Matthew 17
17
Jesus Meal Kikhealna
(Mark 9:2-13; Luke 9:28-36)
1Ni luk zawkciang Jesus in Peter, James le John te unau samin mual tungah paipui to a tua munah amate teng nguak om uh hi.#2 Pe 1:17-18 2Amate mu tangin meal kikhealna sia Jesus tungah hong piang hi: a maitang sia ni bangin taang a, a puansilhte sia tee velvol hi. 3Tua zawkciang Jesus sia Moses le Elijah taw thu son khawmin a om uh nungzui thumte in mu uh hi. 4Tua ahikom Peter in, “Topa hi munah ih om sia bangza in nuam ziam? Na uuk le nang atu buk khat, Moses atu buk khat, le Elijah atu buk khat, puanbuk thum kong saksak tu uh hi,” Jesus munah ci hi.
5Tuabangin a pau laitakin, a taang meeikaai khat in amate teng tuam a tuaciangin meeikaai sung panin awnging khat in, “Hi sia in ka it ka Tapa hi a, ama tungah ka lungkim hi; a thu na ngai tavun,” ci hi.#Pian 22:2; Thkna 18:15; Ps 2:7; Is 42:1; Mt 3:17; 12:18; Mk 1:11; Lk 3:22
6Nungzuite in tua aw a zaak uh ciangin, amate sia lau mama ahikom lei ah bokcip uh hi. 7Amate kungah Jesus hong pai in, amate tham in, “Tho vun, lau heak vun!” ci hi. 8Tua ahikom amate in a et uh ciang Jesus simngawl kuama dang a mu bua uh hi.
9Mual tung pan hong tuaksuk kawmin Jesus in, “Mihing Tapa sia thina pan a kithawsak kik mateng hi mukholna sia kuama tungah son heak vun,” ci in thupia hi.
10Tuaciang nungzuite in Jesus tungah, “Thukham hil syate in Elijah hong pai masa tu hi banghangin ci ziam?” ci in dongh uh hi.#Mal 4:5
11Jesus in, “Elijah sia hong pai masa takpi tu hi, tuaciang in ama in na theampo kithoai sa in koi tu hi,” ci hi. 12“A tatakin ka ci ciang, Elijah hong pai zo a, ahihang mihingte in ama tel ngawl ahikom, ama tungah a uuk uh bang tek po in, ngamta uh hi. Tuasia bangma in, amate in Mihing Tapa zongh vawtsia tu uh hi,” ci hi.#Mt 11:14
13Tuasia ciangin a nungzuite in ama sia Tuiphumpa John huvau son hi ta a, ci in tel uh hi.
Jesus in Doaivei Patang khat Damsak
(Mark 9:14-29; Luke 9:37-43)
14Mihonpite kungah amate hong heaksuk kik zawkciangin pasal khat Jesus kungah pai a, a mai ah khupdin in, 15“Topa, ka tapa hong hesuaksak ta'n! Ama butthi thei a, kaikin in, mei sungah ahibuale tui sungah puksuk thei hi. 16Na nungzuite kungah ka paipui uh hangin, amate in damsak thei ngawl uh hi,” ci hi.
17“Bangza ta in upna nei ngawlin a khial mihingte hi nu ziam! No taw bang tan vei hong omkhawm tu khi ziam? A bang tanvei hong dual zo tu khi ziam? Patang sia keima kungah hong paipui tavun!” ci hi. 18Jesus in doai tungah thupia a, tuasia ciangin patang sung pan doai pusuak a, tua hun lian ma in a patang sia dam hi.
19Tua zawkciang amate nguakin a om laitak, nungzuite Jesus kungah hong pai a, “Banghangin doai hi sia notkeak thei ngawl khu ziam?” ci in dongh uh hi.
20Jesus in, “Banghang ziam cile noma in upna kicing nei ngawl nu hi. A tatakin kong ci ciang, ankamhtang cia upna nei hi le uhte hi mual munah, ‘Hi sung panin zialai ah kikhiin in,’ ci in sawl le uhte kikhiin tu hi. Na khat pawpo na vawt thei tu uh hi.#Mt 21:21; Mk 11:23; 1 Cor 13:2 21Thungetna le an tanna in, hite pawl notkeak zo bek a, nadang in notkeak zo ngawl hi,” ci hi. #17:21 TEV sung om ngawl hikale version dang pawlkhat sung om ahikom kibelap hi. (Enkak tu Mk 9:29).
Jesus in A thi natu Son kik
(Mark 9:30-32; Luke 9:43-45)
22Nungzuite theampo Galilee ah hong kikhop uh ciangin, Jesus in amate tungah, “Mihing Tapa sia mihingte khut sungah thalup tu in ki aap dektak zo hi. 23Tua mihingte in ama sia thatlum tu hi. Ahihang ni thum zawkciangin ama nuntakna sungah kiphongto kik tu hi,” ci hi.
Nungzuite sia khuangai mama uh hi.
Biakinn atu Shia Piakna
24Capernaum khua ah Jesus le a nungzuite hong thet uh ciangin, Biakinn atu shiadongte hong pai a, Peter munah, “Na syapa in Biakinn atu shia a pia ziam?” ci in dongh hi.#Pu 30:13; 38:26
25“Pia hi,” ci in Peter in zo hi.
Peter inn sungah a tum zawkciang, Jesus pau masa a “Simon awng, nang ngaisutna bangbang ahi ziam? Hi leitung kumpite tungah akua bangte in sum zuakna tung pan shia pia ziam? Ngamsung mite in pia ziam maw ngamdangmite in pia ziam?” ci hi.
26“Ngamdangmite in pia hi,” Peter in ci hi.
“Pha hi, tua ahile ngamsung mite in piak kul ngawl hi. 27Ahihang mihingte thin uuksak nuam bua hing. Tua ahikom tuili ah va pai ta'n a, ngasa tangthaak ta'n. Ngasa a awk phitbel sia manin, a kam sung en lete, dangkatang khat om tu hi. Biakinn shia piak tu in kei atu le nang atu kicing tu hi. Va la ta'n a, ih shiate amate va pia ta'n,” ci hi.
Currently Selected:
Matthew 17: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016