Amaköri gha Bhatomu 4
4
Bheetero na Yohana ambërë e riibharacha
1Hano Bheetero na Yohana ꞉bhaare bhakeere bharasiikëra na abhaato bhayo, abhachaama, na Amasatukaayo, no omokoro o bhachongi bha Risëngërö bhakabhasëëta. 2Abhakoro bhayo mbaare bhakariire chwee, gho kubha Bheetero na Yohana mbaare bhareeghi abhaato bharabhabhoorera kubha, Yesu naryokiri koru mo‑bhaku. Angʼana iyo nekwërëki kubha, abhaku mbakoryoka. 3Ibheere bhakabhaghööta Bheetero na Yohana. Eriibhagha riyo n‑omughörööbha ꞉haare, bhakabhatoora mwighërëcha mbagha atabhoori yaache. 4Koru hangʼu, amangʼana ghano Bheetero na Yohana ꞉bhaare bhamariri kobhoorera abhaato, abhaato bhaaru ꞉mbaaghakumiri. Bhano ꞉bhaakumiri abhasubhe abheene, mbaare kinya ebheku bhitaano (5,000).
5Atabhoori yaache, abhachaama, na abhagharuka, na abheeghi bha meghiro#4:5 Abhachaama, na abhagharuka, na abheeghi bha meghiro. Abhaato bhayo nibho ꞉bhaare abhakangati bha Bhayahuuti, wiiki nibho ꞉bhaare abhaato bha riibharacha re Sanihetiriini. Mööhi Eriibharacha eriikoro mo‑Mangʼana Amaköngʼu. bhaghiikomana hayo Yerusareemu. 6Mo‑kiina kiyo, naare‑mu Anaasi Omuchaama Omokoro, na Kayabha, na Yohana, na Arekisanta, na abhande bhano ꞉bhaare bha mo‑rwibhoro ro Anaasi. 7Bhaghatomani Bheetero na Yohana bharëëtu, bhakabhiimeereri ambërë e riibharacha, bhakabhabhoori bharabhugha, “Motobhoorere ghayo moore moraköra, ꞉mooghaköriri kwo bhotoro ke, na kwo riina rya we?”
8Eriibhagha riyo Bheetero akabha ichoriibhu Akörö Ahörëëru, akabhagharokeri akabhugha, “Abhasooku abhakangati na abhagharuka bha Isiraeri! 9Reero moghotobhoori amabhoori nibhu tomotooriri omooto uno are omubhëëru, na moghotobhoori nibhu ahöruru. 10Mbe, inyu bhoose, haghirohamu na Abhiisiraeri abhande bhoose, nekwënda mumënyë obhuhëënë kubha, uno imeeriire ambërë yaanyu nabheere omuhöru kwo bhotoro bho riina re Yesu Kirisito o Nasareeti. Yesu uyo niwe uno inyu ꞉moomumambiri mo‑musarabha, amare Eryobha rekamoryoki koru mo‑bhaku. 11Niwe uno Amandëkö Amatööbhiyu ghakobhugha ighoro yaache kubha,
‘Eriibhohe rino mwangiri inyu abhaabhëki,
niryo ribheere eriibhohe ikoro re bhoroso.’#4:11 Mööhi Sabhuri 118:22.
12“Obhotoori mbokubhönëka kwo riina re Yesu Kirisito omwene chiri! Retaanyi‑ho eriina erende mo‑se ino rino rekwëndëru ghototoori itu, ne eriina re Yesu eryene chiri!”
13Abhakoro bhayo bhakaroghoora chwee korighi kubha Bheetero na Yohana mbasiikiire kwo bhosubhesubhe, wiiki mbaare bheeche kubha ibho m‑bhaato bha hangʼu hangʼu bhano bhatasömiri. Niho bhakamënya kubha Bheetero na Yohana mbaare haghirohamu na Yesu kwo riibhagha riyo. 14Mbe, gho kubha abhakoro bhayo, mbaare bharamorighi omooto uno ahöruru imeeriire haghirohamu nabho, bhataare na angʼana e ghugharokeri. 15Mbe, bhakabhahatëka Bheetero na Yohana bhahoroke anche e riibharacha riyo. Ibho bhaghasaagha bharoochoochani amangʼana ghayo 16na kobhoorani kubha, “Tobhakörë bhu, abhaato bhano? Abhiikari bhoose bha hano Yerusareemu mbeeche kubha mbaköriri ekyërëkërëri ghekoro, wiiki totaaghotora ghokyanga. 17Ibheere tobhashaangʼi kubha, bhatasiikëra wiiki no omooto wowoose ighoro e riina re Yesu, kubha tuhööchërërë amangʼana ghano ghatasancha bhobhe mo‑bhaato.”
18Bhakamara abhakoro bhayo bhakabhabherekera Bheetero na Yohana. Bhakabhashaangʼi gho kobhahaarera bharabhugha, “Eriina riyo re Yesu, motasaka wiiki kweghi abhaato ighoro yaache, koru motarebhera!” 19Amare Bheetero na Yohana bhakabhagharokeri bhakabhugha, “Inyu abheene, mumööhi aribha eghuchömëra mo‑miisho gha Ryobha, kobhasooka inyu ghokera koresooka Eryobha. 20Itu totaaghotora ghotigha ghosiikëra ighoro e mangʼana ghano torooche na ghoghooghu!”
21Hano bhamariri kobhatiini Bheetero na Yohana bhakabhatighooroka. Abhakoro bhayo bhatarooche anchëra e kobharööna, gho kubha abhaato bhoose mbaare bharareghongi Eryobha chwee ighoro e kiraghe kiyo. 22Omooto uno ahöruru, n‑omubhëëru are korwera kwibhoru kooche, naare ne emeeka kinya miröngö ene no obhusaagho.#4:22 Mööhi Amaköri gha Bhatomu 3:2.
Abhakumi bha Yesu ˆbhakarisabha Eryobha rebhatoore changuru
23Bheetero na Yohana, hano bhatighoorokuru, bhakabhasëëta abhakumi bhaghëndi bhaabho. Bhakabhabhoorera amangʼana ghoose ghano ꞉bhaabhooriiru na abhakoro bha bhachaama na abhagharuka bha Bhayahuuti. 24Hano abhaghëndi bhaabho bhooghwire amangʼana ghayo, bhoose bhaghaghöötana haghirohamu korisabha Eryobha bharabhugha, “Oo Mutëmi, iye niiye omukangati omokoro o bheghiro bhyose. Iye niiye ꞉utëëmiri erishaaro, na ase, na anyancha, na bhyose bhino bheenyi mwishaaro, na mo‑se, na mo‑nyancha. 25Iye ꞉noosiikiire gho Körö Ahörëëru gho kohetera omonu o sookoro wiito Tawuti, omutamishi waacho, orabhugha,
‘Neke amatöngö ˆghaghakararera?
Ngwake abhaato bhaghuköra obhorwachi
bhuno bhotaanyi no obhwëra?
26Abhatëmi bha chaase
na abhakangati mbiikomiine haghirohamu,
kubha bhamwange Omutëmi Waryobha,
na Kirisito waache.’#4:25–26 Mööhi Sabhuri 2:1–2.
27“M‑mahëënë kubha, omutëmi Herote Antibha na Bhontiyo Bhiraato, ꞉mbaatëmëëriine haghirohamu na abhaato bha matöngö na Abhiisiraeri, mo‑moghya o Yerusareemu kubha bhamwange Yesu, omutamishi waacho Omutööbhiyu uno ꞉omwahwire kubha Kirisito. 28Ghayo ꞉bhaaköriri bhayo, nigho ghano iye ꞉wëëndiri ghaköru korwera simoka, wiiki ꞉nooghakangatiri kwo bhotoro bhoocho. 29Ibheere Omutëmi Waryobha, mööhi kinya bhaghototiini, ntoghusabha otusakeri! Otukörë itu abhatamishi bhaacho, kuraghani angʼana yaacho kwo bhosubhesubhe bhoose. 30Taata, ughöröröki okubhökö koocho otukörë totore kuhöri abhaato, otusakeri ghuköra ebhyërëkërëri ne ebhiraghe kwo eriina re Yesu, omutamishi waacho Omutööbhiyu!”
31Hano bhamariri ghusabha Eryobha, anyumba ino ꞉bhaare bhatëmëëraniire‑mu eghasingisu. Bhoose bhayo bhaghiichoribhu Akörö Ahörëëru, bhaghasëëma kweghi abhaato angʼana e Ryobha kwo bhosubhesubhe.
Obhumu no obhughöötani bho bhakumi
32Abhakumi bhayo bhoose mbaare bhaghöötiine korwera mo‑metema na mo‑miihëëbhö ghaabho. Taanyi‑ho mooto uno ꞉ighombiire ebheghiro bheeche kubha m‑bhebheeche omwene, amare ꞉mbaaghöötiini ebheghiro bheebho bhyose. 33Abhatomu bha Yesu mbaare bharabhabhoorera abhaato gho changuru chaaru amangʼana ighoro e Mutëmi Yesu kubha naryokiri. Eryobha rekabhaha aghareeya yaache kwo bhwaru bhoose. 34Mbe, taare‑ho omooto ghate yaabho uno ꞉asuuhiiru ne egheghiro, gho kubha bhano ꞉bhaare ne emeghondo hande chanyumba ꞉mbaaghoriri, bhakabharëëtëra abhatomu bhayo chambiiri. 35Chambiiri chiyo abhatomu bhayo bhaghachihööhi abhaato, kurëngʼaana na amënda gha mooto woose.
36Gho ghetuubhaani naare‑ho Omuraawi umu eriina reeche Yusubhu, omwibhoru o se e Kiibhuro, uno abhatomu bha Yesu bhamoheere eriina re Bharinaabha, egheteemoro keeche Uno Aghotoora Omukörö. 37Bharinaabha woose ꞉naaghoriri omoghondo waache, na chambiiri chino ꞉abhwine, aghachihaana kwo bhatomu bhayo.
Currently Selected:
Amaköri gha Bhatomu 4: ntk
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved
Amaköri gha Bhatomu 4
4
Bheetero na Yohana ambërë e riibharacha
1Hano Bheetero na Yohana ꞉bhaare bhakeere bharasiikëra na abhaato bhayo, abhachaama, na Amasatukaayo, no omokoro o bhachongi bha Risëngërö bhakabhasëëta. 2Abhakoro bhayo mbaare bhakariire chwee, gho kubha Bheetero na Yohana mbaare bhareeghi abhaato bharabhabhoorera kubha, Yesu naryokiri koru mo‑bhaku. Angʼana iyo nekwërëki kubha, abhaku mbakoryoka. 3Ibheere bhakabhaghööta Bheetero na Yohana. Eriibhagha riyo n‑omughörööbha ꞉haare, bhakabhatoora mwighërëcha mbagha atabhoori yaache. 4Koru hangʼu, amangʼana ghano Bheetero na Yohana ꞉bhaare bhamariri kobhoorera abhaato, abhaato bhaaru ꞉mbaaghakumiri. Bhano ꞉bhaakumiri abhasubhe abheene, mbaare kinya ebheku bhitaano (5,000).
5Atabhoori yaache, abhachaama, na abhagharuka, na abheeghi bha meghiro#4:5 Abhachaama, na abhagharuka, na abheeghi bha meghiro. Abhaato bhayo nibho ꞉bhaare abhakangati bha Bhayahuuti, wiiki nibho ꞉bhaare abhaato bha riibharacha re Sanihetiriini. Mööhi Eriibharacha eriikoro mo‑Mangʼana Amaköngʼu. bhaghiikomana hayo Yerusareemu. 6Mo‑kiina kiyo, naare‑mu Anaasi Omuchaama Omokoro, na Kayabha, na Yohana, na Arekisanta, na abhande bhano ꞉bhaare bha mo‑rwibhoro ro Anaasi. 7Bhaghatomani Bheetero na Yohana bharëëtu, bhakabhiimeereri ambërë e riibharacha, bhakabhabhoori bharabhugha, “Motobhoorere ghayo moore moraköra, ꞉mooghaköriri kwo bhotoro ke, na kwo riina rya we?”
8Eriibhagha riyo Bheetero akabha ichoriibhu Akörö Ahörëëru, akabhagharokeri akabhugha, “Abhasooku abhakangati na abhagharuka bha Isiraeri! 9Reero moghotobhoori amabhoori nibhu tomotooriri omooto uno are omubhëëru, na moghotobhoori nibhu ahöruru. 10Mbe, inyu bhoose, haghirohamu na Abhiisiraeri abhande bhoose, nekwënda mumënyë obhuhëënë kubha, uno imeeriire ambërë yaanyu nabheere omuhöru kwo bhotoro bho riina re Yesu Kirisito o Nasareeti. Yesu uyo niwe uno inyu ꞉moomumambiri mo‑musarabha, amare Eryobha rekamoryoki koru mo‑bhaku. 11Niwe uno Amandëkö Amatööbhiyu ghakobhugha ighoro yaache kubha,
‘Eriibhohe rino mwangiri inyu abhaabhëki,
niryo ribheere eriibhohe ikoro re bhoroso.’#4:11 Mööhi Sabhuri 118:22.
12“Obhotoori mbokubhönëka kwo riina re Yesu Kirisito omwene chiri! Retaanyi‑ho eriina erende mo‑se ino rino rekwëndëru ghototoori itu, ne eriina re Yesu eryene chiri!”
13Abhakoro bhayo bhakaroghoora chwee korighi kubha Bheetero na Yohana mbasiikiire kwo bhosubhesubhe, wiiki mbaare bheeche kubha ibho m‑bhaato bha hangʼu hangʼu bhano bhatasömiri. Niho bhakamënya kubha Bheetero na Yohana mbaare haghirohamu na Yesu kwo riibhagha riyo. 14Mbe, gho kubha abhakoro bhayo, mbaare bharamorighi omooto uno ahöruru imeeriire haghirohamu nabho, bhataare na angʼana e ghugharokeri. 15Mbe, bhakabhahatëka Bheetero na Yohana bhahoroke anche e riibharacha riyo. Ibho bhaghasaagha bharoochoochani amangʼana ghayo 16na kobhoorani kubha, “Tobhakörë bhu, abhaato bhano? Abhiikari bhoose bha hano Yerusareemu mbeeche kubha mbaköriri ekyërëkërëri ghekoro, wiiki totaaghotora ghokyanga. 17Ibheere tobhashaangʼi kubha, bhatasiikëra wiiki no omooto wowoose ighoro e riina re Yesu, kubha tuhööchërërë amangʼana ghano ghatasancha bhobhe mo‑bhaato.”
18Bhakamara abhakoro bhayo bhakabhabherekera Bheetero na Yohana. Bhakabhashaangʼi gho kobhahaarera bharabhugha, “Eriina riyo re Yesu, motasaka wiiki kweghi abhaato ighoro yaache, koru motarebhera!” 19Amare Bheetero na Yohana bhakabhagharokeri bhakabhugha, “Inyu abheene, mumööhi aribha eghuchömëra mo‑miisho gha Ryobha, kobhasooka inyu ghokera koresooka Eryobha. 20Itu totaaghotora ghotigha ghosiikëra ighoro e mangʼana ghano torooche na ghoghooghu!”
21Hano bhamariri kobhatiini Bheetero na Yohana bhakabhatighooroka. Abhakoro bhayo bhatarooche anchëra e kobharööna, gho kubha abhaato bhoose mbaare bharareghongi Eryobha chwee ighoro e kiraghe kiyo. 22Omooto uno ahöruru, n‑omubhëëru are korwera kwibhoru kooche, naare ne emeeka kinya miröngö ene no obhusaagho.#4:22 Mööhi Amaköri gha Bhatomu 3:2.
Abhakumi bha Yesu ˆbhakarisabha Eryobha rebhatoore changuru
23Bheetero na Yohana, hano bhatighoorokuru, bhakabhasëëta abhakumi bhaghëndi bhaabho. Bhakabhabhoorera amangʼana ghoose ghano ꞉bhaabhooriiru na abhakoro bha bhachaama na abhagharuka bha Bhayahuuti. 24Hano abhaghëndi bhaabho bhooghwire amangʼana ghayo, bhoose bhaghaghöötana haghirohamu korisabha Eryobha bharabhugha, “Oo Mutëmi, iye niiye omukangati omokoro o bheghiro bhyose. Iye niiye ꞉utëëmiri erishaaro, na ase, na anyancha, na bhyose bhino bheenyi mwishaaro, na mo‑se, na mo‑nyancha. 25Iye ꞉noosiikiire gho Körö Ahörëëru gho kohetera omonu o sookoro wiito Tawuti, omutamishi waacho, orabhugha,
‘Neke amatöngö ˆghaghakararera?
Ngwake abhaato bhaghuköra obhorwachi
bhuno bhotaanyi no obhwëra?
26Abhatëmi bha chaase
na abhakangati mbiikomiine haghirohamu,
kubha bhamwange Omutëmi Waryobha,
na Kirisito waache.’#4:25–26 Mööhi Sabhuri 2:1–2.
27“M‑mahëënë kubha, omutëmi Herote Antibha na Bhontiyo Bhiraato, ꞉mbaatëmëëriine haghirohamu na abhaato bha matöngö na Abhiisiraeri, mo‑moghya o Yerusareemu kubha bhamwange Yesu, omutamishi waacho Omutööbhiyu uno ꞉omwahwire kubha Kirisito. 28Ghayo ꞉bhaaköriri bhayo, nigho ghano iye ꞉wëëndiri ghaköru korwera simoka, wiiki ꞉nooghakangatiri kwo bhotoro bhoocho. 29Ibheere Omutëmi Waryobha, mööhi kinya bhaghototiini, ntoghusabha otusakeri! Otukörë itu abhatamishi bhaacho, kuraghani angʼana yaacho kwo bhosubhesubhe bhoose. 30Taata, ughöröröki okubhökö koocho otukörë totore kuhöri abhaato, otusakeri ghuköra ebhyërëkërëri ne ebhiraghe kwo eriina re Yesu, omutamishi waacho Omutööbhiyu!”
31Hano bhamariri ghusabha Eryobha, anyumba ino ꞉bhaare bhatëmëëraniire‑mu eghasingisu. Bhoose bhayo bhaghiichoribhu Akörö Ahörëëru, bhaghasëëma kweghi abhaato angʼana e Ryobha kwo bhosubhesubhe.
Obhumu no obhughöötani bho bhakumi
32Abhakumi bhayo bhoose mbaare bhaghöötiine korwera mo‑metema na mo‑miihëëbhö ghaabho. Taanyi‑ho mooto uno ꞉ighombiire ebheghiro bheeche kubha m‑bhebheeche omwene, amare ꞉mbaaghöötiini ebheghiro bheebho bhyose. 33Abhatomu bha Yesu mbaare bharabhabhoorera abhaato gho changuru chaaru amangʼana ighoro e Mutëmi Yesu kubha naryokiri. Eryobha rekabhaha aghareeya yaache kwo bhwaru bhoose. 34Mbe, taare‑ho omooto ghate yaabho uno ꞉asuuhiiru ne egheghiro, gho kubha bhano ꞉bhaare ne emeghondo hande chanyumba ꞉mbaaghoriri, bhakabharëëtëra abhatomu bhayo chambiiri. 35Chambiiri chiyo abhatomu bhayo bhaghachihööhi abhaato, kurëngʼaana na amënda gha mooto woose.
36Gho ghetuubhaani naare‑ho Omuraawi umu eriina reeche Yusubhu, omwibhoru o se e Kiibhuro, uno abhatomu bha Yesu bhamoheere eriina re Bharinaabha, egheteemoro keeche Uno Aghotoora Omukörö. 37Bharinaabha woose ꞉naaghoriri omoghondo waache, na chambiiri chino ꞉abhwine, aghachihaana kwo bhatomu bhayo.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved