SALM 56
56
Pathian I Bochan#56.0 Hebru holh ah cun, hi hla hi David nih Filistin mi nih Gath khua i an tlaih hnuah khan a phuah, tiin a um.
(1Sam 21.13-15)
1Ka ral nih an ka hrem
thluangthluan i
an ka cil lengmang caah hin
Maw Pathian, ka zaangfah ko sawh.
2A ka dohtu nih hin chun nitlak in
an ka hrem i
annih hi an tam hringhran ko.
3Ka thin a phan tikah,
Maw Cungnung Bik,
nangmah cu kan bochan.
4Pathian cu kaa bochan i a biakam cu
ka thangṭhat;
amah cu kaa bochan i ka thin
a phang lo.
Minung menmen nih cun zeidah
an ka ti khawh lai?
5Ka ral nih cun ka tuahmi thil kip ah
harnak an ka pek,
zeitindah a cungah fahnak
kan tlunter khawh lai ti kha
an ruat zungzal.
6Mi hmuh lonak hmun ah khan
an i thup i
ka tuahmi paohpaoh kha
an ka ngiat dih,
zeitindah kan thah khawh lai ti kha
an i ruahchih.
7An ṭhat lo ruangah cun,
Maw Pathian, dantat ko hna;
hi mi hna hi na thinhun in
raltuknak ah cun, sunghter ko hna.
8Zeitluk in dah harnak ka in kha
na hngalh;
ka mitthli cu na thawl chungah
na rawn hna,
na cauk chungah na ṭial hna
a si lo mei?
9Nangmah kan auh ni ah ka ral cu
an kir lai,
mah hi fiang tein ka hngalh —
Pathian cu keimah leiah a um.
10Pathian cu kaa bochan i a biakam cu
ka thangṭhat,
Bawipa biakamnak cu
ka thangṭhat lai.
11Amah cu kaa bochan i ka thin
a phang lo,
minung menmen nih cun zeidah
an ka ti khawh lai?
12Pathian, na sinah ka rak i kammi kha
kan pek lai,
thangṭhat thawinak cu kan pek lai,
13zeicahtiah nangmah nih thihnak
chungin na ka chuah i
ka ke kha rilhnak chungin
na khamh.
Cucaah Pathian hmaika ah cun
kaa chawk i
minung cungah a ceumi
a ceunak chungah cun ka um.
Currently Selected:
SALM 56: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
