Haggai 1
1
Topa in Biakinnpi Sakkik natu Thupia
1Darius ii Persia kumpilian a sep zawk a kum niina kum, a tha luk tha, ni masabel ni in Topa in kamsaangpa Haggai tungtawnin thu son hi. Shealtiel tapa Judah ngamukmangpa Zerubbabel atu le Jehozadak ii tapa Thiampi Lianbel Joshua atu in thupuak ahi hi. #Ezra 4:24—5:2; 6:14
2Vaanglianbel Topa in Haggai tungah a cina pan, “Hi mite in tu hun sia Biakinnpi sakkik natu hunpha hi ngawl hi, ci uh hi.” 3Tua zawkciang Topa in kamsaangpa Haggai tungtawnin hi thu teng mite tungah pia hi: 4“Ka mite awng, ka Biakinnpi a siacip sa in a om laitakin pha tak a kisa innte sungah banghang teang tu nu ziam? 5No tungah bang thupiang cisia mu ngawl nu ziam? 6Thaicii tam mama na tu uh a, ahizong an tawm bek na la uh hi. Anneak tawm tu na nei uh a, ahizong na khamkhop tu na nei bua uh hi. Sapittui neak tu na nei uh a, ahizong na kham tham tu na nei bua uh hi. Puansilh na nei uh a, ahizong a lum tham tu na nei bua uh hi. Tuaciang naseam khat in a nuntak khom natu thalaw zo ngawl hi. 7Hisia a pian theina thu he ngawl nu ziam? 8Tu in mual tungah kaato tavun a, inn thingte la in Biakinnpi sa kik vun; tuasia ciang kei ka lungkim tu a, a kilawm bangin kei hong kibia tu hi.
9“Anlaak tu tam mama na lamen uh a, ahizong tawm bek piang hi. Tuaciang an laakte na ciapui uh ciang kong muutkeaksak hi. Banghang tuabang vawt khi ziam? Banghang ziam cile note mi sim in ama inn vawtin a komlaak laitakin ka Biakinnpi a siacip sa in om hi. 10Tua hu in nguazu ngawl a, bangma po thei ngawl hi. 11Keima in leitang tung — a mualte, anciinna lote, sapithuante, olive ciinnate tung — lei pan a piang an namcin tung, mihingte le ngannote tung, na ciin sa theampo tungah nguatui kong hangsak hi,” ci hi.
A Mite in Topa Thupiakna Zui
12Tua zawkciang Zerubbabel, Joshua le Babylon ngam saltanna pan hong cia kik theampo in Topa a Pathian sawl bangin vawt uh hi. Amate lau ahiciang, Topa ii kamtaipa, kamsaang Haggai thu ni uh hi. 13Tuasia ciang Haggai in hi Topa thupuak sia mipite tungah son hi: “Note taw kei kong omkhawm tu hi, ci in kong kamciam hi,” ci hi. 14Topa in Biakinnpi sak tu vai mi theampo thawn hi: Judah ngamuk mangpa Zerubbabel; Thiampi Lianbel Joshua, le saltanna pan hong ciakik mite theampo ahi hi. Amate ii Vaanglianbel Topa, a Pathian Biakinnpi ah a nasep kipat ni sia, 15Darius kumpilianpa maan zawk a kum nii kum, tha luk tha, 24 ni ahi hi.
Currently Selected:
Haggai 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016