HEBRU 1
1
Pathian Nih A Fapa In Bia A Chim
1Hlan ah cun Pathian nih kan pupa hna sin i bia a chim tikah profet kha a rak hman hna i a cheuchum tete le phun dangdang in a chimning cu a rak si. 2Sihmanhsehlaw atu kan chan, chan hmanung bik a simi chan ah hin cun, kan sinah a Fapa in a bia cu a chim. Amah thawng cun Pathian nih van le vawlei vialte kha a ser hna i amah cu Pathian nih a donghnak i zeizong vialte uktu ding i a thimmi cu a si. 3Amah cu Pathian sunparnak in a ceu i Pathian he aa lo taktakmi kha a si; cun van le vawlei kha, ṭhawnnak a ngeimi a bia in a domhtlaih hna. Minung cu an sualnak kha a thianhpiak dih hna hnu in vancung ah khin Lianngan Bik Pathian orhlei kamah a ṭhu.
Fapa Cu Vancungmi Hna Nakin A Ngan
4Pathian nih a Fapa cu vancungmi hna a pekmi nakin a ngan deuhmi min a pek bantukin, vancungmi hna nak ngan deuh ah a ser. 5Pathian nih a vancungmi pawl cu ahohmanh,
“Nangmah cu ka Fapa na si,
nihin ah na Pa ah ka cang,”
a ti bal hna lo.
Cu hleiah,
“Keimah cu a Pa ka si lai i
amah cu ka Fapa a si lai,”
ti zongah a ti bal fawn hna lo. #Slm 2.7; 2Sam 7.14; 1Cha 17.13
6Pathian nih a fater cu vawlei cung i a thlah tikah,
“Pathian vancungmi vialte nih
amah cu an biak awk a si,” a ti. #Deu 32.43
7Cun Pathian nih vancungmi pawl kong ah cun,
“Pathian nih a vancungmi hna cu
thlitu ah a ser hna i
a rianṭuantu hna cu meizik ah
a ser hna,” tiah a chim. #Slm 104.4
8Sihmanhsehlaw a Fapa tu cu,
“Maw Pathian, na bawiṭhutdan cu
zungzal in zungzal tiang
a hmun lai:
Na pennak cu dinnak in na uk. #Slm 45.6-7
9Ahmaanmi thil cu na duh i ahmaan
lomi thil cu na huat;
Cucaah cun Pathian,
na Pathian nih cun an thim i,
Na hawile hna nih an hmuhmi nakin
a ngan deuh suaumaumi upatnak
lunglawmhnak kha aan pek,”
tiah a ti.
10Cun, “Bawipa, nangmah nih
vawlei cu ser hram na thawk i
van khi nangmah kut nih
a sermi an si. #Slm 102.25-27
11Annih cu an lo dih lai, sihmanhsehlaw
nang cu na hmun lai;
puan bangin an hnawh dih lai.
12Angki bangin na bil hna lai i
puan bangin an i thleng dih lai.
Sihmanhsehlaw nang cu a zungzal in
nangmah ningte na si ko i
na tar bal lo,”
tiah a ti rih fawn.
13Pathian nih a vancungmi kha,
“Na ral cu na ke tangah ka chiah hna
hlan tiang,
Ka orhlei kamah hin ṭhu tuah,”
tiah ahohmanh a ti bal hna lo. #Slm 110.1
14A si ahcun vancungmi cu ahodah an si kun? Vancungmi cu Pathian rian a ṭuantu thlarau, khamhnak a hmu hngami bawmh awkah Pathian nih a thlahmi kha an si.
Currently Selected:
HEBRU 1: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006