TITUX 1
1
Lox Nawb Bwan
1Pawlux pa mawh siliex Siyiex mai kawncau pa ting Yesux Khrit, awm pa khaw mai krax yum rhawm pui pa hoik laug Siyiex khankix, krax tawng ka pa mawh pa meh, pa khaw mai pa nab yam pa yuh pa khaw ka Siyiex. 2Ka daux krax keud pot jun pot son ju leeing ju, Siyiex, pa ang chix pie lhen hoik tawx lox mukheu tom ka sivoe yam jah bawg yam ti koe. 3Ka daux bawg yam pa caw mai Nawh, Nawh hoik kieh sidawng ka daux gumlox tix, ka daux ceu pa sidiex pa hoik tawx pong ka aux awm pa khaw mai lox tawm Siyiex Cao Taoh ex, 4tawx ka Titux#2Kaw 8:23; Ka 2:3; 2Ti 4:10 pa mawh kawn aux tete kheu krax yum rhawm pa neuex ax, mawh tix ceu khaing heue. Kieh koe bwanson mai pa nhim pa kaoh khaing Siyiex Keeing Cao mai Yesux Khrit Cao Taoh ex liak.
Kaing Yuh Titux
5Mawh kheu grawng in aux hoik prah maix ka klawn tiex Karete, sonsang kieh maix cox ka ceu pa ang nyang bax hoik khankix, sonsang ciak ti deuh kuad ceu cao, ka daux ku veng awm hoik tawm aux ka maix heue. 6Phan pui tix kaux kaux koe, pa ang koe dee deuh phimap kah, pa koe moeng tix kaux khaing, pa koe kawn praix pa yum rhawm, pa ang pui deuh phimap ka grawng pa cuci pa lawh maw, ka pa ang chix cu nghiet, ciak ti deuh pa yuh nan heue. 7Pui pa mawh cao giex kaing ceu cao, tak lai mawh pa ang koe dee deuh phimap kah, awm mawh kawncau pa priex kraung Siyiex, pa ang nieb hawt alo tokaux tix, pa ang dawd rhawm, pa ang nieb pleung ka plai rawm plix siiet, pa ang nieb tap ngah pui mai pa ang keud ti pon mau yie daux krax pa ang khaw. 8Tak lai mawh pa chix khre ka nyo sinie, pa moh ka pa mhawm, pa chix keud ti priex rhawm tix, pa rahsee, pa singax, pa chix priex rhawm tix heue. 9Tak lai mawh pui pa giex ka gumlox sijax mukheu pa khaw mai pa gau, son sang mawh nawh pa chix jeeh nyaw ka lox gau pa mawh pa meh, sonsang chix pawk lox ka pui pa kieh pa thiang khankix heue.#1Ti 3:2-7 10Koe pui pa ang chix cu nghiet tom nie, pa nieb krai lox pa ang tie koe bwanson, pie ka pui, nie ting mawh ka kix pa mawh cub pa pat hak, 11Tak lai thox jheeh kix, pui pa klup ti kieh laux ka pui khawm nyiex khankix, ka pa gau pa ang kix khaw ti gau, son sang pon kix mau yie ka grawng pa ang khaw heue. 12Ka daux kix tix kaux pa mawh cao jhai ceu kix, hoik ah nin, “Pui Karete mawh pui pie lhen, totiag pa caox mai pui nieh pa chax nie luan ih ku jheung jheung heue.” 13Lox pa kham mhai rug an mawh pa mawh meh heue. Mawh kheu nan nied ti ah ka kix son sang kieh kix kaux cong ka daux krax yum rhawm, 14son ang sang nghiet ka lox been pui Yudax pa ang tie mawh, ka lox tawm pui khankix pa hoik tieh hu khaing pa mawh meh heue. 15Ka pui pa singax kuceu khawmuik mawh pa singax heue. Ka kix pa seeing brai, pa ang yum rhawm, tix ceu kawx ang singax, rhawm kix mai khawm dee chix keud tawng kix mawh pa seeing brai heue. 16Viang kix ah tawng ka Siyiex kawx, kix thiang ti tik Nawh ka ceu pa yuh tix, kheu mawh kix pa khreeing mai pa ang chix cu nghiet mai pa ang koe bwanson tidtix ka son pa yuh kaing ceu pa mhawm heue.
Currently Selected:
TITUX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012