JEREMIAH 31
31
1Khi tikah keimah cu Israel phun vialte hna Pathian ka si lai i annih cu ka mi an si lai, tiah Bawipa nih a ti. 2Mah hihi Bawipa bia cu a si:
Vainam in a luatmi hna nih khan
thetse ram ah zaangfahnak an hmuh;
Israel mi hna nih dinhnak kha
an duh tikah,
3Lamhlat piin an sinah ka rung lang;
Israel mi hna, nannih cu kan dawt
zungzal hna i
Dong loin kan zohkhenh zungzal
ko hna.
4Nannih cu kan tunmer ṭhan hna lai.
Nan tingtang kha nan i lak ṭhan hna lai i
lawmhnak in nan lam ṭhan lai.
5Samaria tlang cungah khan
mitsur dum kha nan ser ṭhan
hna lai i
Mitsur dum in a chuakmi cu
a cingtu hna nih khan an ei lai.
6Efraim tlang cung i ralveng hna nih,
“Ra u law Zion ah hung kal u sih,
Bawipa kan Pathian sinah cun
hung kal u sih,” an ti caan kha
a ra lio, tiah a ti.
7Zeicahtiah mah hihi Bawipa bia cu
a si:
Jakob ruangah lunglawmhnak in
thang piin au tuah u,
Miphun lakah phun ngan bik a si;
Thangṭhatnak cu hla in sa u law,
Bawipa nih a mi cu a khamh
cang hna i
Israel mi a tangmi hna cu
a zuah hna, tiah chim u.
8Chaklei ram in ka ratpi hna lai,
Vanhramdeng in ka pumh hna lai.
Mitcaw le kebei zong an sinah
an ra ve lai i
Fapawi le a ni thla a tling
dengmangmi hna zong
an sinah an i tel lai;
Miphun ngan piin an ra kir ṭhan lai.
9Inn ah an ra tlung, an tlun pah in
an ṭap,
Sihmanhsehlaw ka hnemh hna lai i
keimah cu a cawngtu hna ka si lai.
A luangmi tiva ah ka hruai hna lai;
An lam kha a mil tuk caah
an tlu an ril lai lo.
Zeicahtiah keimah cu Israel mi caah
an pa ka si cang i
Efraim cu ka fapa upa bik a si.
10“Bawipa bia cu ngai tuah u,
Maw miphun hna,
Thanh u law rilikam ram le a hlatmi
tikulh hna cu hngalhter hna u:
‘Israel cu a ṭhektu nih khan a pumh
ṭhan lai i
Tuukhal nih a tuurun a zohkhenh
bangin a zohkhenh lai,’
tiah chim u.
11 Bawipa nih Jakob cu a tlanh
ṭhan cang i
A ṭhawngmi a ral kut chung
khan a chuah ṭhan cang.
12Zion tlang par ah cun lawmhnak
aw thawng he an ra lai,
Bawipa nih ṭhatnak tampi a pek hna
caah hmaipanh ngaiin an ra lai,
Ṭhatnak a pekmi hna cu rawl le
mitsur hang thar le chiti le tuurun
chung i a no tete le cawrun chung i
a no tete tampi kha an si.
Ti toihmi dum bantuk an si lai i
zeihmanh an chambau bal ti lai lo.
13Cun ngaknu hna cu an lam lai i
an i lawm lai,
Tlangval le patar hna cu an tha
a nuam lai;
An mithi zunngaihnak cu
lunglawmhnak ah ka thlen lai,
Ka thin ka nemter lai i
an ngaihchiatnak lonh in
lunglawmhnak ka pek hna lai.
14Tlangbawi hna cu hi ram thau kha
ka vuaiter hna lai i
Ka mi hna cu ka ṭhatnak in
an khim lai,”
tiah Bawipa nih a ti.
15 Bawipa nih hi bangin a ti:
“Ngai hmanh, lunghno ngaiin ṭahnak
thawng cu Ramah khua ah a thang,
Cucu Rachel nih a fale a ṭah hnanak
thawng kha a si;
A fale kha an um ti lo caah hnemh
kha a duh lo.” #Gen 35.16-19; Mat 2.18
16 Bawipa nih hi bangin a ti:
“Fak piin na ṭah lengmang ko cu
ngol cang law na mitthli thla
ti hlah;
Zeicahtiah na rianṭuan man ah
laksawng kan pek lai,
Annih cu an ral hna ram in
an kir ṭhan lai.
17Na hnu i a rung um dingah
tefa na thlautak hna lai;
Na fale hna cu anmahle an ram te ah
khan an kir ṭhan lai.
18Israel mi hna nih ngaihchia in,
‘Bawipa, kannih cu a hrang i a lung a
khongmi cawtum bantuk kan si,
sihmanhsehlaw nangmah nawl zulh
kha na kan cawnpiak;
Kan hruai ṭhan law kan ra kir ko lai;
nangmah cu Bawipa, kan Pathian
na si.
19Na sinin kan rak pial cang,
sihmanhsehlaw ra kir ṭhan zau kha
kan duh.
Kannih kha dan na kan tat hnuah cun
ngaihchia in kan lu lawng
kan khun ko.
Kannih nih kan no lioah kan rak sual
caah khan ningzahnak le
hmaichiatnak kha kan rak tong,’
an ti kha ka theih.
20“Efraim, nangmah cu ka dawt bikmi
fa na si.
Na min ka chim fate, nangmah kha
dawtnak in kan ruat tawn.
Nangmah cu ka lung nih an ngai i
na cungah zaangfahnak ka ngei lai,”
tiah Bawipa nih a ti.
21“Nan lam chingchiahnak dingah
lungpon hnuai hna u,
chingchiahnak tung phun hna u;
Nan zulh dingmi lam cu fiang tein
i hngalh u.
Ra kir ṭhan tuah u, Maw Israel mi hna,
Nan khua hna ah cun ra kir ṭhan cio
tuah hna u.
22Zeicahdah lung awṭawm in
nan um lai,
nannih zumhawktlak lomi hna?
Bawipa nih thil thar pakhat vawlei
cungah hin ka ser:
nu nih pa an tluk hna lai.”
23Ralkapbu Bawipa, Israel Pathian nih
hitin a ti: “Annih cu an ram ah
ka kirter ṭhan hna tikah,
Judah ram le a khua hna ah cun,
‘Bawipa nih Jerusalem tlang thiang
a umnak hmun thiang cu,
Thluachuahnak pe ko seh,’ tiah
an ti ṭhan lai.
24Judah ram le a khua hna chungah khan mi cu an um lai i lothlo zong an um lai i an tuurun he a ummi tuukhal hna zong an um lai. 25A bami cu ka hrimhter ṭhan hna lai i rawlṭam in thazang a tlawmmi cu rawl khim tein ka pek hna lai. 26Cu tikah ka mi hna nih cun, ‘Kaa hngilh i ka thazang a tlung ṭhan,’ an ti lai.
27“Bawipa nih hi bangin a ti: Israel ram le Judah ram cu minung le saram in ka khahter hna lai caan a ra lio. 28Annih cu ṭheh awk le phawi awk le chimh awk le hrawh awk le harnak pek awkah ka rak ngiat hna bantuk khan atu cu annih kha tun awk le thawh awkah ka zohkhenh cang hna lai, tiah Bawipa nih a ti. 29Cu caan a phak tikah cun, mi nih,
‘An pale nih mitsur thei thor an ei i
An fale ha a za,’
an ti ti lai lo. #Eze 18.2 30Ahohmanh mitsur theithor a eimi cu amah hate kha a za ko lai i ahohmanh amahle a sualnak ruang te ah a thi ko lai.”
Biakam Thar
31“Israel mi hna le Judah mi hna he biakamnak thar ka ser lai ni cu a ra lio, tiah Bawipa nih a ti. #Mat 26.28; Mar 14.24; Luk 22.20; 1Kor 11.25; 2Kor 3.6 #Heb 8.8-12 32Izipt ram in chuahpi awkah an kut in ka hruaimi hna an pupa hna sinah ka tuahmi biakamnak bantuk kha a si lai lo. Ka biakamnak kha an zul lo nain an cungah ka lung a sau, tiah Bawipa nih a ti. 33Sihmanhsehlaw cu caan cu a phak tikah, Israel mi hna he biakamnak ka ser laimi cu mah hihi a si: Ka phunglam cu an chungah ka chiah lai i an lungthin cungah ka ṭial lai. Keimah cu an Pathian ka si lai i annih cu ka mi an si lai,” tiah Bawipa nih a ti. #Heb 10.16 34Cun annih nih pakhat le pakhat kha, ‘Bawipa kha hngal tuah,’ tiin i cawnpiak kha an herh ti lai lo, zeicahtiah a hme bik in a ngan bik tiang, an dihlak in an ka hngalh lai. An ṭhat lonak kha ka ngaihthiam hna lai i an sualnak kha ka hngal camcin ti lai lo,’ tiah Bawipa nih a ti. #Heb 10.17
35Chun ceutertu ah ni a chia i zan ceutertu ah arfi le thlapa kha a chia i rili tilet kha a thawhter i a awnhtertu nih hitin a ti, a min cu Ralkapbu Bawipa a si:
36Thil umtuning ka chiahmi hi
ka hmaika in a loh khawh a si ahcun,
Cu tik bel ah Israel tefa hna cu
ka hmaika i miphun si ti lo dingin
an lo ve hnga,
tiah Bawipa nih a ti.
37Cunglei van khi aho tal nih tah kho in tanglei vawlei hi aho tal nih a thuknak hlai khawh si seh law, cu tik bel ah Israel tefa vialte hna cu an tuahmi ruangah khan ka hlawt khawh hna hnga, tiah Bawipa nih a ti.
38“Zohhmanh, khuapi cu Hananel Innsang in Kil Kutka timi tiang, Bawipa upatnak caah sak ṭhan a si lai ni kha a ra lio. 39A ramri cu nitlaklei ah Gareb tlang tiang a va lan lai i Goah ah khan a run i kual lai. 40Miruak le hmunhnawm an hlonhnak horkuang kha a ning piin, cun Kidron tiva cung i a ummi lo vialte, nichuahlei, ah Rang Kutka timi tiang kha Bawipa ca i a thiangmi thil an si lai. Khuapi cu ṭheh i hrawh a si ti lai lo,” tiah Bawipa nih a ti.
Currently Selected:
JEREMIAH 31: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
