Job 36
36
1-2Na thin sausak in a,
Pathian taangin ka paunate tawmvei hong ngai lai ta'n.
3Ka heakna zai hi;
kei hong bitphuapa Pathian sia thutang a hina
a lak tu in ka heak teng ka zangh tu hi.
4Nang tungah kong sawl khial bua hi;
na mai ah a ciim takpi mi khat na mu hi.
5Pathian bangza in hat ziam! Ama in kuama nomu ngawl hi;
Ama ii a tel ngawl bangma om ngawl hi.
6Ama in mawneite nungtasak tan ngawl a,
mizawngte tungah a khaikimin vawt tawntung hi.
7Ama in thutangte sungsia hi;
kumpite bangin amate in uksak a,
a tawntungin kipatoaisak hi.
8Ahihang mite sia a sep a vawt
hu in
thikkol bul a thuak le,
9Pathian in amate kiphatsakna le
a mawnate a lak ahi hi.
10Siatna pan a kikheal natu,
a kidop natu in a sonkholte amate in ngaisak hi.
11Amate in Pathian thu ni in ama atu na a seam uh le
a khan tawntung thinnuam in nuamsa tu uh hi.
12Tuabang in a ngamta bua uh le, amate sia a tel ngawl ma in thi tu a,
tuaciang lui kaantan in mithi khua zuan tu uh hi.
13Pathian selte sia thin uuk tawntung hi,
daan a kipiak ciang zongin, huna a nga natu in thungen ngawl uh hi.
14Amate khanthi uh hi,
a nuntakna uh maizumna taw bo hi.
15Ahihang Pathian in mihingte ngim thuakna tungtawnin hil a,
thinngimna sia a mit kihon natu in zangh hi.
16Pathian in nang ngimna sung pan hong la khia a,
tuaciang ngammuangin hong lungnuamsak a,
na sabuai tungah anlim nawno hong kilui veuvo hi.
17Ahihang tu in nang,
na kilawm bangin daan hong kipia hi.
18Sumnguk neaknate ii na theamsak ngawl natu
ahibuale haunate ii lam hong pialsak ngawl natu in kidawm in.
19Hu ngen a auna in bangma
a pha hong sua ngawl tu hi;
na thatang theampo in
tu in nang hong hu thei ngawl hi.
20Minamte lalcip natu hun,
tua zan hong thet tu ngakla heak in.
21Siatna sangah na kihei ngawl natu in kidawm in;
tuasia pan na kikep natu in ngim thuakna hong kipuak hi.
22Pathian ii vaangletna sia bangza in lian ci sia ciamtee in;
Ama sia sya theampo sung pan a lianbel hi.
23Kuama in Pathian munah bang seam tu ci in sawl thei ngawl hi,
ahibuale siatna vawt hi ci in kuama in mawsak thei ngawl hi.
24A nasep tungtaang ah ama kipok tawntung hi;
nang zongh ama na pok kul tu hi.
25A kuama po in ama sepsate mu uh hi;
ahihang eite in ih ngal et thei bek hi.
26Ama ii letna a cingin ih he thei bua hi;
ahibuale ama kumte ih sim thei bua hi.
27Lei pan tui la in nguamalte
a suaksak sia Pathian hi.
28Ama in meeikaaite panin
mihing nam theampo atu nguazusak hi.
29Meeikaaite koi bangin kikhiin a,
ahibuale Pathian teenna van lenglet in
bangbangin vanto ziam ci sia kuama in he ngawl hi.
30Ama in van theampo lenglet in khualengsak a,
ahihang tuipi thuknate zing veve hi.
31Hisia in ama ii mite a vaak zia le
an tam mama a nguan zia ahi hi.
32Ama in khualeng sia a khut taw zamh a
tuaciang a tuunna mun santak khasak hi.
33Vanto in vuipi nguapi hong pai tu taangko a,
ngannote in hong pai hi ci in he uh hi.
Currently Selected:
Job 36: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
