. Chay esclavoykikunaqa huk law nacionniyoq runakunan kananku. 45Saynallataqmi qankunaqa rantillawaqchistaq llaqtaykichispi tiyaq huk law nacionniyoq runakunatapas hinallataq paykunamanta nacemuqkunatapas, qankunapa esclavoykichis kananpaq. Chay runakunaqa qankunapan kanqa rantikusqaykichisrayku. 46Chay esclavo runakunataqa saqewaqchismi huk herenciata hina wawaykichiskunamanpas, saynapi paykunata tukuy tiempo servinankupaq. Ichaqa llaqtamasiykichis Israelpa miraynin runakunataqa amayá millay patronkuna hinachu tratankichis.
47Sichus qankunawan tiyaq huk forastero runa qapaqyarunman, hinaqtinñataq huk llaqtamasiyki runa wakchayaruspa esclavo kananpaq vendekunqa chay forastero runaman otaq chay runapa familianman chayqa, 48chay llaqtamasiyki runaqa derechoyoqmi rescatasqa kananpaq. Chayraykun paytaqa mayqen kaq familianpas rescatanman. 49Tionpas, primonpas otaq mayqen kaq cercano familianpas rescatanmanmi. Saynallataq sichus chay runapa qolqen kaqtinqa, pay kikillanpas atinmanmi rescatakuyta, amaña esclavo kananpaq. 50Chay kikinta vendekuq runaqa rantiqnin runapiwanmi yupanqaku chay rescatasqan watamanta asta Jubileo Watakama. Hinaspan libre kananpaq precionta churanqaku hayk'a wataraqsi Jubileo Wataman faltashan chayman hina. Hinaspapas huk llank'apakuq runapa ganasqanta hinan paganqa. 51Sichus ashka watakunaraq faltanqa Jubileo nisqa watapi libre kananpaq chayqa, chay faltasqan watakunaman hinan rantiqnin runaman ashka qolqenta kutichipunqa. 52Sichus ishkay kinsa watakunallaña faltanqa Jubileo Watapi libre kananpaq chayqa, rantiqnin runamanmi calculaspa pagapunan faltasqan watakunaman hinallaña, saynapi rescatasqa kananpaq. 53Qankunaqa allintan qawanaykichis imaynatachus chay forastero runa rantisqan llaqtamasiykichis runata tratasqanta. Qankunaqa aman permitinkichishchu chay llaqtamasiykichis runa maltratasqa kanantaqa. Aswanmi payqa watan-watan contratopi llank'apakuq runa hina tratasqa kanan.
54Sichus chay vendekuq llaqtamasiyki runata mana ni pipas rescatanqachu nitaq kikinpas libre kayta atinqachu chayqa, Jubileo Watapin payqa wawankunapiwan libre qepanqaku. 55Qankuna Israelpa miraynin runakunaqa, noqa Señor Diostan serviwanaykichis. Noqan qankunataqa Egipto nacionpi esclavo kasqaykichismanta orqomuraykichis. Noqaqa Señor Diosniykichismi kani.
Currently Selected:
Levítico 25: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
