Job 38
38
Topa in Job ii kam zo kik
1Tua zawkciang vuipi suangval sung pan Topa in Job paupui hi.
Topa
2Na heak ngawlna le khiakna om ngawl na kammalte taw
kei ciimna nong dok sia nang akua ni ziam?
3Tu in ding tang in a,
kong thudokte hong zo ta'n.
4Simlei ka vawt lai in nang na om ziam?
He mama na kisa le tua thu kei hong son ta'n.
5Leitung letna bangcia pha tu cisia akua in khensat ziam?
Akua in a tungah pikhau kai in tee ziam?
Hite theampo hong zo thei tu ni ziam?
6Leitung anang khuamte, bang in len ziam?
Simlei ii a king suangpi sia akua in khia ziam?
7Tua ni vaktuung in aksite lasa khawmin,
vantung mite lungdam in au uh hi.
8Lei sung pan tuipi
a puathap lai in
tua tuipi khaktan tu in akua in kongpite khak ziam? #Jer 5:22
9meeikaai taw tuipi a tuam le
tuasia khuazing taw a tuam pa sia keima khi hi.
10Tuipi atu in ngamngi khat ka vawt a, a kongpi kikalhte nungah ka keam hi.
11Keima in tuasia ii munah, “Hi ciang bek pai in, pai leet heak in!
Hi sungah a thahat, na tuihualte a tawlngak kul tu hi” ka ci hi.
12Job awng, na khan sung theampo ah
ni khat beak khua a vak tu in thu na pia ngei ziam?
13Leitang a zamh tu le
a pummat tu,
mi ngilote a bukna pan
a thingkeak tu in khuavak tungah thu na pia ziam?
14Puan kithepte le
tungman tungah tazeik khet sia a kilangh bangin
sun nitaang in mualte le
ngamkuamte kilanghsak hi.
15Sun khuavak sia mi ngilote atu taang leih a,
amate ii ngongtat natu te
khak hi.
16Tuipi thuknate sung cikte ah na om ngei ziam?
Tuipi liante ii tawdap lei ah na vak ngei ziam?
17Khuazing na mithi khua a cing kongpite
hong lak khat po a om ngei ziam?
18Simlei bangza in lian cisia ngaisutna khat pawpo na nei ziam?
na he le hong zo ta'n.
19Khuavak koisung pan hong pai a,
khuazing ii a kipatna naak sia bang ziam ci in na he ziam?
20Tuate tungah bang tan khuala pai tu cisia na lak thei ziam?
ahibuale tuate na heak kiksak thei tu ziam?
21Tuabang hi thei tu in kong um takpi hi, nang na khan haam mama zo a,
leitung a kivawt lai in om zo na hi hang hi!
22Vuuk le ngial ka kholna mun ah na haw ngei ziam?
23Tuate ngim nga hun le
ngal kido hunte atu in ka kinginna hi.
24Ni a suatona mun ah,
ahibuale nisuana vui hong vakna munah na om ngei ziam?
25A kua in nguatui hong luan natu in luam to a,
akua in vanto keakkiat natu in lam sialsak ziam?
26A kua in kuama ten ngawlna munah nguazusak ziam?
27A kua in lopa meen natu in leiko,
lei dangtaakte tuibuak ziam?
28Nguatui ahibuale daaitui in pa a nei ziam?
29Vuuk le thuamluak ii nu akua ziam?
30Tui sia suang a suaksak le tuipi maitang
a khalsak sia akua ziam?
31Pleiades aksite na sawm khawm thei ziam?
ahibuale Orion aksi a sawm khawm khaute na suut thei tu ziam? #Job 9:9; Amo 5:8
32Aksite hun khat zawk hun khat lam na pui thei ziam?
Tuaciang Bear aksi lian le Bear aksi no tungah lam na lak thei ziam?
33Vante a uk upadi te na he ziam,
tuaciang tuate leitung ah na zanghsak thei tu ziam?
34Meeikaaite tungah au in
nang tui hong tuamsak nguatui a suak tu in thu na pia thei tu ziam?
35Tuaciang khualeng a taang vazak tu in thupia lete
tuasia nang kungah hong pai in, “Nong sawl babang hong sepsak tong” hong ci tu ziam?
36Nile ngun bang hun ciang pawm tu ci sia akua in vakaangte hil ziam?
ahibuale nguazuk tu hunlam akua in aklui hil ziam?
37-38Leivuite leitangh a suaksak ngua a zuk natu in
meeite simin a lumlet thei
ciimna kicing sia
akua in nei ziam?
39Tawpite a leihawngte sungah a buk ciang
a neak tu an na zonsak ziam,
40tuaciang a ngilkial tawpi note an ngakin
a kuate sungah a lup laitak, a lung na kimsak ziam?
41Va-ak ngilkialte a len kawkoai ciang,
a note andu in kei hong ko in a au ciang
an a vaak sia akua ziam?
Currently Selected:
Job 38: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
