হগয় 1
1
লগেপ্রভুর ঘর বানেবার উগুম
1রাজা দারিয়াবসর রাজাগিরির দ্বিবজরত্ শল্টীয়েলর পুয়ো সরুব্বাবিলে এলদে যিহূদার শাজন্ গুরিয়্যে আর যিহোষাদকর পুয়ো যিহোশূয় এলদে দাঙর্ ধর্মগুরু। সেই বজরর্ ছয় মাসর পত্তম দিনোত্ লগেপ্রভু ভাববাদী হগয়রে দিইনে তারারে কলঅ, 2“মুই বেগত্তুন্ খেমতাবলা গোজেন লগেপ্রভু কঙর্, এ মানুচ্চুনে কদন্, ‘লগেপ্রভুর ঘর বানেবার সময় এজঅ ন-এজে।’ ” 3সেক্কে ভাববাদী হগয়রে দিইনে লগেপ্রভু আরঅ কোইয়্যেদে, 4ইয়েন কি ঠিগ্ অর্, তুমি নিজে আড়ুগো কাম গোজ্যে ঘরত্ আঘ আর মঅ ঘরান্ ভস্ত ওইয়্যে কুড়্ ওই পড়ি আঘে? 5মুই বেগত্তুন্ খেমতাবলা লগেপ্রভু কঙর্, তুই কিবাবোত্যেগুরি চলর্ সিয়েন গমেডালে চিন্তে গুরি চাহ্। 6তুমি বোউত্ লাগেয়ো, মাত্তর্ কম্ কাপ্প্য। তুমি হেই থাগঅ, মাত্তর্ কনদিন্অ ঈল্ ন-অয়। তুমি আংগুর-রস হেই থাগঅ, মাত্তর্ যদেষ্ট ন-পঅ। তুমি কাবর-চুগোর্ কিয়্যেনত্ দুয়ো, মাত্তর্ সিয়েনিলোই কিয়্যে উমুম্ ন-অয়। তুমি বেতন পেইনে কানা থৈল্যেত্ রাগঅ। 7সেনত্তে তুমি কেনে চলর্ সিয়েনি গমেডালে চিন্তে গুরি চঅ। 8এবেরা তুমি মুড়োত্ উদিনে তক্তা আনিনে উবোসনা-ঘর বানঅ, যেনে মুই হুজি আর সর্মানিত অং।
9“তুমি বোউত্ ফসল পেবার্ আজা গোজ্য, মাত্তর্ কম পেইয়ো। তুমি যিয়েনি ঘরত্ আন্য সিয়েনি মুই উড়েই দুয়োং। কিত্তে দুয়োং? মঅ ঘরত্তে সিয়েনি গোজ্যং, কিত্যে সেই ঘরান ভস্ত ওই পড়ি আঘে আর ইন্দি তুমি পত্তিজনে নিজো নিজো ঘর্লোই কামত্ আগঅ। 10সেনত্তেই তমাত্তে আগাশ্চানে তার শিরো পানি পড়ানা আর ভূইয়ো খেত-খেত্তিগানি দেনা বন্ধ গুরি দিয়্যে। 11খেত-খামার, মুড়ো-মুড়ি, শোজ্য, নূয়ো আংগুর-রস, তেল আর মাদিত্ যিয়েনি জর্মায় সিয়েনি উগুরে মানুচ্, য়েমান আর তমা আঢর্ বেক কামানি উগুরে ঝড় ন-পড়িবাত্তে মুই উগুম দুয়োং।”
12সেক্কে শল্টীয়েলর পুয়ো সরুব্বাবিল, যিহোষাদকর পুয়ো ধর্মগুরু যিহোশূয় আর অন্য বেক্ মানুচ্চুনে তারার্ গোজেন লগেপ্রভুর কধা মজিম আর তার পাদেয়্যে ভাববাদী হগয়র কধা মজিম কাম গুরিলাক্, কিত্যে তারা লগেপ্রভুরে দোরেলাক্। 13সেক্কে লগেপ্রভু তার হবর্ কোইয়্যে হগয়রে দিইনে মানুচ্চুনোরে কলঅ, “মুই লগেপ্রভু তমা লগে লগে আগং।” 14ইয়েনর্ পরেদি লগেপ্রভু যিহূদার শাজন্গুরিয়্যে সরুব্বাবিলর, দাঙর্ ধর্মগুরু যিহোশূয়র আর বাদবাগি বেক্ মানুচ্চুনোর মনানি জাগেই তুলিলো। সেক্কে তারা বেক্কুনে এইনে তারার্ বেগত্তুন্ খেমতাবলা লগেপ্রভুর ঘরর কাম গরানা আরাম্ভ গুরি দিলাক্। 15সেই কামানি রাজা দারিয়াবসর রাজাগিরির দ্বিবজরর্ ছয় মাসর চব্বিশ দিনোত্ আরম্ভ ওইয়্যে।
Currently Selected:
হগয় 1: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
