JOB 28
28
Mi Nih Fimnak An Kawl
1“Ngun cawhnak khor an um i
mi nih sui an ernak
hmun a um;
2Thir cu vawlei in an lak i dar cu
lung chungin an tit.
3A thap a donghnak cu a muihnak
tiang a phan i
a dongh khitkhet tiangin an kawl.
4Mi umnak hmun in a hlami nelrawn
ah khor an cawh hna;
Annih cu khualtlawngmi nih
an philh hna,
Mi he aa hlatnak ah an i thlai i
khattelei in khattelei ah an i vawr.
5A cung i vawlei in rawl kung an kho i
a tang vawlei cu mei a kangh
bantukin aa let.
6A lung chung cun lapis lazuli lungvar
kha an chuak i
sui pan tete nih khan a tuam hna.
7“Cuka lei kalnak lam cu
cawihmang va zeihmanh nih
an hngal lo i mupi mit zong nih
a hmu bal lo;
8Aa porhlawmi saram nih an lam lo i
rul nih a tan bal lo.
9“Minung nih ṭeklung pipi cu
an kuai hna i tlang pipi cu
a hram in an leh dih hna.
10Lungpang chungah khan kahcham
an cawh hna i a sungmi
lungphun kip kha an mit nih
a hmuh.
11Tiva kha an kham hna i vawlei tang i
a ummi thil kha lengah
an chuah hna.
12“Sihmanhsehlaw khuazei ah dah
fimnak cu hmuh khawh a si lai?
Hngalhthiamnak a hram cu
khuazei ah dah a si?
13Cuka kalnak lam cu mi nih
an hngal lo i
a nungmi ram ah hmuh a si lo.
14Rili thuk nih, ‘Ka chungah a um lo,’
a ti,
Rili te nih, ‘Ka sinah a um lo,’ a ti.
15Sui in cawk khawh a si lo i a man cu
ngun in thlai khawh a si lo.
16Ofir sui in a man tuak khawh a si lo i
Oniks le lapis lazuli lungvar zongin
tuak khawh a si lo.
17Sui le thlalang nih an tluk kho lo i
Sui thiang hlawn zong nih
a thleng kho lo.
18Koral lungvar le alabaster lungvar
hna cu chim awk tlak an si lo;
Fimnak cu lungvar man sung nakin
a cungnung deuh.
19Ethiopia ram topaz lungvar nih a tluk
kho lo i
Sui thiang zongin a man
tuak khawh a si lo.
20“A si ahcun, fimnak cu khuazei in
dah a rat kun?
Hngalhthiamnak a hram cu
khuazei ah dah a si kun?
21Vawlei cung i a nungmi thil ah
a hmu khotu an um lo i
Thli lak i a zuangmi va hna zong nih
an hmu kho lo.
22Thihnak le Rawhralnak nih
an i thawh i,
‘A kong hi biachawkvai lawngin
kan theih,’ an ti.
23“Sihmanhsehlaw cuka kalnak lam cu
Pathian nih a hngalh i
Amah lawnglawng nih a hram cu
a hngalh.
24Zeicahtiah vawlei deng tiang khan
a hmuh khawh i
Van tang i a ummi thil vialte kha
a hmuh dih hna.
25Thli cu a rihnak a pek i ti cu tahnak in
a tah hna i
26Ruah caah phung le lam kha
a ser hna i
Khuari nimtlau cu lam a serpiak
hna tikah khan;
27Kha caan hmanh ah khan fimnak cu
a rak hmuh cang i
A man a rak tuak cang i
a rak thlai cang.
28Cun minung cu a thawh i,
‘Zohhmanh, Pathian ṭih hi
fimnak cu a si,
ṭhat lonak hrial hi
hngalhthiamnak cu a si,’
tiah a ti,” a ti. #Slm 111.10; Phut 1.7; 9.10
Currently Selected:
JOB 28: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
