Nk 38

Ata'a metuna'a mimvean mi ne ngumba a fandé

(Nk 27:1-8; 30:17-21)

1A nga kôme ata'a metuna'a mimvean mi ne ngumba a asé, nté ô too menyi'i me mo metan a ndam fe menyi'i me mo metan: A mbe nté a ndam abime da, ve nkôñ ô too menyi'i me mo mela.

2A nga kôme minlak e meku'u menyin; minlak a ata'a metuna'a bi too jôme jia; ane a nga dube nye a mvot. 3A nga bo biôm mebelan bise ya ata'a metuna'a: Bisobelé, bilaé, bilum, bikutan asup a meviek, a nga bo bise a mvot. 4Ane a nga bo étañ j'abe'e nduan, a nga bo je a mvot, é too nkôñ wo bôman ata'a metuna'a si a kui ézezañe ya ata'a metuna'a. 5Ane a nga nyemene bilondo binyin a futi bie meku'u menyin ya étañ mvote si mfa'a ya some mimbôñ. 6A nga kôme mimbôñ a asé a dube mie a mvot. 7Ane nga some mimbôñ ya be'e ata'a metuna'a e bilondo; a ata'a metuna'a e mbe nlôñan a mebam ve a too mfulemfu mfa'a ya été.

8A nga belane bengobé be binga be mbe be sula'an anyiine *nda éndélé bisulan mfa'a ya kôme fandé mvot a tine mvote jé.

Nlôñan nseñ

(Nk 27:9-19)

9A nga bo fe nseñ. Mfa'a ya nké a nga belan bifumulu biyé ntiñan nté tañe menyi'i me mo ntet, 10a mekône mab mewôm mebaé a metine me mvot mab mewôm mebaé; akop ya mekôn a ayema'a dab bi mbe mboon a silba. 11Mfa'a ya akôé, biyé bi mbe nté tañe menyi'i me mo ntet a mekôn mewôm mebaé map a metin mewôm mebaé map; akobe dab a ayema'a dab bi mbe mboon a silba. 12Mfa'a jôp da dim, biyé nté menyi'i me mo mewôm metan a mekôn awôm map, a metin awôme map; akobe ya mekôn a ayema'a dab bi mbe mboon a silba. 13Mfa'a jôb da tôô, biyé bi mbe nté tañe menyi'i me mo, mewôm metan; 14afebe da é nga nyoñe biyé tañe menyi'i me mo awôm a di ôsu, e nga nyoñe éyé nté menyi'i me mo awôm a metan a mekône melale mab a metine melale map. 15Afebe baa, é too *zôsôô a di ôsu, é nga nyoñe éyé nté menyi'i me mo awôm a metan a mekône melale map a metine melale map. 16Biyé bite bise bi mbe mintiñan mi ndombo. 17Metine mekôn me mbe mvot, akob dab a ayema'a dab ke mboon a silba. Mekôn mese ya nseñ me mbe nlatan a ayema'a silba. 18Eyé é nga tyele *mbé ya nseñ é mbe mbamba ntiñan jôm minsinga mi too blum, mfô, évele a éfumulu; éyé te é too menyi'i me mo mewôm mebaé; ôya yôb menyi'i me mo metan avale fe ane ndam biyé ya nseñ; 19mekôn menyin a metine menyin mab me mbe mvot, akob a ayema'a dab e mbe silba, so'o jap é mbe nduban silba. 20Mekôn mese ya mbôma'an ya *tabernakel a ma ya nseñ me mbe mvot.

Meko'o be nga belane me

(Nk 35:4-10; 36:1-7; 1 Mink 29:1-8)

21Tañ ése ya biôm ya *tabernakel nje nyô: Tabernakel ya ba ba'ale bifase meko'o metiñ, avale ane Môze a nga mane tak a kalane de mo betuni, Itamar mone Aron a too ntebe ôsu. 22Betsalél mona Uri, ndaé Ur ya *nda bôte Yuda. A nga bo mam mese Nti a nga bendé Môze; 23ba Ohôliab, mona Anisamak ya *nda bôte Dañ, nkpwelé biôm, mbôndé mefek a ntiñe bindélé bi ne blum, mfô, évele a éfumulu.

24Abime mvot ese be nga belane de asu bisaé bise ya vôm a ne étyi e nga kui bekiligram toyini éla a mewôm mebaé, avale ane ôve'e ya *nda Zambe ô né. 25Moné ase a nga veban éyoñ ya élañ bôt a mbe bekiligram toyini éla a kili awôm a zamgbwa a begram mintet zamgbwa a mewôm metaan, aval ane ôve'e adit biôm ya *nda Zambe ô né. 26Fam ése é nga lañeban a taté mimbu mewôm mebaé a mitan a ke ôsu é nga ve bekiligram awôm a betan, aval ane ôve'e ya *nda Zambe ô né. Befam bese be mbe toyini mintet misaman a éla mintet mitan a mewôm metan. 27Kilôgram silba toyini éla é nga volô asu metin ya vôm a ne étyi a asu éyé ja kandé, metin ntet asu kiligram toyini éla, tin ése é nga nyoñ kiligram silba mewôm mela. 28Wôna kiligram silba mewôm mebaé nyô nje be nga bo je akop a ayema'a asu mekôn, ane fe be nga dube so'o jap. 29Mvot be nga ve é nga kui kiligram toyini ébaé a ntet wua a mewôm mebaé a ésaman. 30Be nga belane je asu metin ya anyiin *nda bisulan, asu ata'a metuna'a mvot, étañ mvot a biôm mebelan bise ya ata'a metuna'a; 31asu metin ya nseñ, mekôn mese ya mbôma'an *tabernakel a asu mekôn mese ntôba'ane ya nseñ.

Currently Selected:

Nk 38: BDCB

Highlight

Copy