Éxodo 17
17
Qaqamanta unu lloqsimusqanmanta
(Nm 20.1-13)
1Israelpa miraynin runakunaqa llapallankun grupo-grupopi asta-astarikuspa, “Sin” nisqa ch'inñeq desierto lugarmanta lloqsiranku, Diospa kamachisqanman hina. Hinaspan Refidim nisqa lugarman chayaspa, chaypi samaranku. Ichaqa chay lugarpiqa manan unuqa karanchu paykuna tomanankupaqqa. 2Chaymi Israelpa miraynin runakunaqa anchata phiñakuspanku, Moisesta reclamaranku khaynata:
—¡Unuta qowayku tomanaykupaq! nispanku.
Hinaqtinmi Moisesqa paykunata niran:
—¿Imanaqtintaq qankunari noqata reclamawashankichís? Qankunari, ¿imanaqtintaq mana confiankichishchu Señor Diospirí? ¿Imanaqtintaq Señor Diostari reclamashankichís? nispa.
3Ichaqa paykunaqa unumanta nishu ch'akisqan kasharanku. Chaymi Moisespa contranpi rimaspanku, khaynata niranku:
—¿Imapaqtaq Egipto *nacionmantari orqomuwarankikú? ¿Noqaykuta, wawaykuta hinallataq animalniykutapas ch'akiymanta wañuchiwanaykikupaqchu orqomuwarankikú? nispanku.
4Chaymi Moisesqa Señor Diosmanta mañakuran khaynata:
—Diosnilláy, kunanri, ¿imatataq kay runakunawanri ruwasaq? ¡Ashllatawanqa rumiwan p'anaspachá wañurachiwanqaku! nispa.
5Chaymi Señor Diosqa Moisesta niran:
—Israelpa miraynin runakunapa wakin lidernin runakunata pusarikuspa ñawpay. Hinaspapas Nilo mayuta waqtasqayki bastonniykitapas aparikullaytaq. 6Noqaqa Horeb nisqa qaqa rumipa hawanpin qanwan kashasaq. Hinaspan bastonniykiwan chay rumita waqtanki. Chaymi chay rumimanta unu lloqsimunqa, llapallan runakuna tomanankupaq, nispa.
Hinaqtinmi Moisesqa pusasqan liderkuna rikushaqtin, Señor Diospa kamachisqanman hina ruwaran. 7Hinaspan chay lugartaqa suticharanku Meriba nisqa sutiwan. Saynataqa suticharanku, Israelpa miraynin runakuna Diosta phiñallaña reclamasqankuraykun. Hinaspapas chay lugartaqa sutichallarankutaqmi “Masah” nisqa sutiwanpas. Saynataqa suticharanku Israelpa miraynin runakuna Diospi mana confiasqankuraykun. Paykunaqa khaynatan niranku: “Señor Diosri, ¿noqanchiswanchu kashan icha manachú?” nispanku.
Israelpa miraynin runakuna amalecita runakunawan guerrapi peleasqankumanta
8Amalecita runakunan hamuranku Refidim nisqa lawman, chay lugarpi Israelpa miraynin runakunawan peleanankupaq. 9Hinaqtinmi Moisesqa Josueyta kamachiran khaynata:
—Noqanchis ukhumanta wakin runakunata akllay. Hinaspa amalecita runakunawan peleaq lloqsiy. Noqaqa paqarin p'unchawmi orqopa puntanpi kasaq Diospa bastonninta hap'iyukuspay, nispa.
10Hinaqtinmi Josueyqa chay akllasqan runakunapiwan Moisespa kamachisqanman hina, amalecita runakunawan peleanankupaq riranku. Moisesñataqmi wawqen Aaronpiwan hinallataq Hur sutiyoq runapiwan ima orqopa puntanman wicharanku. 11Hinaqtinmi Moisés makinta altoman oqariqtin, Israelpa miraynin runakuna venceyta qallariranku. Ichaqa makinta urayachiqtintaqmi amalecita runakuna venceyta qallarimuranku. 12Chaymi Moisespa makinkuna pisiparuqtin, paykunaqa huk rumita churaranku, chay rumipi Moisés tiyananpaq. Hinaqtinmi Aaronwan hinallataq Hur sutiyoq runapiwan Moisespa brazonkunata altopi sosteniranku. Hukninmi phaña brazonta sosteneran, hukninñataq lloq'e brazonta. Saynapin Moisespa brazonkunaqa intipa haykunankama altollapi karan. 13Hinaqtinmi Josueyqa akllasqan runakunapiwan guerrapi peleaspa, amalecita runakunata *espadawan wañuchispa venceranku.
14Chaymi Señor Diosqa Moisesta khaynata niran:
—Escribiy kayta huk libropi, saynapi ama qonqanaykichispaq. Hinaspa Josueyta niy khaynata: “Noqa Señor Diosmi llapallan amalecita runakunata kay pachamanta chinkachipusaq”, nispa.
15Hinaspan Moisesqa huk altarta ruwaspa, chay altarta suticharan Jehová nisi sutiwan. [Nota: Hebreo rimaypiqa Jehová nisi sutiqa, “Señor Diosmi banderay” ninantan nin.] 16Hinaspan Moisesqa khaynata niran:
¡Señor Diospa banderanta makinchispi hap'isunchis!
¡Señor Diosmi amalecita runakunawanqa
hinallataq mirayninkunawanpas,
wiña-wiñaypaq peleanqa! nispa.
Currently Selected:
Éxodo 17: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
