Amaköri gha Bhatomu 6

Abhatoorereri mohungate ˆbhakaahöru

1Mo‑chaasiko chiyo ekirëngërë ke bhaghëndi bha Yesu ghëkëëngëra chwee. Ghate yaabho n‑Abhayahuuti bhano ꞉bhaare bharasiikëra eghighambo ghe Keyunaani na abhande bhano ꞉bhaasiikiire eghighambo ghe Kebhuraaniya.#6:1 Abhayahuuti bha Yerusareemu mbaare bha manga maaru. Abhande simoka yaabho, neere koru mo‑chaase echende. Bhataare Abhiisiraeri, ibho mbaare bharasiikëra Ekeyunaani. Abhayahuuti bha Yuteya na Yerusareemu mbaare bharasiikëra eghighambo keebho ghe Kebhuraaniya. Ibheere bhano ꞉bhaare bharasiikëra Ekeyunaani bhaakabha bhariingʼunyerangʼunyera kubha, mo‑hööhi e bhiinyakurë bhe kira siko mbaare bharabheebhu abhasino bhaabho. 2Gho ghayo, abhatomu ikomi na bhabhere bhakabhakoma abhaghëndi bhaabho bhoose, bhakabhabhoorera bhakabhugha, “Taanyi bhoheene itu totighe kweghi angʼana e Ryobha gho ghiri e kobhahööhi abhaato ebhiinyakurë. 3Mbe, bhahiiri bhiito mumööhi ghate yaanyu, mwahure abhaato mohungate bhano bhamënyëkiine na abhaato bhakobhaghamba kubha mbaanyi na asughara inchömu, na amangʼiini na bhano bhiichoriibhu Akörö Ahörëëru. Bhayo nibho tobhatoore mo‑meremo ghino ghe kuhööhi abhaato ebhiinyakurë, 4kubha itu twëndërërë korisabha Eryobha, na kweghi abhaato Angʼana yaache.”

5Angʼana iyo ekabhategheri chwee abhaato bhayo bhoose. Bhakamwahura Siteebhano, omooto uno ichwire Akörö Ahörëëru no obhokumi. Wiiki bhakabhaahura Bhiiribho, na Bhurokoro, na Nikanoori, na Timooni, na Bharimeena, na Nikoraawo o koru Antiyokiya,#6:5 Amariina gha bhaato bhayo bhoose n‑gha Keyunaani. Gho ghayo, nekwërëki kubha abhaato bhayo mbaare bha rikinda re Keyunaani. iwe n‑omooto o matöngö are amare naare akumiri atiini e Kiyahuuti. 6Bhakabharëëta abhaato bhayo mohungate ambërë e bhatomu, nabho bhakabhasabhera, na kobhatoorera amabhökö ighoro yaabho gho kobhiitabheri.

7Angʼana e Ryobha ëkëëndërëra ghusancha mo‑bhaato. Wiiki ekirëngërë ke bhaghëndi bha Yesu ghëkëëngëra chwee iyo Yerusareemu, na koru erikinda ikoro re bhachaama bhakamokumi Yesu.

Siteebhano ˆaghaghöötu

8Siteebhano uyo, Eryobha ꞉ndeemoheere aghareeya yaaru, na changuru chaaru, akabha araköra ebhyërëkërëri ne ebhiraghe mo‑bhaato. 9Amare Abhayahuuti abhamu bhaakabha bharasaki kuhakaana nawe. Abhaato bhayo ꞉mbaaruure mo‑risinaghooghi rino rebherekiiru Anyumba e Bhaato Huuru. Abhamu ghate yaabho ꞉mbaaruure mo‑moghya o Kireene na Arekisantiriya, na abhande ꞉mbaaruure mo‑chaase che Kirikiya, na Asiya. Abhayahuuti bhayo bhaghasëëma kuhakaana na Siteebhano, 10amare bhataatoriri komokinda gho kubha naare na amangʼiini kwo bhotoro bho Körö Ahörëëru ino ꞉emukangatiri hano are arasiikëra.

11Mbe, niho bhakabhaha abhaato nyarebhe amasooya, bhasiikërë obhuröngö ighoro e Siteebhano kubha, ꞉mbaamooghwire arasiikëra amangʼana amabhe ighoro e Ryobha na Musa. 12Hano bhasiikiire amangʼana ghayo, ghakabhaseeghereri chwee abhaato, haghirohamu na abhagharuka bha Bhayahuuti na abheeghi bha meghiro. Abhaato bhayo bhoose bhakamughööta Siteebhano, bhakamohira mo‑riibharacha eriikoro re Bhayahuuti. 13Bhakarëëta abhiibhateri bha bhuröngö, bhaghasiikëra obhuröngö gho Siteebhano kubha, “Omooto uno taaghotigha naabha ghosiikëra amangʼana amabhe ighoro e Risëngërö rino Eritööbhiyu, koru na wiiki ighoro e meghiro ghe Musa! 14Wiiki ntomooghwire arabhugha kubha, Yesu o Nasareeti nakuhaanyura Erisëngërö rino re Ryobha, wiiki naghugharura chaasughara chino Musa atotighiire.”

15Abhaato bhoose bhano ꞉bhaare mo‑riibharacha riyo, bhakamoomeri amiisho Siteebhano, bhakarighi obhosho bhooche bhorarëngaari kinya bho marayika.

Currently Selected:

Amaköri gha Bhatomu 6: ntk

Highlight

Copy

Compare