يُواْوٜىٰلْ 2
2
بَلَعِنْ ڢَارِ عَلَمَرْ ذُوَانْ رَانَرْ يَهْوٜىٰهْ
1كُبُوسَ ڧَهُواْ أَ سِهِيُواْنَ،
كُيِ إِيهُ عَكَنْ بَبَّنْ تُدُنَ مَيْ ڟَرْكِے!
بَرِ دُكَنْ مَذَوْنَنْ ڧَسَرْ سُڢِرْغِتَ،
غَمَا رَانَرْ يَهْوٜىٰهْ تَنَ ذُوَا
كُمَ رَانَرْ تَيِ كُسَ؞
2رَانَ ثٜىٰ تَدُهُ دَ دَامُوَ،
رَانَرْ غِذَغِظَيْ دَ بَڧِنْ دُهُ؞
كَمَرْ دُهُنْ غِذَغِظَيْ يَرُڢٜىٰ دُكَنْ تُدَّيْ،
حَكَ ضُنْدُنَارْ سُواْجُواْجِ مَيْ ڧَرْڢِے تَنَ ذُوَا،
إِرِنْ دَ بَعَتَٻَ غَنِنْتَ بَ،
بَذَاعَ كُمَ سَاكٜىٰ غَنِنْ إِرِنْتَ بَ،
دَغَ ڟَارَا حَرْ ذُوَا ڟَارَا؞
3وُتَا تَنَثِ أَغَبَنْسُ
عَبَايَنْسُ كُمَ هَرْشٜىٰنْ وُتَا يَنَ ڧُونَ؞
أَغَبَنْسُ ڧَسَرْ كَمَرْ غُواْنَرْ عَيْدَنْ نٜىٰ،
عَمَّا بَايَنْدَ سُكَ وُثٜىٰ،
سَيْ تَذَمَ دَاجِ عِنْدَ بَابُ كُواْوَ؞
لَلَّيْ بَابُ أَبِنْدَ ذَيْ ڟِيرَا دَغَ غَرٜىٰسُ؞
4صِڢَّرْسُ كَمَرْ تَدَوَكِ تَكٜىٰ،
سُنَ غُدُ كَمَرْ دَوَكِنْ يَاڧِ؞#رُعُيَ 9.7-9
5يَدَّ سُكٜىٰ ڟَلّٜىٰ ڟَلّٜىٰ عَكَنْ تُدَّيْ،
ڧَارَرْ مُواْڟِنْسُ كَمَرْ تَكٜىٰكُنَنْ يَاڧِ ثٜىٰ،
كَمَرْ ڧَارَرْ هَرْشٜىٰنْ وُتَا مَيْ ثِنْ ثِيَوَ،
كَمَرْ مُتَنٜىٰ مَاسُ ڧَرْڢِے أَ جٜىٰرٜىٰ دُواْمِنْ يَاڧِ؞
6دَ غَنِنْسُ، مُتَنٜىٰ سُكَنْ ڢِرْغِتَ،
دُكَنْ ڢُسْكُواْكِ سُكَنْ ٻَثِ؞
7سُكَنْ أَوْكَ كَمَرْ مَاسُ يَاڧِ
سُكَنْ هَوْ بَنْغُواْ كَمَرْ سُواْجُواْجِ؞
سُكَنْ تَاكَ دَيْدَيْ أَ لَيِ لَيِ،
بَابُ مَيْ كَوْثٜىٰوَ؞
8بَاسَ شِغَ حَنْيَرْ جُونَ،
كُواْوَ يَنَ بِنْ لَيِنْسَ؞
سُكَنْ رَڟَا ڟَكَانِنْ أَبُواْكَنْ غَابَا
عَمَّا بَابُ مَيْ ڟَيْ دَسُو؞
9سُكَنْ كَيْ دَ كَٰوُاْوَ عَبِرْنِنْ،
سُكَنْ غُدُ عَكَنْ كَتَنْغَ؞
سُكَنْ هَوْ سُشِغَ غِدَاجٜىٰ،
سُكَنْ شِغَ تَغُواْغِ كَمَرْ ٻَرَيِ؞
10أَغَبَنْسُ ڧَسَا تَكَنْ غِرْغِظَ،
سَمَّيْ سُكَنْيِ ضَوَرْ جِكِے؞
رَانَ دَ وَتَ سُكَنْ جُويٜىٰ دُهُ،
تَوْرَرِ سُكَنْ دَيْنَ حَصْكَكَاوَا؞#رُعُيَ 8.12
11دَ مُرْيَرْسَ مَيْ ڧَرْڢِے،
يَهْوٜىٰهْ يَا عُمَرْثِ سُواْجُواْجِنْسَ؞
إِنَا مِصَالِنْ يَوَنْ سُواْجُواْجِنْسَ!
سُواْجُواْجِ مَاسُبِيَيَّ دَ عُمَرْنِنْسَ
سُنْڢِے غَبَنْ ڧِرْغٜىٰ؞
حَڧِيڧَ رَانَرْ يَهْوٜىٰهْ بَبَّ ثٜىٰ،
مَيْ بَادَ ڟُواْرُواْ سُواْسَيْ،
وَ ذَيْ عِيَ ڟَيَاوَا؟#رُعُيَ 6.17
كِرَا غَ تُوبَ
12إِنْجِ يَهْوٜىٰهْ،
«عَمَّا كُواْ يَنْذُ،
كُنَ عِيَ جُويُواْ غَرٜىٰنِ دَ دُكَنْ ذُوثِيَارْكُ
دَ أَظُمِ دَ كُوكَا دَ كُمَ مَكُواْكِ؞
13يَيَّاغٜىٰ رِيغُنَنْكُ بَيْ عِسَابَ،
بَرِ ذُوثِيَارْكُ تَنُونَ تُوبَرْكُ؞»
كُكُواْمَ غَ يَهْوٜىٰهْ اللَّهْ نْكُ
غَمَا شِے مَيْ أَلْحٜىٰرِ نٜىٰ مَيْ جِنْڧَيْ كُمَ،
مَرَرْ سَوْرِنْ ڢُشِے،
كُمَ مَيْ ڧَوْنَ مَرَرْ ثَنْجَاوَا،
يَكَنْ كُمَ جَنْيٜىٰ دَغَ حُكُنْثِ؞
14عِدَنْ كُكَ جُويُواْ غَ يَهْوٜىٰهْ،
وَ يَسَنِ كُواْ ذَيْ جُويَا يَثَنْجَ نِيَّرْسَ
يَبَرْ مُكُ أَلْبَرْكَ؟
مَيْ يِوُوَ ذَاكُ سَاكٜىٰ مِيڧَ
هَدَايَ تَهَڟِ دَ تَأَبِنْ شَا
غَ يَهْوٜىٰهْ اللَّهْ نْكُ؞
15كُبُوسَ ڧَهُواْ أَ سِهِيُواْنَ!
كُيِ شٜىٰلَرْ يِنْ أَظُمِنْ ڟَبْتَثٜىٰ كَنْكُ!
كُكِرَا مُهِمِّنْ تَارُواْ!
16كُتَتَّارَ مُتَنٜىٰ!
كُكٜىٰٻٜىٰ تَارُوانْ جَمَعَرْ غَ يَهْوٜىٰهْ!
كُتَارَ ڟُواْڢَڢِّ،
دَ يَارَا، حَرْ مَا دَ جَرِرَيْ!
بَرِ أَنْغُواْ يَڢِتَ دَغَ طَاكِنْسَ،
أَمَرْيَ كُمَ دَغَ طَاكِنْتَ، سُذُواْ!
17بَرِ ڢِرِسْتُواْثِے مَاسُ حِدِمَرْ يَهْوٜىٰهْ
أَڟَكَانِنْ ذَوْرٜىٰ دَ بَغَدٜىٰ سُيِ كُوكَا؞
بَرِ سُثٜىٰ «يَا يَهْوٜىٰهْ،
جِ تَوْسَيِنْ مُتَنٜىٰنْكَ؞
كَدَ كَسَا جَمَعَرْ غَادُوانْكَ سُكُنْيَاتَ،
حَرْ أَلْعُمَّيْ سُيِ مُلْكِنْسُ؞
دُوانْمٜىٰ ذَاعَ ثٜىٰ عَثِكِنْ ڧَبِيلُ
‹إِنَا اللَّهْ نْسُ يَكٜىٰ؟› »
أَلْڧَوَرِنْ يَهْوٜىٰهْ نَسَابُنْتَ ڧَسَرْ
18سَيْ يَهْوٜىٰهْ يَيِ مَرْمَرِنْ ڧَسَرْسَ،
يَكُمَ جِتَوْسَيِنْ مُتَنٜىٰنْسَ؞
19 يَهْوٜىٰهْ يَأَمْسَ وَمُتَنٜىٰنْسَ، يَثٜىٰ،
«غَاشِ إِنَ عَيْكَ مُكُ
دَ حَڟِ دَ ضُوً إِنَبِے دَ مَنْ ظَيْتُنْ،
ذَاكُ كُوَ ڧُواْشِ دَسُو؞
بَذَنْ سَاكٜىٰ مَيْدَكُو أَبِنْ كُنْيَا
غَ أَلْعُمَّيْبَ؞
20ذَنْ كَوَرْدَ ڢَارِ نٜىٰسَ دَكُو،
سُواْجُواْجِنْ أَرٜىٰوَ وَطَنْدَ سُكَ ڢَاطُواْ مُكُ؞
ذَنْ كُواْرٜىٰسُ ذُوَا بُوسَشِّيَرْ ڧَسَا مَيْ ذَاڢِ،
مَاسُ جَا غَبَ سُشِغَ تٜىٰكُنْ غِشِرِ،
مَاسُبِنْسُ عَبَايَ سُشِغَ تٜىٰكُنْ مٜىٰدِتٜىٰرٜىٰنِيَ؞
وَرِنْ غَوَوَّكِنْسُ ذَيْ تَاشِ سَمَ،
مُوغُنْ وَرِنْسُ كُمَ ذَيْ رُڢٜىٰ كُواْعِنَ؞
لَلَّيْ نِے يَهْوٜىٰهْ
نَيِ أَيُّكَنْ بَنْ مَامَاكِ!
21يَا كٜىٰ ڧَسَا، كَدَ كِڟُواْرَتَ،
كِيِ مُرْنَ دَ ڢَضٍ ثِكِ،
غَمَا نِے يَهْوٜىٰهْ
نَيِ أَيُّكَنْ بَنْ مَامَاكِ!
22يَا كُو نَمُواْمِنْ دَاجِ، كَدَ كُڟُواْرَتَ،
غَمَا ثِيَوَرْ ڢِيلَيٜىٰ سُنَ ڟِرُواْوَ،
عِتَتُوَ كُمَ سُنَ بَادَ یَیَنْسُ،
عِتَتُوَنْ ٻَوْرٜىٰ دَ نَ إِنَبِے
سُنَ ڢِتَرْدَ یَیَ عَيَلْوَثٜىٰ؞
23يَا كُو یَیَنْ سِهِيُواْنَ، كُيِ مُرْنَ،
كُيِ ڢَضٍ ثِكِ دَنِے يَهْوٜىٰهْ اللَّهْ نْكُ،
غَمَا نَبَاكُ ضُوً سَمَ نَڢَارِ،
نَكُمَ بَاكُ ضُوً دَامِنَ دَيْدَيْ لُواْكَثِنْسَ؞
24وُرِنْ بُغُنْ حَڟِ ذَيْثِكَ دَ أَلْكَمَ،
مَنْيَنْ تُلُنَ ذَاسُثِكَ حَرْ سُظُبَ،
ذَاسُثِكَ دَ ضُوً إِنَبِے دَ مَنْ ظَيْتُنْ؞»
25«ذَنْ مَيَرْدَ دُكْ أَبِنْدَ ڢَارِ
سُكَثِ ثِكِنْ شٜىٰكَرُنَّنْ،
كُواْ مَنْيَنْ ڢَارِ نٜىٰ
كُواْ ڢَارِ مَاسُ رَرَّڢٜىٰ
كُواْ وَتَ ڧُنْغِيَرْ ڢَارِ،
كُواْ كُوَ ڢَارِ مَاسُ يَٰوُاْ،
وَتُواْ بَبَّرْ ڧُنْغِيَرْ سُواْجَ دَ نَ عَيْكُواْ مُكُ؞
26دَغَ يَنْذُ ذَاكُثِ دَيَوَ كُڧُواْشِ،
سَعَنً كُيَبِے سُونَنْ يَهْوٜىٰهْ اللَّهْ نْكُ،
وَنْدَ يَيِ أَيُّكَنْ بَنْ مَامَاكِ دُواْمِنْكُ؞
بَذَاعَ سَاكٜىٰ كُنْيَتَرْدَ مُتَنٜىٰنَبَ؞
27يَا إِسْرَٰٓءِيلَ، ذَاكُ كُوَ سَنِ إِنَ تَرٜىٰدَكُو،
كُسَنِ نِنٜىٰ يَهْوٜىٰهْ اللَّهْ نْكُ،
بَابُوَنِ كُمَ؞
بَذَاعَ سَاكٜىٰ كُنْيَتَرْدَ مُتَنٜىٰنَبَ؞»
رَانَرْ يَهْوٜىٰهْ
28«بَايَنْ أَبُبُوَنَّنْ،
ذَنْ ظُبَ رُوحُنَ عَكَنْ دُكَنْ مُتَنٜىٰ؞
یَیَنْكُ مَظَا دَ مَاتَا ذَاسُيِ أَنَّبْثِ،
ڟُواْڢَڢِّنْ مَذَنْكُ ذَاسُيِ مَڢَرْكَيْ،
سَمَارِنْكُ ذَاسُ غَ رُعُيُواْيِ؞#أَيُّكَنْ 2.17-21
29حَرْ مَا بَايِنْكُ مَظَا دَ مَاتَا
ذَنْ ظُبَ مُسُ رُوحُنَ عَكْوَانَكِے طِنْ؞
30ذَنْ نُونَ عَلَمُنْ بَنْ مَامَاكِ
أَسَرَرِنْ سَمَ دَ عَدُونِيَا،
ذَاعَيِ جِنِ دَ وُتَادَ غِذَغِظَنْ هَيَاڧِے؞
31كَاڢِنْ ذُوَانْ بَبَّرْ رَانَرْ نَنْ
مَيْ بَنْ ڟُواْرُواْ تَ يَهْوٜىٰهْ،
رَانَ ذَاتَ ذَمَ دُهُ،
وَتَ كُمَ يَذَمَ جَاوُرْ كَمَرْ جِنِ؞#مَتْ 24.29؛ مَرْ 13.24-25؛ لُكْ 21.25؛ رُعُيَ 6.12-13
32ذَيْ كُوَ كَسَنْثٜىٰ ثٜىٰوَ
دُكْ وَنْدَ يَكِرَا غَ سُونَنْ يَهْوٜىٰهْ
دُواْمِنْ نٜىٰمَنْ تَيْمَكُواْ ذَاعَ ثٜىٰثٜىٰشِ؞#رُوامْ 10.13
غَمَا عَتُدُنْ سِهِيُواْنَ
كُمَ عَثِكِنْ عُرُوشَلِيمَ،
ذَاعَ سَامِ مَاسُ ڟِيرَا،
كَمَرْ يَدَّ نِے يَهْوٜىٰهْ نَا ڢَطَا،
‹عَثِكِنْ وَطَنْدَ سُكَ رَغُ،
أَݣَويْ وَطَنْدَ نِے يَهْوٜىٰهْ نَا كِرَا؞› »
Currently Selected:
يُواْوٜىٰلْ 2: hauAS
Highlight
Copy
Compare
Share
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
