Job 39
39
1Sathakte bang hunin suak cisia na he ziam?
Sangaite a no sua tu ngakin na en ngei ziam?
2Tuate in a no bang tanvei paai ci sia na he ziam?
Tuate sua hun tu na he ziam?
3A no suak tu in lei ah a baw suk tu hun le
a note leitung ngam sungah a tatpui tu hun na he ziam?
4A note duisung ah khangin a thahat uh hi;
amate paikhia in heak kik nawn ngawl uh hi.
5Ngam laate akua in
suatakna pia ziam?
Akua in thazau in,
vakzausak ziam?
6A inn tu in senneal ngam
ka pia a
tuate ci al zaangtam ah
ka teangsak hi.
7Tuate awsana khuapite taw
a kikhualana ah om uh a,
kuama in zualin naseamsak
thei ngawl hi.
8Mualte sia tuate ii kivaak natu a tatna mun hi a,
tua munah a neak tu in lohing pawpo zong uh hi.
9Ngam khuital khat in nang na hong sepsak tu ziam?
Na nganbuk sungah zan a ngiak nuam tu ziam?
10Tuate khat khaukhii in lo na thosak thei tu ziam?
Ahibuale na lo sungah lei kalthapna thik ha na kaisak thei tu ziam?
11A thahatna lian, na suang thei tu ziam,
nang ii nasep lian a seam tu in na muangmaw ngam tu ziam?
12Na anlaakte hong puaksak tu le na taang cilna phual panin
antangte hong kaikhopsak tu in na muangmaw ziam?
13Kalaoh vacim khat ii thaphil sia bangza in manlang ziam!
Ahihang kalaoh vacim sia hilniang vacimlian khat bangin leang thei ngawl hi.
14Kalaoh vacim puite in a tuuite
lei sa ii a lumsak tu in lei ah nusia hi.
15A tuuite sia peang khat po in siiktham thei
ahibuale ngamsa khat po in tamhsak thei tu cisia phawk ngawl hi.
16Tua a tuuite ama tuui hi ngawl bang phetin ngamta in,
a thasaan nate a lui thawthong a sua tu sia zongh thinbot ngawl hi.
17A mawmaw sak,
ciimna a pia ngawl sia keima khi hi.
18Ahihang ama a tai ciang
siphu khat le a tung to khat pawpo sia nuisan bek hi.
19Job awng, siphute thahatsak in,
a ngawng mul kaai niingniangte a pia sia nangma na hi ziam?
20Khaumaw bangin amate na kipeaksak ziam?
tuaciang a naak thinna taw mihingte na lausak ziam?
21Tuate in ngamkuam sungah lawp takin lei khuat hi;
a tha nei za taw ngal kisimna phual del uh hi.
22Tuate in launa a cisia he ngawl uh hi,
tuaciang namsau in heak kiksak thei ngawl hi.
23A tung a tote ii ngalhiam kente,
nging lialua in nisa sungah tee vazial hi.
24Siphute patauna taw a ci liingin mai ah tai uh hi;
lemle kitum ciangin ding thong thei ngawl hi.
25Lemle kitum simin a naak uh thing hi;
ngal kisimna mun nai a thet ma in ngal ngimnam za thei a,
tuaciang tuate in ngalkapbute ii au in a thupiakte za uh hi.
26Muthi khat in thangsang zuan tu in a tha a phalh ciang,
a len thei natu sia nang tung pan hong sin ziam?
27Muvanlai khat in mualsaang dawnte ah bu a tom nop ciang
nangma thupiak tu hong ngak ziam?
28Tuasia in a saangbel suangpite tungah a bu vawt a,
tuaciang suanghiamte a kulh in mang hi.
29Tua mun panin ama in a nai, a khuala ah
bang khat po that in a neak tu a om ziam ci in encik hi.
30Sathite kiimkot ah muvanlaite kikhawm a,
muvanlai note in a chi dawn uh hi. #Mt 24:28; Lk 17:37
Currently Selected:
Job 39: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
