1 Corinth te 1
1
1Pathian ii deina taw Jesus Christ sawltak tu in a kisam Paul le ih suapuipa Sosthenes in —
2Corinth khua ah a om Pathian ii pawlpi tung le Pathian ii mi thiangthote suak tu in a kisam sa, Jesus Christ taw kipumkhatna ah ama ii neisa a suak mi theampo, mun theampo ah amate le eite ii Topa ahi ih Topa Jesus Christ a bia mihing theampo tungah lai kong thaak hi:#Sawl 18:1
3Ih Pa Pathian le Topa Jesus Christ in thuthiamna le thinnopna hong pia tahen.
Christ sungah Thuphate
4Jesus Christ tungtawnin note a thuthiamna hong piak hu in, ka Pathian tungah note atu lungdam ka ko tawntung hi. 5Banghang ziam cile Christ taw na kipumkhat uh hu in, kampauna le heakna theampo pan kipan na theampo ah a hau na suak zo uh hi. 6Christ ii thu sia no sungah kip takin kiphut zo ahikom, 7ih Topa Jesus Christ hong kilangh tu ngakin na om laitakin, thupha khat beak zongh na taan bua uh hi. 8Topa Jesus Christ ii Ni hong thet ni ciang, na pauban ngawl natu in ama in a tawpna dong kip takin hong keam si tu hi. 9Eima ii Topa ahi a Tapa Jesus Christ taw kipawl khawm tu a, note hong sam Pathian sia ih muan tu Pathian ahi hi.
Pawlpi sungah Kikhennate
10Ih Topa Jesus Christ thuneina taw, ka suapui note theampo tungah kong maangkaa hi, note sungah kikhenna a om ngawl natu in, na ci uh po kithukim vadiam vun. Ngaisutna khat le tupna khat bek taw na kipawl siat vun. 11Banghang ziam cile, ka suapuite awng, note sungah kihauna om hi ci in Chloe ii innkuanpui pawlkhat in thiang takin hong son zo hi. 12Kong cinopna pan, note khat simin thu tuatuam son nu hi. Khat in “Kei sia Paul ii nungzui ka hi hi,” ci a; a dang khat in, “Kei sia Apollos ii nungzui ka hi hi,” ci a; a dangkhat in, “Kei sia Peter ii nungzui ka hi hi,” ci a; tuaciang a dangkhat in, “Keima sia Christ ii nungzui ka hi hi,” na ci uh hi.#Sawl 18:24 13Christ sia pawl tuatuamin kikhentham hi! No atu in thinglamtee tungah a thi sia in Paul hina ziam? Paul nungzui tu in tui na kiphum uh ziam?
14Crispus le Gaius simngawl, note kuama tui kong phum ngawl hu in, Pathian tungah lungdam ka ko hi.#Sawl 18:8; 19:29; Rom 16:23 15Tua ahikom kuama in note sia kei nungzui suak tu in tui kiphum hi hong ci thei ngawl tu hi. 16(Oh hi peu hi, Stephanas le a innkuanpuite zongh tuiphum peu khi hi; tua ngawl po kuama dang tui ka phum le ka phum ngawl ciamtee ngawl khi hi.)#1 Cor 16:15 17Christ in tuiphum tu in kei hong sawl bua hi. Ama in Lungdamna Thupha son tu in, hong sawl hi, tuaciang thinglamtee tungah Christ a thina ii vaangletna a bo thong ngawl natu in, mihing ciimna kam zangh ngawlin son tu in hong sawl hi.
Christ sia Pathian ii Vaangletna le Ciimna
18Banghang ziam cile a mangthang mihingte atu in thinglamtee tungah Christ ii thina thu sia, luithawthong thu ahi hi, ahizong ngupna a nga eite atu in Pathian ii vaangletna ahi hi. 19Laithiangtho in,
“Mihing a ciimte ii ciimna
ka lalsak tu a,
pilna saang neite ii heakna sia
ka hepsak tu hi,” ci hi.#Is 29:14
20Tua ahile mihing ciimte, pilna saang neite, ahibuale leitung ah thu kinialna a thiamte sia bang suak tu ziam? Hi leitung ciimna sia mawmawtna hi ci in Pathian in lak zo hi! #Job 12:17; Is 19:12; 33:18; 44:25
21Banghang ziam cile Pathian in ama ii ciimna hong zangh a, mihingte in amate ciimna taw Pathian a heak zawk ngawl natu in vawt hi. “Mawmawt” thu hi a ci uh kote thuhilna taw, Pathian in thu umte ngup tu in khensat zaw hi. 22A up thei natu in Jew te in nalamdang laknate kalhsuut uh a, tuaciang Greek te in ciimna zong uh hi. 23Ko ka hi uh le thinglamtee tung a kithat Christ thu ka thangsak uh a, tua thu sia Jew te atu in a maktak huai thu le Gentile te atu in a luithawthong thu ahi hi; 24ahizong Pathian ii sapsa Jew te le Gentile te atu in hi thu sia Pathian ii vaangletna le Pathian ii ciimna ahi Christ ahi hi. 25Banghang ziam cile Pathian ii mawmawtna bang ahi sia in mihingte ciimna sangin ciimzaw a, tuaciangin Pathian ii thazawmna bang ahi sia in mihingte thahatna sangin hat zaw hi.
26Suapuite awng, Pathian in note hong sap laitakin, na omzia uh ngaisun vun. Mihingte hong muna ah note sungah a ciim, ahibuale a vaanglian, ahibuale a ci thei tawm bek na om uh hi. 27Pathian in mihing ciimte maizumsak natu in, leitung mite ii lui thawthong a sakte teal a, mihing thahatte a maizumsak natu in, leitung mite ii thazawm a sakte teal luih hi. 28Leitung ii thupi a sakte, a lalsak natu in leitung ii a nomu, a zawnsak le bangma in a hen ngawlte teal hi. 29Tua sia in, Pathian mai ah a kisathei tu kuama a om bua hi, a cinopna hi. 30Ahihang, Pathian in note Christ Jesus taw hong kipumkhatsak zo hi; Pathian in Christ sia eite ii ciimna suaksak zo hi. Ama hangin Pathian mai ah thutang in hong koi hi; eite Pathian ii mi thiangthote suakin, hong suaktasak hi. 31Tua ahiciangin laithiangtho in, “A kisuangtaak nuamte in, Topa vawtsate tungah a kisuangtaak kul tu hi,” a ci bangma ahi hi.#Jer 9:24
Currently Selected:
1 Corinth te 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016