JOB 33
33
Elihu Nih Job A Mawhchiat
1“Atu cu Job, ka chimmi hi
thei tuah,
ka bia vialte hi ṭha tein ngai
tuah hna.
2Zohhmanh, nangmah lehnak cu
timh cia in ka um ko;
Bia cu ka lei par ah an um ko.
3Hngalh bu tein ka chim kha
ka lung nih a hngalh i
Ka hmur nih an hngalhmi cu
hmaan tein an chim.
4Zeicahtiah Pathian thlarau nih
a ka ser i
Lianngan Bik thaw nih nunnak
a ka pek.
5Na ka leh khawh ahcun ka let tuah,
Ka hmaiah na bia cu a ningcang
tein tiang tuah hna;
Na dir hmun i serh tuah.
6Pathian mithmuh ahcun, kei zong
nangmah bantukte ka si ko;
Tlak pei khat ceo ka si ve ko.
7Na ka ṭihnak nih na thin an phanter
awk a herh lai lo,
Ka kut nih an nenhnak zong na cung i
a rih awk a herh lai lo.
8Na chim awk hnga vialte cu na chim
cang i ka theih cang;
Na bia thawng cu ka theih
cang hna:
9‘Ka thiang, sualpalhnak ka ngei lo,
soiselnak ka ngei lo i ṭhat lonak
ka chungah a um lo.
10Sihmanhsehlaw Pathian nih a palh ah
a ka chiah tawn i a ral ah a ka rel;
11Ka ke cu hreng a khenh hna i
ka tuahmi vialte cu
a ngiat dih hna,’ na ti. #Job 13.27
12“Zohhmanh, hihi kan lehnak a si lai: Na palh.
Pathian cu mi nakin a ngan deuh;
13Zeicahdah, ka bia cu zeihmanh
a ka let lo, tiin amah cu
na mawhchiat len ko?
14Amah cu a let khomi ahohmanh
an um ṭung lo.
Asi, Pathian nih voi khat
a chim hnuah cun, cu a chimmi
fehter ṭhannak caah a voi hnihnak
a chim ṭhan ti ṭung lo.
15Mang ah, zan i langhnak
an hmuhmi ah,
Mi cung i mitkuh thu a tlun tikah,
An ihkhun cung i an i hngilh
hluahmah lioah, #Job 4.13
16Khi tikah mi cu Pathian nih an hna
kha a hunpiak hna i
Ralrinnak a pekmi hna nih an thin
a phanter hna.
17-18A thi khomi minung cu
aa porhlawtnak kha
kham awkah le
Khor chung i vung tlak ding khan
tlaih awkah le
Thihnak tiva tan donh awkah khan
Nuncan ṭhalo i a nunnak khan
a merter.
19Minung cu a ihkhun cung i fahnak
a inmi le
A ruh chung i fahnak a hmuhmi
zongin chimhhrin a si tawn;
20Rawl kha a fih i a mertak i
A or nih rawl thaw bikbik hmanh
kha a duh hna lo.
21A titsa cu uai hnianghnuang in a um i
a ruh hna cu an i liklok dih.
22A thlarau cu Khor a phan dengmang i
A nunnak cu thihnak a phortu hna
sin kha a phan dengmang.
23Sihmanhsehlaw amah caah
vancungmi pakhat,
thong khat lak i pakhat,
Pathian le minung karlak i remnak
sertu a um i,
Minung nih ṭhatnak a tuahmi kha
a langhter i,
24A thi khomi minung cu a co awk
hnga kha petu ding a um ahcun,
‘Leet ṭhan ko, Khor chungah cun
vun kalter hlah,
A tlanhnak man cu ka hmuh cang,’
a titu a um ahcun,
25Cu pa cu a tlanval lio nakkhan a titsa
a ṭha deuh lai i
a ṭhawn siling te ah khan
a kir ṭhan lai.
26Cun Pathian kha ka zaangfah ko tiah
a nawl i
Na hmai kha ka hmuhter law
lawmhnak in ka au lai, tiah
a nawl ahcun,
27Cun mi vialte hmaiah, ‘Ka sual cang,
Dinnak kha dinlonak ah ka ser cang i
cucu ka rak ruat bal lo,’
a ti ahcun,
28Khor chung i vung kalnak khan
aa khamh i a nung i ceunak kha
a hmu.
29Hi thil vialte hi Pathian nih minung
cungah a tuah lengmang tawn ko,
30Nunnak ceunak tling cu hmuh awkah
Khor chungin a chuah ṭhan tawn
hna,” tiah a ti.
31“Maw Job, na hna chi tuah,
ka bia kha ngai tuah;
Dai tein um law ka chim lai.
32Chim awk zei na ngeih ahcun
ka let tuah;
Chim tuah, zeicahtiah nangmah
kha thiamcoh kan duh.
33Sihmanhsehlaw chim awk zeihmanh
na ngeih lo ahcun ka bia ngai tuah;
Dai tein um law, fimnak
kan cawnpiak lai,” tiah a ti.
Currently Selected:
JOB 33: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
