যাত্রা 24
24
মোশির মাধ্যমে গোজেনর সুদোম দেনা
1পরেদি লগেপ্রভু মোশিরে কলঅ, “হারোণ, নাদব, অবীহূ আর ইস্রায়েলীয়গুনোর্ সত্তুরজন বুড়ো মাই-মুরুব্বী আর তুই মইদু উদোগি। এবার্ অক্তত্ তুমি দূরোত্তুন্ মাদা নিগিরিনে মরে ভোক্তি সর্মান জানেবা। 2মাত্তর্ তুই গায়্ গায়্ মইদু উজেই এবে, অন্যগুনে ন-এবাক্। ইগুনে বাদে অন্য ইস্রায়েলীয়গুনে যেনে তঅ সমারে উদি ন-এজন্।”
3মোশি যেক্কে ফিরি যেইনে মানুচ্চুনো ইদু লগেপ্রভুর্ বেক্ কধানি কলগোই আর তাঁর্ বেক্ সুদোমানি ফগদাং গুরিলো সেক্কে মানুচ্চুনে এক সমারে কলাক্, “লগেপ্রভু যিয়েনি যিয়েনি কোইয়্যে আমি সিয়েনি বেক্কানি গুরিবোং।” 4লগেপ্রভু যেদক্কানি কধা কোইয়্যে মোশি সিয়েনি লিগি রাগেল।
তার্ কেল্যে মোশি বেন্যেপোত্যে উদিনে মুড়োবোর্ তলে এক্কো ডালিপূজো বানেল আর ইস্রায়েলীয় বারবো গুট্টির্ কধা মনত্ গুরিনে বারবো পাত্তরর্ খুদো বানেল। 5সে পরেদি তে কয়েকজন ইস্রায়েলীয় গাবুজ্যেরে পাধেই দিলো আর তারা যেইনে লগেপ্রভুর্ নাঙে কয়েক্কো পুজ্যে-উৎসর্বর্ অনুষ্ঠান গুরিলাক্ আর উদোলোলি-উৎসর্ব ইজেবে কয়েক্কো বলদ গোরুয়ো উৎসর্ব গুরিলাক্। 6মোশি উৎসর্বর লো-গানির্ অদ্ধেক্ নেযেইনে কয়েক্কো পিলেত্ রাগেল আর বাগি অদ্ধেক্ তে ডালিপূজো উগুরে ছিদি দিলো। 7সে পরেদি তে সুদোম-লেখ্যে বোইবো নেযেইনে মানুচ্চুনোরে পোড়েই শুনেল।
ইয়েনর জোবত্ মানুচ্চুনে কলাক্, “আমি বাধ্য থেবং আর লগেপ্রভু যিয়েনি যিয়েনি কোইয়্যে সিয়েনি বেক্কানি পালন গুরিবোং।”
8এই কধানি শুনিনে মোশি লো নেযেইনে মানুচ্চুনো উগুরে ছিদি দিইনে কলঅ, “ইয়েন সেই সুদোমর্ লো, যে সুদোমানি লগেপ্রভু তমাত্তে এই কধা মজিম ঠিগ্ গোজ্যে।”
9-10ইয়েন পরেদি মোশি, হারোণ, নাদব, অবীহূ আর ইস্রায়েলীয়গুনোর্ সত্তুরজন বুড়ো মাই-মুরুব্বীগুনে মুড়োবো উগুরে উদিনে ইস্রায়েলীয়গুনোর্ গোজেনরে দেগিলাক্। তা টেঙর্ তলে এলঅ জোক্জোক্যে আগাজ ধোক্ক্যেন নীলকান্তমণিলোই বানেয়্যে পাক্কা ধোক্ক্যেন কিজু এক্কান। 11ইস্রায়েলীয়গুনোর্ এই বেক্ মাই-মুরুব্বীগুনে যুনিয়ো গোজেনরে দেগিলাক্ তো তে তারারে মারে ন-ফেলেল। তারা তারে দেগিলাক্ আর হানা-দানা গুরিলাক্।
12সে পরেদি লগেপ্রভু মোশিরে কলঅ, “তুই মুড়োবো উগুরে মইদু উদি এইনে কানক্ষণ্ ইয়োদোই থাগ। মানুচ্চুনোরে শিক্ষ্যে দিবাত্তে পাত্তরর্ যে ফলক্কো উগুরে মুই রীদি-সুদোম আর উগুম্ লিগি রাগেয়োং সিয়েনি মুই তরে দিম্।”
13এই কধাগান্ শুনিনে মোশি তারে এজাল্ দিয়্যে যিহোশূয়রে নেযেইনে যাহ্ ধুরিলো। সে পরেদি তে গোজেনর্ মুড়োবোত্ যেইনে উদিলো। 14তে বুড়ো মাই-মুরুব্বীগুনোরে কোই গেলঅ, “আমি ফিরি ন-এজানা সং তুমি ইয়োদোই বাজ্জেই থাগঅ। হারোণ আর হূরে তমা সমারে থেলাক্। কোল্-কোজ্যে বাজেলে মানুচ্চুনে যেনে তারা ইদু যান্।”
15মোশি মুড়োবোত্ উদিবার্ অক্তত্ মুড়োবো মেঘঅ চাক্কোই নাঢা গেলঅ, 16আর সিনাই মুড়োবো উগুরে লগেপ্রভুর্ মহিমাগান ঠিগ্ ওই রলঅ। ছয়দিন সং মুড়োবো মেঘ চাক্কোই ঢাক্কে রলঅ। সে পরেন্দি সাত দিনোত্ সেই মেঘ ভিদিরেত্তুন্ লগেপ্রভু মোশিরে ডাগিলো। 17ইস্রায়েলীয়গুনোর্ চোগোত্ লগেপ্রভুর মহিমাগান জোল্-জোল্যে আগুনো ধোক্ক্যেন ওইনে মুড়োবোর্ মাদাথ্ দেগা দিলো। 18মুড়োবো বেঈ উদদে উদদে মোশি সেই মেঘ ভিদিরে সোমেলগোই। তে চোল্লিশ্ দিন আর চোল্লিশ্ রেত্ সং সেই মুড়োবোত্ রলঅ।
Currently Selected:
যাত্রা 24: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
