John 4
4
Jesus le Samaria Numei
1Jesus in John sangin, nungzui tamzaw nga a, tuiphum hi ci thu Phariseete in za uh hi. 2(A tatakin Jesus in kuama tuiphum ngawl hi; ama ii nungzuite bek in tuiphum uh hi.) 3Tua ahikom Jesus in tuabang a kisonna a zaak ciang, Judea ngam nusia in Galilee ah pai kik hi; 4tua mun a paina lampi sia Samaria ngam a kaantan tu kul hi.
5Samaria ngam Sychar kici khuano khat ah ama theng hi, tua khua sia Jacob ii a tapa Joseph a piak lo sia taw kikhuala ngawl hi.#Pian 33:19; Jos 24:32 6Jacob ii tuikhuk tua munah om a, Jesus sia a khualhawna pan toi in, tua tuikhuk hui ah to hi. Tua hun sia sunkim khawng ahi hi.
7Samaria numei khat tui toai tu in hong pai a, tuasia ciang Jesus in ama munah, “Tui neak tu hong pia ta'n,” ci hi. 8(A nungzuite khua sungah an lei tu in pai uh hi.)
9Tua numei in, “Nang Jew mi hi a, kei Samaria mi khi hi — tua hi a, banghangin tui hong ngen thei ni ziam,” ci in zo hi (Jew te in Samaria te ii zak hai le kuangte zangh khawm ngawl hi.)#Eze 4:1-5; Neh 4:1-2
10Jesus in, “Pathian in bang teng pia a, nang tungah tuineak tu hong ngen sia akua ziam, ci thu tel thong lete nangma in ama munah na ngen tu hi, tuaciang ama in nuntakna tui hong pia tu hi,” ci hi. 11Tua numei in, “Syapa awng tuipheal nei ngawl ni hi, tuaciang tuikhuk sia thuk hi. Tua nuntakna tui, koisung pan nga tu ni ziam? 12Hi tuikhuk hong pia sia in ih taanghpupi Jacob hi; ama le a tapate le a nganno honte, a vekpi in hi tuikhuk panin dawn tek uh hi. Jacob sangin lianzaw kisa na hi bua na ziam,” ci hi.
13Jesus in, “A kuama po hi tui a dawn sia in, a dangko kik tu hi, 14ahihang kei ii ka piak tui a dawn peuma a dangko kik ngei nawn ngawl tu hi. Ka piak tu tui sia ama sung pan ciktui khat hong suak tu hi, tua in nuntakna a pia tui hi tu a, tuaciangin tawntung nuntakna pia tu hi,” ci in zo hi.
15Tua numei in, “Syapa awng, tua tui kei hong pia ta'n! Tua hile ka dangko kik ngei nawn ngawl tu a, tui toai tu in hi sungah ka pai kul nawn ngawl tu hi,” ci hi.
16Jesus in, “Pai in, na pasal sam ta'n, tuaciang hong pai kik ta'n,” ci hi.
17Ama in, “Kei pasal ka nei bua hi,” ci in zo hi.
Jesus in, “Pasal ka nei bua hi na ci sia thumaan hi. 18Pasal nga na teenpui ngei zo a, tu a na teenkhop puipa sia na pasal tatak hi ngawl hi. Thumaan hong son ni hi,” ci in zo kik hi.
19Tua numei in, “Syapa, nang sia kamsaang khat na hi hunlam kong he hi. 20Ka Samaria taanghpupite in, hi mualtung ah Pathian bia hi, ahihang no Jew te in Jerusalem sia noma ii Pathian biakna tu mun hi, ci nu hi,” ci hi.
21Jesus in ama munah, “Hong um ta'n, numei awng, Pa sia hi mual tungah ahizong, Jerusalem ah ahizong mihingte ii biak ngawl tu hun hong tung tu hi. 22No Samaria te in na biak uh akua ziam, ci in he tatak ngawl nu hi; ahihang ko Jew te in, ka biak uh sia ka he uh hi, banghang ziam cile ngupna sia Jew te tung panin hong pai hi. 23Ahihang, Pa sia Pathian ii Thaa vaangletna taw, ahi bang tatakin ama ii dei biakna maan taw mihingte ii biak tu hun hong tung tu a, tu mama in hi sungah hong tutung zo hi. 24Pathian sia Thaa hi a, a Thaa ii vaangletna bekma taw mihingte in ama sia ahi bang tatakin bia thei hi,” ci hi.
25Tua numei in, “Messiah hong pai tu a, ama hong pai ciangin, thu theampo hong son tu hi, ci in ka he hi,” ci hi.
26Jesus in, “Nang taw a kipaupui keima in tuasia pa ka hi hi,” ci hi.
27Tua hun laitakin Jesus nungzuite hong heak kik a, Jesus sia numei khat taw thu sawson in om a mu uh ciang, amate in lamdang sa mama uh hi. Ahihang kuama in, “Nang bang nuam ni ziam,” ci in tua numei mun ahizong, “Banghangin hisia nu taw thuson ni ziam,” ci in ama mun ahizong a dongh bua uh hi.
28Tuasia ciangin tua numei in a tuibeal nusia in, khua sungah heak kik a, tualai mihingte munah, 29“Keima ngamtat ngei theampo hong son sia pa en tu in hong pai tavun. Ama in Messiah ahi thei tu ziam?” ci hi. 30Tua ahikom, amate in a khua uh nusia in, Jesus kungah pai uh hi.
31Tua hun sungin, a nungzuite in Jesus munah, “Syapa awng, bang khat pawpo ne in!” ci uh hi.
32Ahihang ama in, “No ii heak ngawl anneak tu ka nei hi,” ci in zo hi.
33Tua ahikom nungzuite amate teng kidongh a, “Khat po in ama an puak zo hi tu ziam?” ci uh hi.
34Jesus in, “Kei ii an sia, kei hong sawlpa ii deina ka zui tu le hong piak nasep ka zaw tu ahi hi. 35Noma in ‘Tha li zawkciang sia anlaak hun hi,’ ci kam teptee nei nu hi. Ahihang lote pha tak en vun; tu in lo ante min zo a, laak tu bekin om zo hi, ci in kong son hi! 36Anla pa sia thaman kipia a, ama in tawntung nuntak natu ante kaikhawm hi; tua ahikom thaicii poaipa le anlapa lungdam khawm tu hi. 37‘Mihing khat in thaicii poai a, a dang khat in anla hi,’ a ci sia thumaan hi. 38No ii thawna ahi ngawl lo khat sungah anla tu in hong paisak khi hi; ngualdangte in tua munah seam uh a, tuaciang in no sia amate sepna tung panin hamphatna na nga uh hi,” ci hi.
39Tua numei ii “Keima ngamtat ngei theampo hong son hi,” a cina hangin tua Samaria khua mi tam mama in Jesus um uh hi. 40Tua hi a Samaria mite ama kungah hong pai ciangin, amate kungah a taam natu in kunh uh hi, Jesus in tua munah ni nii taam hi.
41Ama thusonna hu in a tamzaw seseam in um uh hi; 42tua numei munah amate in, “Tu in um khu hi, nang nong son sia hang hi ngawl a, koma mama in ama ii thuson ka zaak uh hang hi, ama leitung Hunpa ahi takpi sia ka he uh hi,” ci uh hi.
Jesus in Ulian khat ii Tapa Damsak
43Tua munah ni nii a taam zawkciang Jesus vaidingin, Galilee ngam zuan hi. 44Banghang ziam cile ama mama in, “Kamsaangpa khat sia ama ii ngam sungah kizakta ngawl hi,” ci hi.#Mt 13:57; Mk 6:4; Lk 4:24 45Galilee ngam a thet ciangin, tualai mihingte in muak uh hi, banghang ziam cile amate Paisan Poai siimin Jerusalem ah pai a, poai sungah ama vawt theampo mu siat zo uh hi.#Jn 2:23
46Tua zawkciang Galilee ngam Cana khua ah Jesus pai kik hi, tua mun sia ama in tui pan sapittui a suasakna mun ahi hi. Tua munah kumpi naseam ulian khat om a, a tapa sia Capernaum khua ah a cina hi.#Jn 2:1-11 47Ama in Judea ngam panin Galilee ngam ah Jesus hong pai hunlam a zaak ciangin Jesus kungah pai a, Capernaum khua ah a thi dektak a tapa a damsak natu in ngen hi. 48Jesus in, “No sungah nalamdang laknate le, a lamdangte na mu bua uh le, kuama in na um ngei buatu uh hi,” ci hi.
49Ulianpa in, “Syapa awng, ka tapa a thi ma in hong zui ta'n,” ci in zo kik hi.
50Jesus in ama munah, “Va pai ta'n, na tapa nungta tu hi!” ci hi.
Tua pa in Jesus kammalte um in pai paih hi. 51Inn ah a cia lamin a naseamte in, “Na tapa nungta tu hi!” ci thu taw ama muak uh hi.
52A tapa a dam zawhiat sia bang hun ziam ci in amate tungah a dok ciang, “Zeini nitak sang nai khat hun in, a ci suk hong thai hi,” ci in zo hi. 53Tuasia ciang Jesus ii, “Na tapa nungta tu hi,” a ci hun lian ma ahi sia a pa in phawk hi. Tua ahikom ama le a innkuanpui theampo in um uh hi.
54Hisia in Judea pan Galilee ah hong pai zawkciang Jesus ii vawt nalamdang lakna a niina ahi hi.
Currently Selected:
John 4: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016