মথি 1
1
প্রভু যীশু খ্রীষ্টর্ বংশগুনো নাঙানি
(লূক ৩:২৩-৩৮)
1যীশু খ্রীষ্ট দায়ূদ বংশর আর দায়ূদে অব্রাহাম বংশর মানুচ্। যীশু খ্রীষ্টর বংশর্ নাঙানি:
2অব্রাহাম পুয়ো ইস্হাক; ইস্হাক পুয়ো যাকোব; যাকোব পুয়ো যিহূদা আর তা ভেইয়ুন; 3যিহূদা পুয়ো পেরস আর সেরহ-তারার মাবো অলঅ তামর; পেরস পুয়ো হিষ্রোণ; হিষ্রোণ পুয়ো রাম; 4রাম পুয়ো অম্মীনাদব; অম্মীনাদব পুয়ো নহশোন; নহশোন পুয়ো সল্মোন; 5সল্মোন পুয়ো বোয়স-তা মাবো অলঅ রাহব; বোয়স পুয়ো ওবেদ-তা মাবো অলঅ রূত; ওবেদ পুয়ো যিশয়; 6যিশয় পুয়ো রাজা দায়ূদ;
দায়ূদ পুয়ো শলোমন-তা মাবো অলঅ ঊরিয়র মোগ্ রাণি মিলে; 7শলোমন পুয়ো রহবিয়াম; রহবিয়াম পুয়ো অবিয়; অবিয় পুয়ো আসা; 8আসা পুয়ো যিহোশাফট; যিহোশাফট পুয়ো যোরাম; যোরাম পুয়ো ঊষিয়; 9ঊষিয় পুয়ো যোথম; যোথম পুয়ো আহসো; আহস পুয়ো হিষ্কিয়; 10হিষ্কিয় পুয়ো মনঃশি; মনঃশির পুয়ো আমোন; আমোন পুয়ো যোশিয়; 11যোশিয় পুয়ো যিকনিয় আর তা ভেইয়ুন-ইস্রায়েল জাদরে বাবিল দেজত্তুন্ বন্দী ইজেবে নেযেবার অক্তত্ ইগুনে এলাক্। 12যিকনিয় পুয়ো শল্টিয়েল-ইস্রায়েল জাদরে বাবিলোত বন্দী গুরি নেযেবার পরেদি ইবের্ জর্ম ওইয়্যে; শল্টিয়েল পুয়ো সরুব্বাবিল; 13সরুব্বাবিল পুয়ো অবীহূদ; অবীহূদ পুয়ো ইলীয়াকীম; ইলীয়াকীম পুয়ো আসোর; 14আসোর পুয়ো সাদোক; সাদোক পুয়ো আখীম; আখীম পুয়ো ইলীহূদ; 15ইলীহূদ পুয়ো ইলিয়াসর; ইলিয়াসর পুয়ো মত্তন; মত্তন পুয়ো যাকোব; যাকোব পুয়ো যোষেফ-ইবে মরিয়ম নেগ্। 16এ মরিয়ম পেদত্ যীশু, যিবেরে খ্রীষ্ট বিলিনে কন্, তার জর্ম ওইয়্যে।
17এধোক্ক্যেনগুরি অব্রাহামত্তুন্ ধুরি দায়ূদ সং চৌদ্দো পুরুচ্; দায়ূদোত্তুন্ বাবিলোত্ বন্দী গুরি নেযেবার্ অক্ত সং চৌদ্দো পুরুচ্; বাবিলোত্ বন্দী অনার পরেত্তুন্ ধুরি খ্রীষ্ট সং চৌদ্দো পুরুচ্।
প্রভু যীশু খ্রীষ্টর জর্ম
(লূক ২:১-৭)
18যীশু খ্রীষ্টর্ জর্ম এবাবোত্যেগুরি ওইয়্যে। যোষেফ সমারে যীশুর মা মরিয়মর বৌ ঠিগ্ ওইয়্যে, মাত্তর্ তারা একসমারে থেবার্ আগেদি পবিত্র আত্মার্ খেমতালোই মরিয়মে পিদিলী ওইয়্যে। 19মরিয়ম নেক্কো যোষেফে গম্ মানুচ্ এলঅ, মাত্তর্ তে মান্জ্য মুজুঙোত্ মরিয়মরে লাজত্ ফেলেবাত্তে ন-চেলঅ; ইয়েনত্তে তে ভিদিরে ভিদিরে তারে ন-লবঅ বিলি ঠিগ্ গুরিলো।
20যোষেফে যেক্কে ইয়েনি ভাবের্ সেক্কে গোজেনর এক্কো দূত স্ববনত্ দেগা দিইনে তারে কলঅ, “দায়ূদ বংশধর যোষেফ, মরিয়মরে লবাত্তে ন-দোরেচ্, কিয়া তা পেদত্ যিবে জোর্মেয়্যে তে পবিত্র আত্মার্ খেমতালোই জোর্মেয়্যে। তার এক্কো পুয়ো অবঅ। 21তুই তা নাঙান্ যীশু রাগেবে, কিত্যে তে তা মানুচ্চুনোরে তারার্ পাপত্তুন্ উদ্ধোর্ গুরিবো।”
22ইয়েনি বেক্কানি ওইয়্যেদে যেনে ভাববাদীগুনোরে দিইনে গোজেনে এই যে কধানি কোইয়্যে সিয়েনি পরিপূরোন্ অয়: 23“এক্কো গাবুজ্যে মিলে পিদিলী অবঅ, আর তার এক্কো পুয়ো অবঅ; তা নাঙান্ রাগা অবঅ ইম্মানূয়েল।” এ নাঙানর্ অত্ত অলঅ, আমা সমারে গোজেন।
24প্রভুর হবর্ কোইয়্যেবো যোষেফরে যেধোক্ক্যেন গুরি উগুম দিয়্যে, ঘুমোত্তুন্ উদিনে তে সেধোক্ক্যেন্ গুরিলো। 25তে মরিয়মরে মোগ্ ইজেবে ললঅ, মাত্তর্ পুয়োবোর্ জর্ম ন-অনা সং তা সমারে ন-থেলঅ। পরেদি যোষেফে পুয়োবোর্ নাঙান্ যীশু রাগেল।
Currently Selected:
মথি 1: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
