হগয় 2
2
নূয়ো উবোসনা-ঘরর্ সয়-সাগোজ্যে
1পরেদি সাত মাজর্ এগোশ্ দিনোত্ লগেপ্রভু ভাববাদী হগয়রে কোইয়্যেদে, 2তুই শল্টীয়েলর পুয়ো যিহূদার শাজন্গুরিয়্যে সরুব্বাবিলরে, যিহোষাদকর পুয়ো দাঙর্ ধর্মগুরু যিহোশূয়রে আর বাদবাগি বেক মানুচ্চুনোরে পুযোর্ গর্, 3তমা ভিদিরে এমন কন্না আঘে যিবে এই ঘরানরে তার পুরোণি সয়-সাগোজ্যে অবস্থায় দেখ্যে? আর ইক্কিনে সিয়েন কেধোক্ক্যেন দেগর্? তমা ইধু কি মনে ন-অর্ যে, আগ তুলোনায় ইয়েন কিচ্ছু নয়? 4সে পরেদি তুই তারারে কবে, লগেপ্রভু কোইয়্যেদে, ও সরুব্বাবিল, তুই সাহস গর্; ও দাঙর্ ধর্মগুরু যিহোশূয়, সাহস গর্; ও দেজর্ বেক মানুচ্চুন্, তুমি সাহস গরঅ আর কাম্ গরঅ; কিত্যে মুই বেগত্তুন্ খেমতাবলা লগেপ্রভু তমা লগে লগে আগং। 5তুমি যেক্কে মিসর দেজত্তুন্ নিগিলি এচ্চো সেক্কে তমা ইধু মুই এ এগেমান্ গোজ্যং, আর মঅ আত্মাগান ইক্কিনেয়ো তমা ইধু আঘে। তুমি ন-দোরেয়ো।
6“‘মুই বেগত্তুন্ খেমতাবলা গোজেন লগেপ্রভু কঙর্, আর কয়েকদিন পরে মুই আর একবার আগাজ, পিত্থিমী, সাগর আর ভূইয়ানরে লাড়েম্। 7মুই বেক্ জাদ্তুনোরে লাড়েম আর সেক্কে তারা তারার্ ধন-সোম্বোত্তিগানি ইধু আনিবাক্। সেক্কে মুই এ ঘরান্ সয়-সাগোজ্যেলোই ফেলেং ফেলেং গুরিম। 8রূবোনিয়ো মর্, সনানিয়ো মর্। 9আগ ঘরর্ সয়-সাগোজ্যেত্তুন্ ইক্কিনে ঘরর্ সয়-সাগোজ্যেগান আরঅ বেশ্ অবঅ। এ জাগানত্ মুই ভালেদি আনিম। মুই বেগত্তুন্ খেমতাবলা গোজেন লগেপ্রভু এ কধাগান কঙর্।’ ”
অসিজি জাদরে বর্ দেনা
10দারিয়াবসর রাজাগিরির দ্বিবজরর্ নয় মাজর্ চোব্বিশ্ দিনোত্ লগেপ্রভু ভাববাদী হগয়রে কোইয়্যেদে, 11“মুই বেগত্তুন খেমতাবলা লগেপ্রভু কঙর্, রীদি-সুদোম পৌইদ্যেনে তুই ধর্মগুরুগুনোরে এ কধাগান পুযোর্ গর্, 12‘কনঅ মানুচ্ যুনি তার কাবড় ভাজত্ সুদ্ধো-সাংগ য়েরা নেযায় আর সেই কাবড়ান বাঁজিনে কনঅ রুটি, উজুনো হানা, আংগুর-রস, তেল বা অন্য কনঅ হানা বাঁজি থায় সালে সিয়েন কি সুদ্ধো-সাংগ ওই যায়?’ ”
হগয়র প্রশ্নগানর জোবত্ ধর্মগুরুগুনে কলাক্, “না, ন অয়।”
13সেক্কে হগয় কলদে, “মরা কিয়্যে ধুরিনে অসিজি ওইয়্যে এবাবোত্যে কনঅ মানুচ্ যুনি ইয়েনির্ কনঅ এক্কান ধরে, সালে সে জিনিস্চান কি অসিজি ওই যেবঅ?”
ধর্মগুরুগুনে জোব্ দিলাক্, “অয়, সিয়েন অসিজি ওই যেবঅ।”
14সেক্কে হগয় কলঅ, “লগেপ্রভু কোইয়্যেদে, ‘ঠিগ্ সেবাবোত্যেগুরি মঅ চোগেদি এ মানুচ্চুনে আর এ জাদ্তুন অসিজি। সেনত্তে তারা যিয়েনি গরন্ আর যিয়েনি উৎসর্ব গরন্ সিয়েনিয়ো অসিজি। 15ইক্কিনেত্তুন্ ধুরি তুমি এ পৌইদ্যেনে গমেডালে চিন্তে গরঅ, মঅ ঘরত্ যেক্কে এক্কো পাত্তর উগুরে আর এক্কো পাত্তর্ ন-এলঅ সেক্কে কি অবস্থা এলঅ। 16কনজনে যেক্কে কুড়িমন শোজ্য কুড় কায়কুরে এদঅ সেক্কে সিয়েনত্ পেদঅ বানা দশ মণ। যেক্কে কনজনে পঞ্চাশ লিটার আংগুর-রস নিবাত্তে আংগুর-রস থোইয়্যে কুম্মো ইধু যেদঅ সেক্কে সিয়েনত্ থেদঅ বানা কুড়ি লিটার। 17মুই খেত-খেত্তি শুগেই যেইয়্যে রুগ্ আর ছুমো রুগ্ আর শিলো ঝড়ে তমা আঢর্ বেক কামানিরে আঘাত্ গোজ্যং, মাত্তর্ তো তুমি মইন্দি ন-ফিরো। 18এচ্চ্যে নয় মাসর্ চোব্বিশ দিনোত্ মঅ ঘরানর্ গড়াগান থিদেবর্ গরা অলঅ। এবেরা মুই তমাত্তে কি গুরিবাত্তে যাঙর্ সিয়েন চঅ। 19ইক্কিনে হামাক্কায় তমা গোলাঘরত্ কনঅ বীজ নেই আর এদক দিন আংগুর, ডোমোর্, ডালোম আর জলপাই গাজত্ ফল কম ধোজ্যন্, মাত্তর্ এচ্চ্যেত্তুন্ ধুরি মুই তমারে বর্ দিম।’ ”
সরুব্বাবিল উগুরে লগেপ্রভুর বর্
20সেদিন্ন্যে লগেপ্রভু হগয়রে আরঅ কলঅ, 21“তুই যিহূদার শাজন্গুরিয়্যে সরুব্বাবিলরে কঅ, ‘মুই আগাজ্ আর পিত্থিমীগানরে ঝাগেরেম্। 22মুই নানান্ জাদর্ রাজাগুনোর সিংহাসনানি উল্ল্যেই দিম আর তারার্ খেমতাগানি ভস্ত গুরি দিম। মুই রথ আর সেই চালেয়্যেগুনোরে উল্ল্যেই ফেলেই দিম; ঘোড়া আর ঘোড়া মাউট্টুন পত্তিজনে তা ভেইয়ুনোর লাম্বা ছুরিলোই মুরিবাক্। 23ও শল্টীয়েলর পুয়ো মর্ চাগর্ সরুব্বাবিল, মুই লগেপ্রভু সেদিন্যে তরে নিইনে মর্ সীলমহ্রর আংটি ধোক্ক্যেন গুরিম, কিত্যে মুই তরে বেঈ লোইয়োং।’ মুই বেগত্তুন্ খেমতাবলা লগেপ্রভু এ কধাগান কঙর্।”
Currently Selected:
হগয় 2: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
