Matthew 20
20
Sapit huan sungah Naseamte thu
1“Vantung ngam sia hi bang hi. Khatvei lai in pasal khat in a sapithuan sungah diang tu in, mihing pawlkhat cial tu in, zingtuungin kuan hi. 2A kipia ngeiza ngunn dangka pheak khat tek piak tu in, thukim in a cial te sia sapithuan sungah kuansak hi. 3Zingsang nai kua sa in sumzuakna a pai ciang, mihing pawlkhat nasep nei ngawlin om mu hi. 4Tua ahikom amate munah, ‘No zongh sapithuan sungah diang tavun, a kilawm bangin, nitha hong pia tu khi hi,’ ci hi. 5Tua ahikom amate kuan uh hi. Tuaciang sun nai sawm le nai nii sa ciang le nitak nai thum sa ciangin tuabang ma in mihing cial hi. 6Nai nga saat dektak ciangin, sumzuakna munah a pai le, midang pawlkhat a ding thawthong mu leleau hi. ‘Banghangin naseam ngawlin ni khat bup hi sungah na hun bosak thawthong nu ziam?’ ci in dongh hi. 7‘Kuama in hong cial ngawl hi,’ ci uh hi. ‘Tua ahile no zongh sapithuan sungah diang tavun,’ ci in sawl hi.
8“Nitak ciangin huan neipa in a tha lampuipa munah, ‘Naseamte va sam tavun a, a nitha uh pia ta'n, a khakbel a kicialte pan panin pia ta'n a, a kicial masate pia khak tan’ ci in sawl hi.#Thiam 19:13; Thkna 24:15 9Nai nga ciangin nasep kipante sia, ngun dangkatang khat tek pia hi. 10Tua ahikom a kicial phitbelte in, thaman saang tu hong pai uh ciang dangka tamzaw nga tu in ki um uh hi; ahizong amate zongh ngunn dangkatang khat tek ma kipia hi. 11Amate in a sum saan uh ciang, thacialpa phunsan hi. 12‘A khakbel a kicialte in, nai khat bek seam hi, ko sia nitangtumin sun nisa sungah diang khu hi, ahitazong ko nong piak za ma amate pia ni hi!’ ci hi.
13“Tuasia ciang, ‘Lawmte awng, hong ngai tavun, hong theam ngawl khi hi. Ngaisun le uhte ni khat bup thaman tu ngunn dangkatang khat taw lungkim a kong cialte na hi uh hi. 14Tu in na ni thaman uh la in cia tavun. A khakbel a kicial hi sia pa zongh, no kong piak za ma pia nuam khi hi. 15Keima sum tungtaang ah ka uuk bang po in, zeak thei natu thunei hi kana ngawl khi ziam? Ngo takin ka piakte banghangin eang nu ziam?’ ci in zo hi.”
16Jesus in a thukhupna ah, “Tua ahiciang a khakte masa tu a, a masate khak tu hi,” ci hi.#Mt 19:30; Mk 10:31; Lk 13:30
Jesus in a Thi natu a Thum veina a Sonna
(Mark 10:32-34; Luke 18:31-34)
17Jesus in Jerusalem khua sang zuanin, a pai ciang, lampai kawmin a nungzuite munah thu son tuam hi. 18“Ngai vun, Jerusalem khua ah ih paito tu a, tua munah Mihing Tapa sia, thiampi liante le Thukhamhil syate tungah ki aap tu hi. Amate in, ama tungah thalup natu in thukhen tu uh hi. 19Tua zawkciang Gentile te tungah aap tu a, tuate in selno zazaan in, vel tu a, thatlum tu hi; ahihang ni thum zawkciangin, ama sia nuntakna sungah tho kik tu hi,” ci hi.
Nu khat ii Hu ngetna
(Mark 10:35 -45)
20Tuaciang Zebedee zi sia a tate nii taw Jesus kungah pai a, a mai ah kun in huna khat ngen hi.
21“Bang nuam ni ziam?” ci in Jesus in dongh hi.
“Kumpi na sua ciangin, hi ka tate nii sia khat na ziatsang ah khat na veisang ah, na tosak natu in, kamciam hong pia ta'n,” ci in nupi nu in zo kik hi.
22Tapate nii munah Jesus in, “Na nget uh sia bang ziam ci in tel ngawl nu hi. Hi thuakna hai ka dawn tu sia dawn zo natu nu ziam,” ci hi. “Dawn zo tu khu hi,” ci uh hi.
23“Ka hai sia dawn takpi tu nu hi, ahihang ka ziatsang le ka veisang a to tute sia kei teal thei hi ngawl hi. Hi munte sia ka Pa ii see sa mite atu ahi hi,” ci hi.
24Nungzui dang sawm teng in hi thu a zaak ciangin, tua unaute nii tungah amate thin uuk hi. 25Tua ahikom Jesus in amate khawmtua a, “Leitung mihing uliante in a khutnuai a omte tungah uk theina thu nei a, lampuite in thuneina theampo nei hi, ci in na he uh hi.#Lk 22:25-26 26Ahizong hi thu sia note zui tu ngeina hi ngawl tu hi. Note sungah khat in a lianbel a suak nuam le ama sia note ii naseam hi tu hi.#Mt 23:11; Mk 9:35; Lk 22:26 27Note sungah lampui a suak nuamte na sila hi tu hi — 28Mihing Tapa in ngual na sawl tu in hong pai ngawl a, naseam tu le a nuntakna pia in, mihing tam mamate tan tu in hong pai hi,” ci hi.
Jesus in Mittaw Nii Damsak
(Mark 10:46; Luke 18:35-43)
29Jesus le a nungzuite in Jericho khua a nusiat ciang, mihonpi khat in zui uh hi. 30Lampi hui ah a to mittaw nii in Jesus hong pai hi ci in a zaak ciangin, “David Tapa awng, ko hong hesuak ta'n, Topa awng,” ci in au uh hi.
31Mipite in amate teih in, a ngamlum ngawl natu in a sawl uh hang, amate a nging seseam in au a, “David Tapa awng, ko hong hesuak ta'n, Topa,” ci uh hi.
32Jesus in amate nii sam a, “Bang hong vawtsak leng na uuk uh ziam,” ci in dongh hi.
33“Topa awng, khua nong musak tu uuk ung,” ci uh hi.
34Jesus in amate sia khuangai huai sa in, a mitte thamsak a; thakhatin, amate khuamu thei a, amate in ama zui uh hi.
Currently Selected:
Matthew 20: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016