যাত্রা 22
22
সোম্বোত্তি রোক্ষ্যে
1যুনি কনঅ মান্জে কনঅ গোরু বা ভেড়াছাগল চুর্ গুরি আনিনে মারে ফেলান্ বা বেজি দুয়োন, সালে তাত্তুন্ এক্কো গোরুর্ বদলে পাচ্চুয়ো গোরু আর এক্কো ভেড়াছাগলর্ বদলে চের্বো ভেড়াছাগল ফিরেই দিয়্যে পুরিবো।
2যুনি কনঅ চুরে চুর্ গুরিবাত্তে যেইনে ঘরত্ চোমেবার্ অক্তত্ ধরা খায়্ আর আহত ওইনে মুরি যায়্, মাত্তর্ যিবের্ আঘাত্তোই তে মুরি গেলঅ তে খুনোর্ দায়ী ন অবঅ। 3মাত্তর্ যুনি বেলান্ উদিবার পরেন্দি সিয়েন্ অয়্ সালে তে সেই খুনোত্তে দায়ী অবঅ।
চুর্বোত্তুন্ চুর্ গোজ্যে জিনিচ্চানত্যেই হামাক্কাই ক্ষোতি পূরোণ্ দিয়্যে পুরিবো, মাত্তর্ যুনি তার্ কিচ্চু ন-থায়্ সালে নিজোরে বেজিনে সেই টেঙাগুন্ উজোল্ গুরি নেযা পুরিবো। 4চুর্ গোজ্যে গোরু, গাধা বা ভেড়াছাগল যুনি চুরোর আদত্ জেদাবাদে পাহ্ যায়্ সালে চুর্বোত্তুন্ সিগুন এক্কোর্ বদলে দ্বিবে গুরি ফিরেই দিয়্যে পুরিবো।
5যুনি কনজনে তার্ গরু-ভেড়াছাগল কনঅ মাদঠ্ বা আংগুর্ খেদত্ চোরেবাত্তে যেইনে ইড়ি দেগোই আর সিগুনে অন্য কনঅ মানজ্যর্ খেদত্ চোমেইনে ক্ষেত্-খেত্তি হেই দুয়োন্, সালে তার্ নিজোর্ শোজ্য খেদর্ বা আংগুর খেদর্ বেগত্তুন্ গম্ ক্ষেত্-খেত্তিলোই তার্ ক্ষোতি পূরোণ্ দিয়্যে পুরিবো।
6যুনি কনঅ জাগাত্তুন্ আগুন কাদাঝুবোত্ যেইনে ধরেগোই আর পরেন্দি ছিদি যেইনে থুবেই রাগেয়্যে বা মাদত্ উজু গুরি আগন্দে শোজ্যগুন্ বা পুরো ক্ষেত-ক্ষেত্তিগানি পুড়ি যায়, মাত্তর্ আগুনান্ যে জ্বালেয়ে তাত্তুন্ সিয়েনর্ ক্ষোতি পূনোণ্ দিয়্যে পুরিবো। 7যুনি কনজনে কারঅ ইদু টেঙা-পৌজে বা পযাপিরা রাগেবাত্তে দুয়োন্ আর তার্ ঘরত্তুন্ সিয়েনি চুর্ ওই যায়, সালে চুর্বো ধরা পড়িলে চুর্বো সিয়েনির দ্বিগুন্ ফেরত দি পেবঅ। 8মাত্তর্ যুনি চুর্বো ধরা ন-পড়ে সালে ঘরর্ গিরোজ্সো নিজে সিয়েনি লোইয়্যে নাহি সিয়েনি ঠিগ্ গুরিবাত্তেই তাত্তুন্ গোজেন ইদু আঝিল্ উয়ো পুরিবো। 9অন্যজনর্ গজগত্ আঘে এধোক্ক্যেন কনঅ গোরু বা গাধা বা ভেড়াছাগল বা পিনিবার কাবড়্ বা অন্য যে কনঅ আরেয়্যে জিনিস্ দেগিনে যুনি কনজনে কন্ সিয়েন্ তার্, সালে সিয়েন্ সামেলেবাত্তে দ্বি তপ্পেত্তুন্ গোজেন ইদু যেইনে আঝিল্ উয়ো পুরিবো। গোজেনে যারে দুষী ইজেবে ঠিগ্ গুরিবো তে অন্যজনরে সিগুনোর্ দ্বিগুন্ ফিরেই দিবো।
10যুনি কনজনে তার্ গাধা, গোরু, ভেড়াছাগল বা অন্য কনঅ য়েমান্ কার ইদু রাগেবাত্তে থয় আর সিবে মুরি যায় বা আঘাত্ পায় বা কাড়ি নেযা অয় অথচ কনজনে এদক্কানি অদে ন-দেগন, 11সালে সে মানুচ্চো যে সিয়ানি-গরে সিয়ান্ লগেপ্রভুর্ মুজুঙোত্ শমক্ হেইনে তাত্তুন্ বেপারান্ সামালা পুরিবো। সেই য়েমান গিরোজ্চোত্তুন্ সেক্কে সিয়েন্ মানি নেযা পুরিবো আর কনঅ ক্ষোতি পূরোণ্ তে দাবি গুরি ন-পারিবো। 12মাত্তর্ সেই মানুচ্চুনোত্তুন্ যুনি সিগুন্ চুর্ ওই যায়্ সালে তাত্তুন ক্ষোতি পূরোণ্ দিয়্যে পুরিবো। 13যুনি কনঅ ঝার্বো য়েমানে সে য়েমান্নোরে কট্টা কট্টা গরন্ সালে সিয়েন্ প্রমাণ্ গুরিবাত্তে তাত্তুন্ পুড়ি থেইয়্যে য়েরা দমাগুন্ আনিনে দেগা পুরিবো। এধোক্ক্যেন অলে তাত্তুন্ আর ক্ষোতি পূরোণ্ দিয়্যে ন-পুরিবো।
14“কারত্তুন্ মাগি আন্যে কনঅ য়েমান্ যুনি গিরোজ্সো ন-থানা অবস্থায় আহত অয়্ বা মুরি যায়্ সালে যে সিগুন্ মাগি আন্যে তাত্তুন সিগুনোর ক্ষোতি পূরোণ্ দিয়্যে পুরিবো।” 15মাত্তর্ গিরোজ্সো মুজুঙোত্ যুনি সিয়েন্ অয়্ সালে তাত্তুন্ কনঅ ক্ষোতি পূরোণ্ দিয়্যে ন-পুরিবো। মাত্তর্ য়েমান্নো যুনি টেঙালোই ভাড়া গুরি আন্যে ওই থায়্ সালে সে টেঙাগুনোই তার্ ক্ষোতি পূরোণ্ অবঅ।
সমাজর্ দায়-কামানি
16কারঅ লগে বৌ কধা ন-অয়্ এধোক্ক্যেন কনঅ গাবুজ্যে মিলেরে যুনি কনজনে ভুলে-বালেই আনিনে তা সমারে সিনেলী গরন্, সালে সে মানুচ্চোত্তুন্ সিবের্ মেলা খরচ্চুন্ দিয়্যে পুরিবো আর মিলেবো তার্ মোক্ অবঅ। 17যুনি মিলেবোর্ বাপ্পো কনমতে তাইদু ঝিবো দিবাত্তে রাজী ন-অয় সে পরেন্দিয়ো তাত্তুন্ এই মেলার্ খরচ্চুন্ দিয়্যে পুরিবো।
18কনঅ যাদুগুরিয়্যে মিলেরে বাঁজি থেবাত্তে ন-দিবা।
19কনঅ য়েমান সমারে যুনি কনজনে সিনেলী গরন্ সালে হামাক্কায়্ তারে মারে ফেলা পুরিবো।
20লগেপ্রভুরে বাদে যুনি কনজনে কনঅ দেবেদা ইদু কিজু উৎসর্ব গরন্ সালে তারেয়ো মারে ফেলা পুরিবো।
21কনঅ পর্ভাস্যে সমারে ভান্ন্যেই বেবহার্ ন-গোজ্য বা তা উগুরে অত্যেচার্ ন-গোজ্য, কিত্তেই মিসর দেজত্ তুমিয়ো একদিন্ পর্ভাস্যে এলা।
22“কনঅ রানিমিলেরে বা কনঅ মা-বাপ্ নেইয়্যে পূঅরে বা ঝিরে দুখ্ ন-দুয়ো।” 23যুনি সিয়েন গরঅ আর তে মইদু এইনে কানে সালে হামাক্কায়্ মুই তার্ কানানিগান শুনিম। 24সেক্কে মর্ রাক্কান্ জুলি উদিবো আর তুমি যুদ্ধোত্ মারা পুড়িবা। সেনে তমা মোক্কুনে রানিমিলে অবাক্ আর পূঅ-ঝিগুনে তারার্ বাপ্পোরে আরেবাক্।
25মর্ কনঅ নাদা মান্জ্যরে যুনি তুই টেঙা উদোর্ দুয়োচ্ সালে তাগোয়্যে মান্জ্য ধোক্ক্যেন গুরি তাত্তুন্ কনঅ সুদ ন-নেযেচ্। 26যুনি তুই কারর্ কিয়্যে কাবড়্ বন্ধক্ রাগাচ্ সালে বেলান্ ডুবিবার আগেদি সিয়েন্ ফিরেই দিয়্যে পুরিবো। 27কিত্তে সিয়েন তার্ কিয়্যেত্ দিবাত্তে বানা এক্কান্ কাবড়্। সিয়েন ন-থেলে তে কি কিয়্যেত্ দিইনে ঘুমোত্ পুরিবো? যুনি তে ইয়েনত্তে মইদু কানে সালে মুই তার্ কানানিগান শুনিম, কিত্তে মর্ মনান্ দোয়্যেলোই ভরা।
28গোজেনরে অগমান ন-গোজ্য বা তমার শাসনগুরিয়্যেগুনোরে অভিশাব ন-দুয়ো।
29তমার্ ক্ষেত-ক্ষেত্তিত্তুন্ আর আংগুর-রজত্তুন্ মরে যিয়েনি দিবার্ সিয়েনি দেদে দেরি ন-গোজ্য। তমার পত্তম পূঅবো মরে দিয়্যে পুরিবো। 30তমার গোরু আর ভেড়াছাগলুনোর্ বেলাইয়ো সিয়েন্ গুরিবা। সাত দিন্ সং তারার ছঅগুন্ মা-বো ইদু থেবাক্, সে পরেদি আস্তো দিনোত্ সিগুন্ মরে দিয়্যে পুরিবো।
31“তুমি অবা মর্ নাঙে যুদো গোজ্যে মানুচ্। সেনত্তেই এন্ কনঅ য়েমানর্ য়েরা তুমি ন-হেবা যিবেরে কনঅ ঝাড়্বো জানোয়ারে কট্টা কট্টা গুরি মাদঠ্ ফেলে রাগেয়্যে; সিয়েনি কুকুরোরে হেবাত্তে দিবা।”
Currently Selected:
যাত্রা 22: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
