Amaköri gha Bhatomu 9

Ghotooribhu gho Sawuri

1Eriibhagha riyo riyo, Sawuri akëëndërëra ghotiini gho ghwita abhaghëndi bha Mutëmi Yesu. Akamusëëta Omuchaama Omokoro, 2akamusabha amuhë anyaarubha ino aghuye nayo mo‑masinaghooghi gha moghya o Tamaasiko, kubha arabhabhöna iyo abhaghëndi bha Yesu, abhasubhe na abhakari, abhaghöötë, na kobharëëta Yerusareemu.

3Mbe, Sawuri aghasëëma orughëndö rooche ghuye mo‑moghya o Tamaasiko. Hano are ˆaghatingʼi omoghya uyo, hayo hayo emirëngaari mihaari koru Mwishaaro ghekamurëngaari chambaara choose. 4Aghagho haase, akooghu eriiraka reramobhoori rerabhugha, “Oo Sawuri! Oo Sawuri! Ngwake okunyaaki?” 5Sawuri akabhoori, “Oo Omutëmi, iye niiye we?” Akamugharokeri, “Eni neeni Yesu, uno iye okunyaaki. 6Ibheere, imeerera! Oghi mo‑moghya, iyo nokobhooreru ghano okwëndëru ghuköra.”

7Abhaato bhano ꞉bhaare haghirohamu nawe mo‑rughëndö ruyo bhakiimeerera bhaghakira kiri, gho kubha bhoose ꞉mbooghwire eriiraka riyo amare bhataamorooche uno are arasiikëra. 8Sawuri aghiighëgha, amare hano asakiri kuramoki, taatoriri korighi wiiki. Niho abhaghëndi bhaache bhayo bhakamughööta okubhökö na komurahuuna, mbagha mo‑moghya o Tamaasiko. 9Aghiikara‑mu chaasiko ishato, ataakorighi. Eriibhagha riyo taariire koru kunyo gheghiro ghyokyose.

10Iyo Tamaasiko, naare‑ho omughëndi umu o Mutëmi Yesu, eriina reeche Ananiya. Omutëmi akamobherekera Ananiya uyo mo‑marighi, “Ananiya!” Nawe akamugharokeri akabhugha, “Oo Omutëmi, hano neenyi.” 11Omutëmi akamobhoorera, “Bhooka oghi mo‑nchëra ino ekobherekeru Angöröröku, orahika hayo, obhoori mo‑nyumba e Yuuta omooto umu omwibhoru o moghya o Taaso, eriina reeche Sawuri. Ibheere kwo riibhagha rino mwisabha anyi. 12Iwe mo‑marighi ghaache ꞉naarooche omooto uno akobherekeru Ananiya, asöhiri mo‑nyumba iyo, akamotoorera amabhökö ighoro yaache, kubha atore korighi wiiki.”

13Ananiya akabhugha, “Omutëmi, abhaato bhaaru mbambooriire kebhuno Sawuri uyo abhaköriire abhaato bhaacho abhatööbhiyu amabhe iyo Yerusareemu! 14Ibheere hano anyi, niishereriiru na abhakoro bha bhachaama kubha, abhaghöötë bhoose bhano bhakorisabha Eryobha kwo riina reecho.” 15Omutëmi akamobhoorera akabhugha, “Nooghi! Omooto uyo, nemwahwire abhe omutamishi waane, kubha ariraghani eriina reene kwo bhaato bha matöngö, na kwo bhatëmi bhaabho, koru na kwo Bhayahuuti abheene. 16Eni mwene nekomwërëki kebhuno akwëndëru kunyaaka gho ghiri e riina reene.”

17Mbe, Ananiya aghaye, aghasöha mo‑nyumba iyo. Niho akamotoorera Sawuri amabhökö ighoro yaache, akamobhoorera, “Oo mohiiri waane Sawuri, Omutëmi nantomiri ghokoocho, kubha otore korighi wiiki na wiichöribhu Akörö Ahörëëru. Omutëmi uyo niwe Yesu uno akorweriire mo‑nchëra, eriibhagha ore oraacha hano.” 18Hayo hayo eheghiro henga ehighachööri heeghagho koru mo‑miisho ghaache, aghasëëma korighi wiiki. Niho akiimeerera, akabhatiisu. 19Akamara akaraaghëra, akabhöna changuru wiiki.

Sawuri ˆakamuhökëri Yesu Tamaasiko

Sawuri aghiikara chaasiko insuuhu mo‑moghya o Tamaasiko haghirohamu na abhaghëndi bha Yesu. 20Mo‑chaasiko chiyo chiyo, aghasëëma ghuye mo‑masinaghooghi na kuraghani kubha Yesu niwe Omoona o Ryobha. 21Abhaato bhoose bhano ꞉bhooghwire ameeghi ghayo gha Sawuri, bhakahagha chwee. Bhakabhoorani, “Omooto uno kana! Taanyi wuure are ariita abhaato bha Yesu iyo Yerusareemu? Kana, taanyi uno ichiri hano abhaghöötë abhaato bhanga bhayo na kobhahira mo‑bhakoro bha bhachaama?” 22Sawuri akëëngëra kweghi abhaato kwo Mandëkö ighoro e Yesu, gho changuru akabha arabhëërëki obhuhëënë akaroghoori Abhayahuuti bhano ꞉bhaamanyiri Tamaasiko kubha Yesu niwe Kirisito.

23Chaasiko chaaru chiiche koheta, Abhayahuuti bhakarwacha ekiina ghe komwita Sawuri. 24Obhotiko no omwishe, Abhayahuuti bhaakabha bharamobhuumara mo‑bhehita bhe moghya uyo, kubha arahoroka bhabhönë komwita. Amare Sawuri akooghu amangʼana gha rirwacha riyo. 25Abhaghëndi bhaache bhakamusöhi mo‑ghotonga ghokoro obhotiko, bhakamoheti mwibhanga rino reere mwibhendo re moghya, bhakamwikeri anche aghaye.

Sawuri ˆaghaye Yerusareemu

26Mbe, Sawuri aghaye Yerusareemu, aghasaki ghughöötana na abhaghëndi bha Yesu, ibho bhakamotiina, gho kubha bhataakumiri kubha hëënë nabheere omughëndi o Yesu. 27Niho Bharinaabha akamwimoki akamohira Sawuri kwo bhatomu bha Yesu. Akabhabhoorera kinya Sawuri amorooche Omutëmi mo‑nchëra araghe Tamaasiko, na bhuure Omutëmi ꞉asiikiire nawe. Wiiki akabhamënyi kinya Sawuri ꞉eghiri abhaato iyo Tamaasiko ighoro e Yesu kwo bhosubhesubhe.

28Mbe, Sawuri aghiikara haghirohamu na abhatomu bhayo bha Mutëmi. Aghaghënda Yerusareemu yoose, areeghi abhaato ighoro e Mutëmi kwo bhosubhesubhe. 29꞉Naasiikiire na ghushangʼaana na Abhayahuuti bhano ꞉bhaasiikiire eghighambo ghe Keyunaani, ighoro e Yesu, amare ibho bhaghakiibhi komwita. 30Hano abhakumi abhande ꞉bhaamënyiri angʼana iyo, bhakamohira mbagha mo‑moghya o Kayisaariya, bhakamotomani aghi mo‑moghya o Taaso.#9:30 Taaso niho ꞉haare awaabho Sawuri.

31Mbe, chaasiko chiyo, abhaato bha mo‑kanisa haghiro hoose ha Yuteya, na Ghariraaya, na Samaariya bhaakabha no omurëmbë. Abhaato bhayo bhakabhöna changuru na ghotooru omukörö na Akörö Ahörëëru. Bhaakabha bharamosooka Omutëmi, ne ekirëngërë ke bhano ꞉bhaakumiri ghëkëëngëra chwee.

Ayineya ˆakahöru

32Bheetero naare araköra orughëndö ahaghiro haghare haghare. Orosiko rumu akahika mo‑moghya o Riita kobhataarera abhatööbhiyu bhano bhamanyiri iyo. 33Ibheere hano ahikiri hayo, akamubhöna omooto umu uno are akuure eribhaara, eriina reeche Ayineya. Omooto uyo naare amisiri a‑bhorere kwo riibhagha re meeka enaane. 34Bheetero akamobhoorera Ayineya akabhugha, “Yesu Kirisito ˆaghakuhöri. Bhooka! Waare obhorere bhoocho.” Hayo hayo Ayineya akiimeerera. 35Abhaato bhoose bha mo‑moghya o Riita, na bhano ꞉bhaare bhamanyiri mo‑möörö o Sharooni, hano bhamorooche Ayineya araghënda, bhakamwigharurera Omutëmi.

Bheetero ˆakamoryoki Torikaasi

36Mo‑moghya o Yoobha naare‑ho omukari umu omughëndi o Yesu, eriina reeche Tabhiita. (Na mo‑ghighambo ghe Keyunaani, eriina riyo n‑Torikaasi, egheteemoro keeche n‑asuma.) Torikaasi uyo naare arabhasakeri abhahabhe, akabha araköra amaköri amachömu. 37Chaasiko chiyo Torikaasi akabhabhara, antenero aghaku. Abhaato bhakawishaabhi omobhere waache, bhakawuraari mo‑kenyumba ki rëngö. 38Eriibhagha riyo, abhaghëndi bhayo ꞉mbooghwire kubha Bheetero naare mo‑moghya o Riita. Wiiki gho kubha Riita uyo noore haghuhe no omoghya waabho o Yoobha, bhaghatoma abhaato bhabhere bhamogheere Bheetero. Hano bhahikiri bhakamusasaama Bheetero bharabhugha, “Ntoghoghusabha, toghi bhowiito bhwango!”

39Mbe, Bheetero aghatanura haghirohamu nabho. Hano bhahikiri Yoobha, bhakamohira mo‑kenyumba kiyo. Hano bhahikiri‑mu, abhasino bhaaru bhakamwinaareri bhararera, bhakamwërëki chandachana, na amaghööti ghano Tabhiita are abhatumiire, eriibhagha are akeere anyi muhöru.

40Mbe, Bheetero akabhahoroki bhoose anche, akahighama, akarisabha Eryobha. Akamara akawiigharurera omobhere uyo, akabhugha, “Tabhiita, bhooka!” Tabhiita akaramoki, akamorighi Bheetero, akabhooka, aghiikara. 41Bheetero akamughööta okubhökö akamusakeri kwimeerera. Akabhabherekera abhasino bhaare na abhatööbhiyu abhande, akamuhaana ghokoobho anyi muhöru. 42Amangʼana ghayo ghaghasancha chwee mo‑moghya uyo woose o Yoobha. Hano bhooghwire amangʼana ghayo, abhaato bhaaru bhakamokumi Omutëmi. 43Bheetero aghiikara hayo Yoobha chaasiko chaaru, akabha ariikara mo‑nyumba e Simiyooni omuköri o mashëërö.

Currently Selected:

Amaköri gha Bhatomu 9: ntk

Highlight

Copy

Compare