ගීතාවලිය 86:1-17

සවන් දුන මැනවි අහෝ ස්වාමින්වහන්ස, අසා, ප්‍රතිචාර දැක්වුව මැනව. මන්ද මා දුප්පත් ය, දිළිඳු ය. මා දිවි රැක දුන මැනව, මන්ද මම ඔබවහන්සේට කැප වූවෙක්මි; ඔබ තුළ විශ්වාසය තබන ඔබගේ සේවකයා ගැලෙවුව මැනව. ඔබ මගේ දෙවියන්වහන්සේ ය; දයා වුව මැනව මට අහෝ ස්වාමිනි, දවස පුරා මම ඔබට හඬ ගසමි. ඔබගේ සේවකයාට ප්‍රීතිය ගෙන දුන මැනව, මන්ද මම ඔබ වෙත මගේ ජීවය ඔසවන්නෙමි, අහෝ ස්වාමිනි. ඔබ කමා වන සේක; ඔබ යහපත් ය, අහෝ ස්වාමිනි, ඔබට අයදින සියල්ලන්ට ඔබගේ නොමියෙන ප්‍රේමය අපරිමිත ය. ඇසුව මැනවි මගේ යැදුම, අහෝ ස්වාමින්වහන්ස; දයාව අයදින මගේ හැඬුමට සවන් දුන මැනව. මගේ විපත්ති දවසේ මම ඔබට හඬ ගසන්නෙමි; මන්ද ඔබ මට පිහිට වන සේක. දෙවිවරුන් අතරේ ඔබට සමාන අන් කෙනෙක් නැත, අහෝ ස්වාමිනි, ඔබ කර ඇති දෑ හා සසැඳිය හැකි අන් ක්‍රියා ද නැත්තේම ය. ඔබ විසින් සෑදූ සියලු ජාතීන් ඔබ අබියසට අවුත්, ඔබට නමස්කාර කරනු ඇත අහෝ ස්වාමිනි, ඔබගේ නාමයට ඔවුන් මහිමය ගෙනෙනු ඇත. මන්ද ඔබවහන්සේ උත්තම ය; ආශ්චර්යවත් දෑ කරන සේක. ඔබවහන්සේ පමණක් දෙවියන්වහන්සේ ය. ඉගැන්නුව මැනව මට ඔබගේ මාර්ග, අහෝ ස්වාමින්වහන්ස, එවිට මම ඔබගේ සත්‍යයෙහි ගමන් කරන්නෙමි. ඔබගේ නාමයට මා භය පක්ෂපාත වන පිණිස, නො බෙදුනු හදවතක් මට දුන මැනවි. අහෝ ස්වාමිනි, මගේ දෙවියන්වහන්ස, මගේ මුළු හදවතින් ම මම ඔබට ප්‍රශංසා කරන්නෙමි; සදහට ම ඔබගේ නාමය ගෞරවයට පමුණු වන්නෙමි. මා වෙතැති ඔබගේ නොමියෙන ප්‍රේමය ඉමහත් ය; ෂෙයෝල නරාවළ පත්ලෙන් ඔබ මා මිදූ සේක. අහෝ දෙවියන්වහන්ස, අහංකාර මිනිස්සු මට පහර දෙති; ඔබ ගැන කිසි තැකීමක් නැති නිර්දය පිරිසක් මගේ ජීවිතය නසන්නට සොයති. එහෙත් ඔබවහන්සේ, අහෝ ස්වාමිනි, අනුකම්පා සහගත, දයාන්විත දෙවියන්වහන්සේ ය; ඔබ වහා නො කිපෙන සුළු වූ, නොමියෙන ප්‍රේමයෙන් හා විශ්වසනීයත්වයෙන් අපරිමිත වූ තැනැන්වහන්සේ ය. මා දෙස බැලුව මැනව, මට දයා වුව මැනව; ඔබගේ සේවකයා වූ මට– ඔබගේ විශ්වාසී සේවිකාවගේ පුත්‍රයා වූ මට ශක්තිය ගෙන දුන මැනවි. මගේ සතුරන් ඒ දැක ලජ්ජාවට පත් වන පිණිස, ඔබගේ යහගුණයේ ලකුණක් මට පෙන්වුව මැනව; මන්ද අහෝ ස්වාමින්වහන්ස, ඔබ මට පිහිට වී, සහනය ගෙන දුන් සේක.