John 13
13
Jesus in Ama Nungzuite Peang Silsak
1Tu in Paisan Poai vawt tu ni khat samh lai hi. Jesus in leitung nusia in, Pa kung a pai natu hun hong thet sia he hi. ama ii neisa leitung mihingte it tawntung a, a tawp dongin it hi.
2Jesus le a nungzuite nitak an nekhawm uh hi. Simon Iscariot ii tapa Judas thinsung ah Jesus leeheak tu ngaisutna Doaimangpa in khum zo hi. 3Jesus in Pa ii vaangletna a cingin ama tungah a piak sia he hi; ama in Pathian kung pan hong pai a, Pathian kung a zot kik tu hunlam he hi. 4Tua ahikom sabuai pan dingin a puan tungsilh a suut zawkciang a kawng ah dial khat vet hi. 5Tua zawkciang kuang khat sungah tui a khomkhat sung a, nungzuite peang silsak tu le, a kawng a dial sia taw nawlsak tu in kipan hi. 6Simon Peter kung hong thet ciangin, “Kei peang hong silsak tu ni ziam? Topa awng,” ci hi.
7Jesus in “Tu a ka sep sia tu laitakin tel ngawl na hi uh hang nidang ciangin na tel tu uh hi,” ci in zo hi.
8Peter in “Bang hun po ahizong kei peang hong silsak ngeingawl tu ni hi!” ci hi.
“Na peang ka sil buale ka nungzui na hi nawn buatu hi,” ci in Jesus in zo kik hi.
9Simon Peter in, “Tua ahile Topa awng, ka peang bek hong silsak heak in! Ka khut le ka lu zongh hong silsak ta'n!” ci hi.
10Jesus in, “A kibual sa pawpo sia thiang siat a, a peang simngawl sil a kul bua hi. No teng sungah khat simngawl thiangtho nu hi,” ci hi. 11(Jesus in ama a leeheak tu pa sia he zo hi; tua hu in, “Khat simngawl thiangtho nu hi” ci hi.)
12Jesus in a peang uh a silsak zawkciang a puantungsilh silh kikin a tona ngei sabuai ah to kik hi, “Tu a, no tung a kong vawt teng na tel uh ziam?” ci in dongh hi.#Lk 22:27 13“Sya awng, Topa awng, hong ci nu hi, tuabang nong ci uh sia maan hi, banghang ziam cile keima tuasia ka hi hi. 14Kei na Topa le na Syapa in na peang uh kong silsak zawk bek ahi hi. Noma khat le khat tuabangin, na kisilsak vun. 15No ii ettee tu ngamtatna khat kong koisak hi, tua hi a kei ii no tungah kong hi bang tatakin, no zongh khat le khat tungah na ngamta tavun. 16A tatakin kong ci hi: sila khat sia a topa sangin lianzaw ngawl a, kamtaipa khat sia a sawlpa sangin lianzaw ngawl hi.#Mt 10:24; Lk 6:40; Jn 15:20 17Tu in thumaan he zo na hi uh kom, seam paih le uhte bangza in a lungdamte hi tu nu ziam!
18“Na vekpi atu ka sonna hi ngawl hi; ka teal sate keima in ka he hi. Ahihang laithiangtho sungah, ‘Kei taw ankuang uumkhawmpa in kei hong langpan hi,’ a ci sia a tun kul tu hi.#Ps 41:9 19‘Keima sia Keima ka hi’ hunlam hi thu a pian ciang nong up natu in hi thu a pian ma, tu in kong son hi. 20A tatakin kong ci hi: ka sawlpa a saang pawpo in, kei zongh hong saang ahi hi; kei hong saang pawpo in kei hong sawlpa a saang ahi hi,” ci hi.#Mt 10:40; Mk 9:37; Lk 9:48; 10:16
Jesus in A kileeheak natu Sonkhol
(Mt 26:20-25; Mk 14:17-21; Lk 22:21-23)
21Jesus in hi teng a ci zawkciang ama a thinngim mama a, a langh taakin hi bang pau hi, “A maan tak kong ci hi: no sung pan khat in kei hong leeheak tu hi,” ci hi.
22A nungzuite khat le khat ki en a, ama ii ci nop sia akua ziam ci in lungmang mama uh hi. 23Jesus ii it nungzui khat sia Jesus taw a kicial in to hi. 24Simon Peter in tua pa neak phei a, “Akua ci nuam ziam dongh in,” ci hi.
25Tua ahikom tua nungzuipa in Jesus kung neak zaw in, “Akua ziam? Topa awng,” ci in dongh hi.
26Jesus in, “Anluum bekkhat sia meetui sungah papin ka piak tu sia pa hi,” ci in zo hi. Tua ahikom ama in anluum bekkhat la a, meetui sungah a pap zawkciang, Simon Iscariot ii tapa Judas pia hi. 27Judas in anluum a saan po ciangin, ama sungah Satan tum hi. Jesus in ama munah, “Na vawt tu po vawt memeang ta'n!” ci hi. 28Jesus in banghangin hi bangin ci ziam ci sia sabuai ah a to teng in a tel bua uh hi. 29Judas sia sum ip keampa ahikom poai sungah amate kisap tu vanhte, tua ahibuale a zawngte bang khat po a piak tu vanhte lei a sawl ziam, hi tu hi ci in nungzuite pawlkhat in ngaisun uh hi.
30Judas in anluum saang a, thakhatin pusuak paih hi. Tua hun sia zan hun ahi hi.
Thupiak Thak
31Judas ii paisan zawkciang Jesus in, “Tu in Mihing Tapa ii minthanna kilangh hi; tu in Pathian minthanna ama tungtawnin kilangh hi. 32Tuaciang ama tungtawnin Pathian minthanna kilangh ahile, Pathian in Mihing Tapa minthanna ama mama sungah kilanghsak tu a, thakhat thu in tuabangin vawt tu hi. 33Ka tate awng, kei sia no taw ngei hong omkhawm nawn ngawl tu khi hi. Note in kei nong zong tu uh hi; ahihang, Jew thunei mihingte munah ka ci sa bangin, ‘Kei pai natu munah note nong pai thei buatu hi,’ ci sia tu in kong son hi.#Jn 7:34 34Tuaciang, tu in thupiak thak khat kong pia hi: Khat le khat na ki it vun. Note kong it bangma in, khat le khat na ki it hamtang vun. #Jn 15:12,17; 1 Jn 3:23; 2 Jn 5 35Khat le khat na ki it uh le mihing theampo in, no sia ka nungzuite na hina uh hong he tu hi,” ci hi.
Peter ii Nial tu Jesus in Sonkhol
(Mt 26:31-35; Mk 14:27-31; Lk 22:31-34)
36Simon Peter in, “Koisung pai tu ni ziam Topa?” ci in dongh hi.
“Tu in kei pai natu ah nong zui thei buatu hi, ahihang nidang ciangin hong zui tu ni hi,” ci in Jesus in zo hi.
37Peter in, “Topa awng, banghangin, tu laitak nang hong zui thei ngawl tu khi ziam? Nang atu thi tu in ka kinging hi!” ci hi.
38Jesus in, “Kei atu thi tu in kinging tatak ni ziam? A maan tak kong ci hi: ak khuan ma in ka he bua hi ci in thumvei hong nial tu ni hi,” ci in zo hi.
Currently Selected:
John 13: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016