1
Jesus Christ ii Taangpupite
(Luke 3:23-38)
1Abraham ii suan, David ii tu le ta ahi, Jesus Christ ii taangpupite ii min tepteena lai sia hi bang hi a,
Abraham pan David kumpipa dong, a taangpupite ii minte a nuai a bang ahi hi. 2Abraham ta Isaac, Isaac ta Jacob, Jacob ta Judah le a suapuite ahi hi. 3Judah in a zi Tamar taw Perez le Zerah hing a, Perez ta Hezron, Hezron ta Ram, 4Ram ta Amminadab, Amminadab ta Nahshon, Nahshon ta Salmon, 5Salmon ta Boaz hi. Boaz ii nu sia Rahab ahi hi. Boaz in a zi Ruth taw Obed hing a Obed ta Jesse hi.
6Jesse ta sia David Kumpipa ahi hi. David pan Babylon khua ah Israel mite salin a kimat hun dong, a nuai a bangin taangpupite khang kiciamtee hi. David in Uriah zi taw Solomon hing a, 7Solomon ta Rehoboam, Rehoboam ta Abijah, Abijah ta Asa, 8Asa ta Jehoshaphat, Jehoshaphat ta Jehoram, Jehoram ta Uzziah 9Uzziah ta Jotham, Jotham ta Ahaz, Ahaz ta Hezekiah, 10Hezekiah ta Manasseh, Manasseh ta Amon, 11Amon ta Josiah, Josiah ta Jehoiachin le a suapuite ahi uh hi.#2Kum 24.14–15; 2Khang 36.10; Jer 27.20 12Babylon ah salin a kiciapui pan kipan Jesus khang dong a nuai a bangin taangpupite khang kiciamtee hi. Jehoiachin ta Shealtiel, Shealtiel ta Zerubbabel, 13Zerubbabel ta Abiud, Abiud ta Eliakim, Eliakim ta Azor, 14Azor ta Zadok, Zadok ta Achim, Achim ta Eliud, 15Eliud ta Eleazar, Eleazar ta Matthan, Matthan ta Jacob, 16Jacob ta Joseph hi a, Christ kici Jesus Nu Mary pasal ahi hi.
17Tua ahikom Abraham khang panin David khang dong khang sawm le khang li hi a, David khang pan Babylon ah salin a ki paipui uh dong khang sawm le khang li, Babylon te mat hun pan Messiah sua dong khang sawm le khang li ahi hi.
Jesus Christ Suana
(Luke 2:1-7)
18Jesus Christ suana sia hi bang ahi hi. A nu Mary sia Joseph taw teang tu in a kidongh sa ahi hi. Ahihang a kiteen uh ma in, ama Thaa Thiangtho taw naungil om hi.#Lk 1.27 19Joseph sia thumaan a ngamta tawntung pa khat hi a, ahizong ngual mai ah Mary maimawlsak nuam ngawl ahikom amate nii bek vaihawm in kikhen sawm hi. 20Tuabangin a ngaisut laitak in, Vantung lalang khat a mang sungah hong kilak a “David ii suan Joseph awng, Mary sia na zi tu in tenpui kiita heak in. Banghangziam cile ama Thaa Thiangtho in ngaisak hi. 21Ama in tapa khat hong hing tu a, a min Jesus ci in na phuak tu hi — banghangziam cile ama in a mite mawna pan a hun tu hi,” ci hi.#Lk 1.31
22“Tu in hite theampo a pianna sia Topa kamsangpa sonkhol teng a khuangkhim natu ahi hi. 23Ngaknu thiangtho khat naungil om tu a, tapa khat hing tu a, a min Immanuel kiphuak tu hi.” (Tua in “Eite taw Pathian om khawm hi”, a ci nopna hi.) #Is 7.14 (LXX)
24Joseph khanglo in vantung lalang sawl bangma in Mary tenpui hi. 25Ahihang taciil nau a sua dong a zi ompui ngawl hi. Tuaciang Joseph in nau min Jesus ci in phuak hi.#Lk 2.21