Sini 6

Handay da' sôwâ seɗa' kədan handay jin sum sini

1Kəri rum, sum ta zə Zezu dlər ta kofo, sum ta zə Zezu mə ge vun grek car dan kə sôwâ məni wə ge vun hebre, handay in i rənda nday cu fe kwati kəri məni handay wə ɓul kwati ne kə rənda bəka daŋ' nə mi. 2Zə rum, sum ta zə Zezu mə guɓ wa hoɓ ɓawa kul sôwâ mə ta zə Zezu daŋ' ɓay la' ne ndaya: «Cu ɓay kədan namba ar ka' Dan Ifray ɓay gi sin ɓul kwati mi. 3Zə rum, daw ba mba, i da' sôwâ seɗa' məni sôwâ wə in njeŋ dan mə ɓay wa nday, məni Simbeɗ mə Kəleŋ nyen vunduk nday ɓay kə gwet, ɓay namba də ar sin də ɓa ndaya. 4Ndəna', namba gak də ar tu mba kə in dan kə Ifray kə ka' dan sara.» 5Raw sôwâ daŋ' tuk kəɗam kə dan rumu: Zə rum, handay da' sôwâ məni kuni: Etiyen, swə məni ve Kris ɓayrum, ɓay məni Simbeɗ mə Kəleŋ nyen vunduk rum, kə Filip, Prokor, Nikanor, Timoŋ, Parmenas, ɓay Nikola, swə mə so Aŋtiyosə məni faŋ wə ta zə vun fur sôwâ Zuwif. 6Handay faŋ ta kə nday kor sum sin, ɓay handay in dan kə Ifray ɓay njay ɓa wa ndaya.

7Dan Ifray pla' ta kofo kofo ɓay raw sôwâ məni wə ta zə Zezu wə so Jeruzalem dlər ta kofo juku. Sum po' fur juk ve Kris.

Sôwâ kaw Etiyen

8Etiyen, swə məni Ifray kuswa' num ɓay ne gbəgboŋ ne num, gi yew cem cem kə kwa cem cem mə jin' wa sôwâ wə du sôwâ. 9Sôwâ məsin car mbə so Ifray sôwâ Zuwif mə ɗe kə «Bek mə fe wa tu». Wə du nday sôwâ Zuwif məni car mbə so Siren kə so Alekzaŋdri, ɓay sôwâ Zuwif məsin məni car mbə nya Silisi kə nya Azi. Handay təŋ kə way dan kə Etiyen. 10Ama handay cu gak car kor rum kə dan ge vun mi, zə mum wə ge dan kə gwet məni Simbeɗ Ifray ne numu. 11Zə rum, handay ra' səlay po' sôwâ kə ndi kədan handay ini: «Namba mun mum wə i Moyizə kə Ifraya.» 12Ndəna', handay ɓu zu sôwâ kə sum rôwâ mə du sôwâ Zuwif ɓay sum pay zu dan dlaya. Handay mbə hay' Etiyen, handay kaw num ɓay 'ya kə rum ta kor sum rôwâ Fada mə Mbri. 13Handay mbə kə sôwâ məni gak hay dan wa rum, handay ini: «Swə məni nə cu ar dan ge dan mə bro' wa so po' fur mba ɓay wa dan dlay Moyizə mi ta'a. 14Namba mun mum in i Zezu mə so Nazaret wə də bru so po' fur rum ɓay wə də faŋwa dan vun fur məni Moyizə ta' ne mba.» 15Sôwâ daŋ' məni gay' wə ri məni sum rôwâ Fada mə Mbri wə ɓa han, handay njay i ta wa Etiyen ɓay handay we vuk rum ra' nji kə vuk vay sin Ifray mə wafraya.

Currently Selected:

Sini 6: KMN

Highlight

Copy